EZEKIELI 21 - BIBLU WIWE LỌ 1923

¹ OHÓ OKLUNỌ tọn sọ wá dẽ, dọmọ,

² Visunnu gbẹtọ tọn, zé nukunmẹ towe do hlan Jelusalẹm dali bo dlẹn ohó towe hlan fiwiwe lẹ dali, bo dọdọdai do aigba Islaeli tọn go;

³ bo dọ hlan aigba Islaeli tọn dọ, Le wẹ OKLUNỌ dọ, Dayi e go, yẹn tin agò dòogo we, bo na sọ dòn ohi ṣie jẹgbonu sọn apà etọn mẹ, bo sán dódónọ lọ po mẹylankan lọ po sè sọn hiẹ mẹ.

⁴ Mimọ whenẹnu dọ yẹn na sán dódónọ po mẹylankan po só sọn hiẹ mẹ, enẹwutu we ohi ṣie na jẹgbonu sọn apà etọn mẹ yì do agbasalan lẹpo ji sọn hùwaji jẹ agéwaji;

⁵ bọ agbasalan lẹpo na sọ yọnẹn dọ yẹn OKLUNỌ ko dòn ohi ṣie jẹgbonu sọn apà etọn mẹ; é ma na sọ íégò ba gba.

⁶ Enẹwutu wónhùn, hiẹ visunnu gbẹtọ tọn; po gbigbà adaja towe tọn po po ovivó po wẹ hiẹ na wènhùn to nukun yetọn lẹ nukọn.

⁷ E na sọ yín, whenuena yé dọ hlan we dọ, Etẹwutu hiẹ to hùnwón? wẹ hiẹ na dọmọ, Na owèn lọ tọn wutu, na é wá: ayiha lẹpo bo na sọ yé, alọ lẹpo bo na sọ yín tún tún, gbigbọ lẹpo bo na sọ yín madogán, gbigbọ lẹpo bo na sọ yín zíndo, kligonu lepo bo na sọ yín masinyẹn di osìn: dayi e go, é wá, é bo na sọ yín wiwà, wẹ OKLUNỌ Jiwheyẹwhe de.

⁸ Obó OKLUNỌ tọn sọ wá dẽ, dọmọ,

⁹ Visunnu gbẹtọ tọn, dọdọdai, bo dọmọ, Le wẹ OKLUNỌ dọ: Dọ, ohi de, ohi de, yè gàn ẹn, yè bo sọ sún in ga:

¹⁰ yè gàn ẹn na é nido basi hùhù de; yè sún in na é nido tin di osisó: bé míwlẹ na to ajogidi basi lò? é vlẹ opò visunnu ṣie tọn di atin lẹ dopodopo.

¹¹ Yè bo sọ jó e nado yín súnsún, na é nido yín dònhẹn: ohi lọ, yè gàn ẹn, mọwẹ, yè sún in, nado jó e do alọ mẹhùtọ lọ tọn mẹ.

¹² Visunnu gbẹtọ tọn, dawhá bo dohukúhlu: na é tin to omẹ ṣie lẹ ji, é tin to ahọvi Islaeli tọn lẹpo ji: budaho gbọn ohi lọ tọn dali tin to omẹ ṣie lẹ ji: enẹwutu hò to asapada towe ji.

¹³ Na whlepón de tin finẹ: eté yèdọ eyín ohi he vlẹ opò lọ é ma sọ to na tin ba? wẹ OKLUNỌ JIWHEYẸWHE dọ.

¹⁴ Enẹwutu hie, visunnu gbẹtọ tọn, dọdọdai, bo hò alo doalọ go dopọ; bo sọ gbọ ohi lọ ni yín yẹndawe whlatọ̀ntọ, ohi alánhọ̀tọ lẹ tọn lọ: ohi omẹ daho he yè doalán ogo na de tọn wẹ, he lẹ́do yé pó.

¹⁵ Yẹn ko zé obénu ohi lọ tọn do hòngbo yetọn lẹpo ji, na ayiha yetọn nido yọ́, bo sọ hẹn samùmù yetọn lẹ sudeji: ṣọ́ yè basi i di osisé, yè hẹn ẹn tlón na hùhù.

¹⁶ Hẹn dewe zùn dopo, yì adusi dali; do dewe do ohaji, yì amiyọn mẹ dali; fiedali wẹ yè hẹn nukunmẹ towe sókọ?

¹⁷ Yẹn ga na sọ hò alọ ṣie do alọ go dopọ, yẹn bo na sọ hẹnwá jẹ gbọjẹ mẹ: yẹn OKLUNỌ ko dọ ẹ.

