EZEKIELI 18 - BIBLU WIWE LỌ 1923

¹ OHÓ OKLUNỌ tọn sọ vó wá dẽ, dọmọ,

² Eté míwlẹ lẹn, bọ mì do nọ zán hówhinwhén he to aigba Islaeli tọn mẹ, dọmọ, Otọ́ lẹ ko dù ovẹ̃nsinsẹ́n odéwhá lẹ, yè sọ hẹn adú ovi lẹ tọn jó?

³ Le yẹn togbẹ̀, wẹ OKLUNỌ JIWHEYẸWHE dọ, mìwlẹ ma na sọ tindo omọdọ depope ba nado nọ zán howhinwhẹ́n he to Islaeli mẹ gba.

⁴ Dayi e go, ṣie wẹ alindọn lẹpo; le alindọn otọ́ tọn te, mọ ga alindọn visunnu tọn yín ṣie: alindọn he wàylando, é na kú

⁵ Ṣigba eyín omẹ de yín nugbonọ, bo wà whẹ̀dida po dódó po,

⁶ bo ma ko dù to osé lẹ ji gba, mọ ma ko zé nukun etọn lẹ daga hlan ovodun owhé Islaeli tọn tọn, lẹ gba, mọ ma ko flu asi kọmẹnu etọn tọn gba, mọ ma ko wá sẹpọ́ jẹ yọnnu de de to ọlajijẹ etọn mẹ gba;

⁷ bo ma ko sọ jagọ̀do mẹdepope go gba, ṣigba ko gọ̀ ogodènú ahọtọnọ etọn tọn jó nẹ, bo, ma ko hẹn mẹde gble gbọn huhlọn dali gba, ko na akla etọn hlan hùvétọnọ, bo ko yí awugbo etọn do ṣinyọn omẹ́nọ;

⁸ ewọ he ma ko na jẹgbonu to alemasẹnmẹ ji, mọ ma ko yí ojideji depope, he ko dòn alọ etọn dogodo sọn oylanwà mẹ, ko hẹn whẹ̀dida nugbo ṣẹ to mẹde po mẹde po ṣẹnṣẹn,

⁹ ko zinzọnlin to oséndoai ṣie lẹ mẹ, bo ko yìn whẹ̀dida ṣie lẹ, nado nọ yí nugbo do zán; nugbonọ wẹ ewọ, ewọ na nọgbè nugbonugbo wẹ OKLUNỌ JIWHEYẸWHE dọ.

¹⁰ Eyín ewọ dè visunnu de tọ́n he yín ajotọ de, kinkòntọ ohùn tọn de, podọ he wà depope to onú helẹ mẹ hlan nọvisunnu de,

¹¹ podọ he ma wà to azọ́n nẹlẹ depope mẹ gba, ṣigba yèdọ ko dù to osé lẹ ji, bo flu asi kọmenu etọn tọn,

¹² ko jagòdo wamọnọ po agbatọnọ po go, ko hẹngble gbọn huhlọn dali, ma ko gọ̀ ogodènu jó gba, bo ko zé nukun etọn lẹ daga hlan ovodun lẹ, ko wà osùnú,

¹³ ko na jẹgbonu to alemasénmẹ ji, bo ko yí ojideji: bé ewọ na nọgbè mọ? ewọ ma na nọgbẹ́ gba: ewọ ko wà osùnú he lẹpo: ewọ na yín hùhù nugbonugbo; ohùn etọn na sọ tin to e ji,

¹⁴ Dinvie, pọ́n, eyín ewọ dè visunnu de tón, he mọ ylando otọ́ etọn tọn lẹpo, he ewọ ko wà, bo sọ lẹnpọ́n, bo ma sọ wà di mọnkọ gba,

¹⁵ he ma ko dù to osé lẹ ji, mọ ma ko zé nukun etọn lẹ daga hlan, vọdun owhẹ́ Islaeli tọn tọn lẹ, ma ko flu asi kọmẹnu etọn tọn,

¹⁶ mọ ma ko jagọ̀do mẹdepope go, ma ko yí núde na ogòdènú, mọ ma ko hẹngble gbọn huhlọn dali, ṣigba ko na akla etọn hlan hùvẹ́tọ, bo ko sọ yí awugbo etọn de ṣinyọnna oménọ,

¹⁷ hè ko dọ̀n alọ etọn son wamọnọ de, he ma ko yí alemasénmẹ kavi ojideji, ko hẹn whẹ̀dida ṣie lẹ ṣẹ, ko zinzọnlin to osẹ́ndoai ṣie lẹ mẹ; ewọ ma na kú na oylanwà otọ́ etọn tọn gba, ewọ na nọgbé nugbonugbo.

