EZEKIELI 3 - BIBLU WIWE LỌ 1923

¹ EWO sọ dọ hlan mi dọ, Visunnu gbẹtọ tọn, dù ehe hiẹ mọ; dù owedi he, bo yì, dọhó hlan owhé Islaeli tọn.

² Mọwẹ yẹn kè onù ṣie, ewọ sọ hẹn mi nado dù: owedi lọ.

³ Ewọ sọ dọ hlan mi dọ, Visunnu gbẹto ton, hen adọgo towe nado dù, bo sọ yí owedi he yẹn na we he do gọ́ ahúnkẹnmẹ towe. Whenẹnu wẹ yẹn dùi; é bo sọ tin to onù ṣie mẹ di owin na vivi.

⁴ Ewọ sọ dọ hlan mi dọ, Visunnu gbẹto tọn, yì, hẹn dewe jẹ owhé Islaeli tọn gbè, bo yí ohó ṣie lẹ do dọhó hlan yé.

⁵ Na yè ma do hiẹ hlan gbẹtọ he siso son nùflo mẹ bo sọ pèn sọn odé mẹ lẹ de gba, ṣigba hian owhe Islaeli tọn;

⁶ hlan akota susu oliógbè jonọ de ton po akògbè sinsinyẹn dẹ tọn po, ohó mẹhetọn hiẹ ma sọgan tùnwun, ma gba Nugbonugbo, eyin yẹn do we hlan yé, yé na tùntóai hlan we.

⁷ Ṣigba owhé Islaeli tọn ma na tùntóai hlan we gba; naye ma na tùntóai hlan mi: na owhe Islaeli tọn lepo yín nukọn sinsinyennọ de tọn po ayiha sinsinyẹnnọ de tọn po.

⁸ Dayi e go, yẹn ko hẹn nukunmẹ towe zùn sinsinyẹn do nukunmẹ yetọn lẹ go, podọ nukọn towe zùn sinsinyen do nukọn yetọn lẹ gó.

⁹ Dile ozannu diamọndi de yín sinsinyẹn hugan okẹn wẹ yẹn ko basi nukọn towe do: a si yé blo, mọ a sọ yín avosatọna mẹpinpón yetọn lẹ blo, le yé tlẹ yín owhé atẹsitọ de sọ.

¹⁰ Humọ ewọ sọ dọ hlan mi dọ, Visunnu gbẹtọ tọn, ohó ṣie lẹpo he yẹn na dọ hlan we yí do ayiha towe mẹ, bo sọ yí otọ́ towe lẹ do sè.

¹¹ Bo yì, hẹn dewe jẹ yé mẹmẹglọ tọn lẹ de, jẹ ovi omẹ towe le tọn lẹ de, bo dọhó hlan yé, bo dọ na yé dọ, Le wẹ OKLUNỌ JIWHEYẸWHE dọ; eyín yé na sè, kavi eyín yé na gbọ.

¹² Whenẹnu wẹ gbigbọ lọ zé mi daga, yẹn sọ sè to godo ṣie ogbè zínyìnyen daho de tọn, didọmọ, Donanọ gigo OKLUNỌ tọn yín sọn otẹn he mẹ.

¹³ Yẹn sọ sè hùnhlungbè awà núdida gbẹ́te lẹ lọ tọn di yé jẹ yénọzo go, podọ hùnhlungbè kẹkẹfọ lẹ lọ tọn to ye ji aga, yèdọ hùnhlungbè zínyìnyẹn daho de tọn.

¹⁴ Mowẹ gbigbọ lọ sọ zé mi daga, bo zé mi yi: yẹn sọ to yìyì to ovivé mẹ, to yózo gbigbọ ṣie tọn mẹ, podọ alọ OKLUNỌ tọn sọ to sinsinyẹn to oji e.

¹⁵ Whenẹnu we yen wá jẹ yé mẹmẹglọ tọn lẹ de to Tẹli abibi, he sín otọ Kebali dali, yẹn sọ sín fie yé sín; yẹn sọ sinai finẹ awujinọ azán ṣinawe.

