EZEKIELI 25 - BIBLU WIWE LỌ 1923

¹ OHÓ OKLUNỌ tọn sọ wá dẽ, dọmọ,

² Visunnu gbẹtọ tọn, zé nukunmẹ towe do hlan ovi Amọni tọn lẹ, bo dọdọdai gbọn yé tọn dali:

³ bo dọ hlan ovi Amọni tọn lẹ dọ, Sè ohó OKLUNỌ JIWHEYẸWHE tọn; Le wẹ OKLUNỌ JIWHEYẸWHE dọ: Na hiẹ dọ wutu dọ, Aha, do fiwiwe ṣie go, whenuena yè flu i; podọ do aigba Islaeli tọn go, whenuena yè hẹn ẹn zùn ovọ́jẹ; podọ do owhé Juda tọn go, whenuena yé jì biọ mẹmẹglọ mẹ;

⁴ enẹwutu dayi e go, yẹn na jó we hlan ovi whèzẹtẹn tọn lẹ, na nutindo de, yé na sọ ze oslahò yetọn lẹ do hiẹ mẹ, bo sọ basi ninò yetọn lẹ to hiẹ mẹ; yé na dù osinsẹ́n towe, yé na sọ nù oyìnnọ́ towe.

⁵ Yẹn na sọ hẹn Laba zùn kanlinhò de na kanklosọ lẹ, podọ ovi Amọni tọn lẹ avàjẹtẹn de na lẹngbọpa lẹ: mìwlẹ na sọ yọnẹn dọ yẹn wẹ OKLUNỌ.

⁶ Na le wẹ OKLUNỌ JIWHEYẸWHE dọ: Na hiẹ ko hò alọ towe lẹ do alọ go wutu, bo sọ yí afọ towe lẹ do tùnafọte, bo sọ jaya po mahopón alindọn towe tọn lẹpo po do aigba Islaeli tọn lọ go;

⁷ enẹwutu dayi e go, yẹn ko dlẹn alọ ṣie jẹgbonu do hiẹ ji, bo na sọ jó hiẹ na ogblan de hlan akọta lẹ; yẹn na sọ sán we sẹ̀ sọn akọta lẹ mẹ, yẹn bo na sọ hẹn we nado súdo sọn otò lẹ mẹ: yẹn na và we; hiẹ na sọ yọnẹn dọ yẹn wẹ OKLUNỌ.

⁸ Le wẹ OKLUNỌ JIWHEYẸWHE dọ: Na dọ Moabi po Seili po dọ wutu dọ, Dayi e go, owhé Juda tọn tin jlẹdo akọta lẹpo go:

⁹ enẹwutu dayi e go, yẹn na hùn adà Moabi tọn sọn tòdaho lẹ mẹ, sọn tòdaho tọn lẹ mẹ he tin to agbegbè lẹpo ji, ogigo otò lọ tọn, Bẹti-jẹsimọti, Baalimeọni, po Kiliataimi po,

¹⁰ po ovi Amọni tọn lẹ po dopọ, jẹ ovi whèzẹtẹn tọn lẹ de, nado yì agó do ovi Amọni tọn lẹ go, yẹn na sọ jó yé na nutindo de, na yè ma nido flin ovi Amọni tọn lẹ to akọta lẹ mẹ ba:

¹¹ yẹn na sọ hẹn whẹ̀dida lẹ sọ to Moabi ji; yé bo na sọ yọnẹn dọ yẹn wẹ OKLUNỌ.

¹² Le wẹ OKLUNỌ JIWHEYẸWHE dọ: Na dọ Edọmi ko zán agọ̀ do owhé Juda tọn go wutu, gbọn ahọsuyíyí dali, bo ko sọ wàylando dahodaho, bo sọ yíahọsuna ede to yé ji;

¹³ enẹwutu le wẹ OKLUNỌ JIWHEYẸWHE dọ dọ, Yẹn na dlẹn alọ ṣie do Edọmi ji, bo na sán gbẹtọ po kanlin po sọn e mẹ: Yẹn bo na sọ hẹn en zùn ovọ́jẹ sọn Temani mẹ; yèdọ jẹ Jodani wẹ yé na jai gbọn ohi lọ dali.

¹⁴ Yẹn bo na sọ zé ahọsuyí ṣie do Edọmi ji gbọn alọ Islaeli omẹ ṣie lẹ tọn mẹ; yé na sọ wà to Edọmi mẹ kẹdẹdi adi ṣie podọ kẹdẹdi homẹwlu ṣie: yé bo na sọ yón ahọsuyí ṣie, wẹ OKLUNỌ JIWHEYẸWHE dọ.

¹⁵ Le wẹ OKLUNỌ JIWHEYẸWHE dọ: Na Filistini lẹ ko zán gbọn ahọsuyí dali wutu, bo ko sọ yí ahọsuyí po mahòmepón alindọn tọn po nado yí wangbéna mapòte de do và ẹ súdo;

¹⁶ enẹwutu le wẹ OKLUNỌ JIWHEYẸWHE dọ, Dayi e go, Yẹn na dlẹn alọ ṣie jẹgbonu do Filistini lẹ ji, yẹn na sọ sán Keletinu lẹ sẹ̀, bo và pipòtọ ohùtó tọn lẹ súdo

¹⁷ Yẹn na sọ hẹn ahọ́suyi daho sẹ do yé ji po owọhẹ sinsinyẹn lẹ po; yé bo na sọ yọnẹn dọ yẹn wẹ OKLUNỌ, whenuena yẹn na zé ahọsuyí ṣie do yé ji.