EZEKIELI 16 - BIBLU WIWE LỌ 1923

¹ OHÓ OKLUNỌ tọn sọ vọ́ dé wá, dọmọ,

² Visunnu gbẹtọ tọn, hẹn Jelusalẹm nado yón osùnú etọn lẹ,

³ Bo dọmọ, Le wẹ OKLUNỌ Jiwheyẹwhe dọ hlan Jelusalẹm: Ojọtẹn towe po ajitẹn towe po wẹ sọn aigba Kananinu lẹ tọn mẹ; Ámọlinu lẹ wẹ otọ́ towe podọ onọ towe wẹ Hitinu de.

⁴ Podọ na ajitẹn towe tọn, to azán he gbè yè ji we yè ma gbò ahón towe, mọ yè ma sọ lẹ́awuna hiẹ to osìn mẹ nado lẹ́ we wẹ́ gba; yè ma dojẹ hiẹ depope gba, kavi gbànjana depope gba.

⁵ Nukun de ma blawuna we, nado wà sọn ehelẹ depope mẹ hlan we, nado tindo lẹblanu to oji we gba; aigba yè zé hiẹ dlan gbonu do odanji, na dọ yè gbẹwanna agbasa towe to azán he mẹ yè ji hiẹ te.

⁶ Podọ whenuena yẹn jugbon dali towe, bo mọ we to hihopatapata to ohùn towe mẹ yẹn dọ hlan we dọ, Yín hiẹ tlẹ tin to ohùn mẹ, gán; mọwẹ, yẹn dọ hlan we, Yín hiẹ tlẹ tin to ohùn towe mẹ, gán.

⁷ Yẹn hẹn we zùn sọhadahogédegéde de di sédido danji tọn, hiẹ sọ sudeji bo klo pèvè, hiẹ sọ jẹ̀ asọdonú asọdonú lẹ tọn kòn; yè mlin anó towe lẹ, yè sọ hẹn odà towe wú; gãnṣo yè hẹn hiẹ jẹmẹ́ bo sọ gbògbé.

⁸ Dinvie whenuena yẹn jugbọn dali towe, bọ pọ́n we, dayi e go, ojlẹ owanyi tọn wẹ ojlẹ towe; yẹn sọ dlẹn avọ̀tónu ṣie do ta na we, bo sọ ṣinyọn ómọ́ towe: mọwẹ, yẹn whle hlan we, bo sọ biọ alẹ̀nù de mẹ yì po hiẹ po, wẹ OKLUNỌ JIWHEYẸWHE dọ, hiẹ sọ lẹzùn ṣie.

⁹ Whenẹnu wẹ yẹn yí osìn do lẹ̀ we; mọwẹ, yẹn klọ ohùn towe sẹ́ sọn ogo we mlẹnmlẹn, yẹn bo sọ yí amisisá do sámina we.

¹⁰ Yẹn yí azón yẹnvinanọ do ṣinyọ̀navọ̀na we ga bo sọ yí oklòyú do doufọpana we, yẹn sọ yí alá dagbedagbe do gbàn we, bo sọ yí oséda do ṣinyọn we.

¹¹ Yẹn sọ yí asọdonú Jẹ do va we ga, yẹn bo sọ yí alọgàn lẹ do alọ towe le ji, po ogẹ̀dẹ de po do okó towe go.

¹² Yẹn sọ yí alọkẹ de do awọntin towe ji, po tómẹnú lẹ po do otọ́ towe lẹ mẹ, po ojẹgbakun whanpẹnọ de po do ota towe ji.

¹³ Le wẹ yè yí sika po fataka po do và we do; bọ avọ̀dido towe tin sọn alà dagbedagbe mẹ, po oséda po, po azọ́n Yẹnvinanọ po; hiẹ to olinfin dagbedagbe dù, po owín po, po amì po: hiẹ bo sọ yín whanpẹnọ tála, hiẹ bo sọ doale jẹ ohá ahọlu tọn mẹ.