¹⁸ Na otọ́ etọn tọn, na ewọ yí okà do bianukunnamẹ, hẹn nọvisunnu etọn gble gbọn huhlọn dali, bo sọ wà enẹ he ma yín dagbe to omẹ etọn lẹ ṣẹnṣẹn wutu, dayi e go, ewọ na kú na oylanwà etọn.

¹⁹ Gãnṣo míwlẹ dọmọ, Etẹwutu wẹ visunnu ma nọ hẹn oylanwà, otọ́ tọn? Whenuena visunnu lọ ko wà enẹ he yín osẹ́nnọ po ojlọjẹ po, bo ko sọ yìn osẹ́ndoai ṣie lẹpo, bo ko sọ basi yé, ewọ na nọgbẹ́ nugbonugbo.

²⁰ Alindọn he wàylando, e na kú: visunnu lọ ma na hẹn oylanwà otọ́ tọn, mọ otọ́ ma na sọ hẹn oylanwà visunnu lọ tọn gba; dódó dódónọ lọ tọn na tin to e ji, podọ kan-yinylan mẹylankan lọ tọn na sọ tin to e ji.

²¹ Ṣigba eyín mẹylankan lé sọn ylando etọn he é ko wà lẹpo mẹ, bo sọ yìn osẹ́ndoai ṣie lẹpo, bo sọ wà enẹ he yín osénnọ po ojlọjẹ po, ewọ na nọgbẹ́ nugbonugbo, ewọ ma na kú gba.

²² Depope sọn osénmẹjijẹ etọn lẹ mẹ he é ko wà ma na yín finflin do e go gbà: to dódó etọn he é ko wà mẹ wẹ é na nọgbẹ́ te.

²³ Bé yẹn tindo homẹhùn depope to okú mẹylankan tọn mẹ? wẹ OKLUNỌ Jiwheyẹwhe dọ: bo ma kúkú yín dọ ewọ do légọ sọn aliho etọn mẹ, bo nọgbẹ́?

²⁴ Ṣigba whenuena dódónọ lọ lé sọn dódó etọn mẹ, bo wà oylanwà, bo sọ wà kẹdẹdi osùnú he omẹ ylankan lọ ko wà lẹpo lẹ, bé ewọ na nọgbẹ́ mọ? Depope to owàlọ dódónọ etọn he é ko wà lẹ mẹ ma na yín finflin gba: to osẹ́nmẹjẹ etọn mẹ he ewọ ko do jẹsénmẹ, podọ to ylando etọn mẹ he ewọ ko do wàylando, yé mẹ wẹ ewọ na kú te.

²⁵ Gãnṣo mìwlẹ dọmọ, Aliho OKLUNỌ tọn ma yín jijlọ gba. Sè dinvie, hiẹ owhé Islaeli tọn E: Bé aliho ṣie ma yín jijlọ gba? bé aliho mìwlẹ tọn lẹ ma wẹ yín majlọ?

²⁶ Whenuena omẹ dódónọ lọ lé yì sọn dódó etọn mẹ, bo sọ wà oylanwà ewọ na kú na e tọn wutu; oylanwà etọn he ewọ ko wà wẹ é na kú na.

²⁷ Podọ, whenuena omẹ ylankan lọ lé yì sọn yinylan etọn he ewọ ko wà mẹ, bo sọ wà enẹ he yín osénnọ po ojlọjẹ po, ewọ na whlẹn alindọn etọn dogbẹ́.

²⁸ Na ewọ lẹnpón wutu, bo sọ lẹ́ yì sọn osénmejijẹ etọn he é ko wà lẹpo mẹ, ewọ na nọgbè nugbonugbo, ewọ ma na kú gba.

²⁹ Gãnṣo wẹ owhé Islaeli tọn dọmọ, Aliho OKLUNỌ tọn ma yín jijlọ gba. Owhé Islaeli tọn E, bé aliho ṣie lẹ ma yín jijlọ la? bé aliho mìwlẹ tọn ma wẹ yín majlọ?

³⁰ Enẹwutu yẹn na dawhèna mì, mì owhé Islaeli tọn emi, omẹ dopodopo kẹdẹdi aliho etọn lẹ, wẹ OKLUNỌ JIWHEYẸWHE dọ. Mì légó, bo lé míde sọn osénmejijẹ mìtọn lẹpo mẹ; mọwẹ yé ma na yín zannuagbali oylanwà tọn de hlan mì gba

³¹ Dlan osẹ́nmẹjẹ mìtọn lẹpo sẹ́ sọn mì de, ehemẹ mì ko jẹsénmẹ te; bo sọ basi ayiha yọ́yọ́ de na míde po gbigbọ yọ́yọ́ de po: na etẹwutu wẹ mì na kú, mì owhé Islaeli tọn emi?

³² Na yẹn ma tindo homẹhùn de to okú ewọ he kú tọn mẹ gba, wẹ OKLUNỌ JIWHEYẸWHE dọ: enẹwutu mì lẹ́ míde, bo nọgbẹ́.