¹⁸ Ohó OKLUNỌ tọn sọ vó wá dẽ, dọmọ,

¹⁹ Hiẹ ga, visunnu gbẹtọ tọn, dè aliho awe na we, na ohi ahọlu Babilọni tọn lọ tọn nido wá; Yé mẹawe lẹ na jẹgbonu sọn aigba dopo mẹ wá: bo dè otẹn de hia, dè e hia to aga aliho lọ tọn jẹ tòdaho lọ kọ̀n.

²⁰ Hiẹ na dè aliho de, na ohi lọ nado wá jẹ Laba ovi Amọni tọn lẹ tọn mẹ, podọ jẹ Juda kòn to Jelusalẹm odòkọnọ lọ mẹ.

²¹ Na ahọlu Babilọni tọn ṣite to kinklan aliho lọ tọn ji, to aga aliho awelẹ lọ tọn, nado zán odọsẹ: ewọ mímí ogá etọn yìgodo yìnukọn, é kangbèbiọ asányin lọ, é sọ pọ́n ahún lọ mẹ.

²² Odọsẹ tin to alọ adusi etọn mẹ na Jelusalẹm, nado zé agbòvùn lẹ do, nado kẹ́ onù lọ na hùhù, nado zé ogbè lọ daga po abóbó po, nado zé agbòvùn lẹ do họngbo lẹ ji, nado bẹ́ okiti lẹ pli, nado dó osòhò lẹ.

²³ E bo na sọ tin hlan yé di odọsẹ vọtọ de to nukun yetọn mẹ, he yí whiwhle lẹ whle hlan yé: ṣigba ewọ hẹn oylanwà wá oflin mẹ, na yé nido yín wiwle.

²⁴ Enẹwutu le wẹ OKLUNỌ JIWHEYẸWHE dọ: Na mìwlẹ ko hẹn oylanwà mìtọn nado yín finflin wutu, to ehe mẹ osẹ́nmẹjijẹ mìtọn lẹ yín didèhia, mọ dọ to wiwà mìtọn lẹpo mẹ ylando mìtọn lẹ sọawuhia; na dọ yè hẹn mì wá jẹ oflin mẹ wutu, wẹ yè na yí alọ do bẹ́ mì.

²⁵ Podọ hiẹ, omẹ ylankan alántọnọ lọ È, ahọvi Islaeli tọn lọ, azán mẹhetọn yè hẹn wá, to ojlẹ oyajiji opòdo tọn lọ tọn mẹ;

²⁶ le wẹ OKLUNỌ JIWHEYẸWHE dọ: Yẹn na diọtẹnna ogángbakun lọ, bo sọ dè ojẹgbakun lọ sẹ: ehe wẹ na tin, ehe ma gba: zé enẹ he yìdò daga, bo whiwhẹ́ enẹ he yìaga dai.

²⁷ Gòhùnna de, gòhùnna, gòhunna, wẹ yẹn na basi i do: ehe ga ma na sọ tin ba, kaka ewọ do wá ojlọjẹ mẹhetọn é yín; yẹn na sọ yí i nẹ.

²⁸ Podọ hiẹ, visunnu gbẹtọ tọn, dọdọdai, bo dọmọ, Le wẹ OKLUNỌ JIWHEYẸWHE dọ gbọn ovi Àmọni tọn lẹ tọn dali, podọ gbọn ovlẹ yetọn tọn dali; hie ni bo dọmọ, Yè dọ̀n ohi de, ohi de, na hùhù lọ yé sún in, hlan opòdopatapata, na é nido tin di osisẹ́:

²⁹ whenuena yé mọ ovọ́jẹ de we, whenuena yé dọdọṣẹ lalo lẹ hlan we, nado hù we to okò mẹylankan he yè doalán ogo na lọ tọn lẹ ji, azán mẹhetọn yè hẹn wá, to ojlẹ oya jiji opòdo tọn lọ tọn mẹ.

³⁰ Hẹn ẹn nado lẹ́gọ̀ do apà etọn mẹ. To otẹn fie yè dá we sọn lọ mẹ, to aigba ojọtẹn towe tọn mẹ, wẹ yẹn na dawhẹ̀na we te.

³¹ Yẹn bo na sọ kọ̀n homẹgble ṣie jegbonu do oji we; yẹn na yí miyọn homẹgble ṣie tọn do flọ do oji we: Yẹn bo na sọ jó we do alọ gbẹtọ kanlinjọmẹ lẹ tọn mẹ, he yónana nado và.

³² Hiẹ na tin na nake hlan miyọn lọ; ohùn towe na sọ tin to gblagbla aigba lọ tọn mẹ; yè ma na sọ flin we ba: na yẹn OKLUNỌ ko dọ ẹ.