¹⁶ E sọ wá jọ to opòdo azán ṣinawe lọ tọn, wẹ ohó OKLUNỌ tọn wá jẹ dẽ, dọmọ,

¹⁷ Visunnu gbẹtọ tọn, yẹn ko hen we zùn hihọtọ de hlan owhé Islaẹli tọn: enẹwutu sè ohó to onù ṣie mẹ, bo sọ na núkọ́namẹ yé sọn dẽ.

¹⁸ Whenuena yẹn dọ hlan mẹylankan dọ, Hiẹ na kú nugbonugbo; bọ hiẹ ma na núkọ́namẹ ewọ gba, bo ma sọ dọho nado kọ́nuna mẹylankan sọn aliho ylankan etọn mẹ, nado whlẹn ogbẹ̀ etọn; omẹ ylankan dopolọ na kú to oylanwà etọn mẹ; ṣigba ohùn etọn we yẹn na kanbiọ to alọ towe mẹ.

¹⁹ Adavo eyín hiẹ kọnúna mẹylankan lọ, bọ ewọ ma lẹ́ sọn ylankan etọn mẹ, kavi sọn aliho ylankan etọn mẹ gba, ewọ na kú to oylanwà etọn me; ṣigba hiẹ ko whlẹn alindọn towe.

²⁰ Podọ, whenuena omẹ dódónọ de sọ lẹ́ sọn dódó etọn mẹ, bo sọ wà oylanwà, bọ yẹn sọ yí zannuagbali de do nukọn nẹ̃, ewọ na kú: na hiẹ ma ko na núkọ́namẹ ewọ wutu, ewọ na kú to ylando etọn mẹ, podọ owàlọ dódónọ he ewọ ko wà lẹ wẹ yè ma to na sọ flin; ṣigba ohùn etọn wẹ yẹn na sọ kanbio to alọ towe mẹ.

²¹ Adavo eyin hiẹ kọnuna omẹ dódónọ lọ, dọ dódónọ lọ wàylando blo, bọ ewọ ma sọ wàylando gba, ewọ na nọgbè nugbonugbo, na ewọ ko yí núkọ́namẹ wutu; hiẹ ko sọ whlẹn alindọn towe.

²² Alọ OKLUNỌ tọn lọ sọ tin to oji e to finẹ; ewọ sọ dọ hlan mi dọ, Tite, jegbonu yì biọ agbàdo lọ mẹ, yẹn na sọ dọhó hẹ we to finẹ.

²³ Whenẹnu wẹ yẹn tite, bo jẹgbonu yì biọ agbàdo lọ mẹ: bo, dayi e go, gigo OKLUNỌ tọn nọte to fìne, di gigo he yen mọ to otọ̀ Kẹbali lọ dali: yẹn sọ jai do nukunmẹ ṣie ji.

²⁴ Whenẹnu wẹ gbigbọ lọ biọ yẹn mẹ, bo zé mi do afọ ṣie lẹ ji; ewọ sọ dọhó hẹ mi, bo dọ hlan mi dọ, Yì, sú dewe do họmẹ towe.

²⁵ Ṣigba hie, visunnu gbẹtọ tọn, dayi e go, yé na yí ogandomẹ lẹ do oji we, bo na yí ye do sín we, hiẹ ma na sọ yì sọn yé ṣẹnṣẹn gba:

²⁶ yẹn na sọ hẹn odé towe do aga onù towe tọn go, bọ hiẹ na yin unbọpẹn, bo ma na sọ yín hlan yé oplónlọnamẹtọ de gba: na owhé atẹsitọ de wẹ yé.

²⁷ Ṣigba whenuena yẹn dọhó hẹ we, yẹn na onù towe, hiẹ na sọ dọ hlan yé dọ, Le wẹ OKLUNỌ JIWHEYẸWHE dọ: Ewọ he sè, gbọ é ni sè; podọ ewọ he gbọ, gbọ é ni gbọ: na owhé atẹsitọ de wẹ yé.