¹⁴ Linlin towe bo sọ jẹgbonu yì akọta lẹ ṣẹnṣẹn na whanpẹ towe; na é yín pipé, gbọn gigodaho hiẹ he yẹn yí do oji we mẹ, wẹ OKLUNỌ JIWHEYẸWHE dọ.

¹⁵ Ṣigba hiẹ dotudo whanpẹ towe go, bo sọ to gàlilọ basi na yíndidi towe tọn wutu, bó sọ kòn ayòdide towe lẹ jẹgbonu do omẹ he jujei lẹpo go: etọn é yín.

¹⁶ Hiẹ bo sọ yí sọn awugbo towe lẹ mẹ, bo basi otẹn yìaga lẹ na we he yè yí owhèkan hùnkọbùnkọ lẹ do và, bo sọ to gàlilọ basi to yé ji: onú lẹ lọ hunkọ ma na sọ wá, mọ é ma sọ mọ na yín.

¹⁷ Hiẹ yí núzinzán whanpẹnọ towe lẹ ga sọn sika ṣie mẹ podọ sọn fataka ṣie he yen ko na we mẹ, bo do basi bosiọ lẹ na we, bo sọ to gàlilọ basi po ye po;

¹⁸ hiẹ sọ yí awugbo yẹnvinanọ towe lẹ, bo ṣinyọn yé, bo sọ zé ami ṣie po nuyọnwan ṣie po do yé nukọn.

¹⁹ Akla ṣie ga he yẹn na we, olinfìn dagbedagbe, po amì po, po owín po, he yẹn do to yìnyìn we, yèdọ hiẹ zé e do yé nukọn na nuyọnwan vivi de, podọ le wẹ é te; wẹ OKLUNỌ JIWHEYẸWHE dọ.

²⁰ Humọ hiẹ ko yi visunnu towe lẹ po viyọnnu towe lẹ po, mẹhe hiẹ ko hẹnwá jẹ dẽ lẹ, podọ ehelẹ wẹ hiẹ do sánvọ hlan yé nado yín dùdù Bọ́ ayodide towe lẹ yín owhẹ̀hó pẹvi de,

²¹ dọ hiẹ ko hù ovi ṣie lẹ, bo so jó yé do, to hinhẹn yé gbọn miyọn ta jẹ yé de mẹ?

²² Podọ to osùnú towe lẹpo po ayọdide towe lẹ po mẹ hiẹ ma ko flin azán ovú towe tọn lẹ gba, whenuena hiẹ yín oménọ po ogbògbé po, bo sọ to patapatahò to ohùn towe mẹ.

²³ Yè sọ hẹn ẹn wá nado jọ to kanyinylan towe lẹpo godo, (dindọn, dindọn hlan we wẹ OKLUNỌ Jiwheyẹwhe dọ,)

²⁴ bọ hiẹ ko do abò de to aigbaglọ hlan we, bo ko sọ basi otẹn zéyìaga de na we to alihogbo lẹpo mẹ,

²⁵ Hiẹ ko do otẹn zéyìaga towe to ota aliho tọn lẹpo ji, bo ko sọ hẹn whanpẹ towe zùn osùnú de, bo ko sọ hùn afọ towe le hlan ome he juwajei lẹpo, bo sọ hen ayòdide towe sudeji.

²⁶ Hiẹ ko basi gàlilọ po Egiptinu lọ po ga, kọmẹnu towe lẹ agbasalan daho tọn lẹ; bo ko sọ hen ayòdide towe sudeji nado hẹnhomegble mi hlan adi.

²⁷ Enẹwutu dayi e go, yẹn ko dlẹn alọ ṣie do ta na we, bo ko sọ dè núdègbèhlanmẹ towe pò, bo sọ jó we hlan ojlo yé he gbẹwanna we lẹ tọn, viyọnnu Filistini le tọn, he yè hẹn winyan aliho owantún towe tọn hù lẹ.

²⁸ Hie ko sọ basi ogàlilọ ga he Asilianu lẹ, na hiẹ ko yín mapékọnọ wutu; mọwẹ, hiẹ ko basi ogàlilọ hẹ yé, podọ gãnṣo hiẹ ma yín pékọnọ gba.

²⁹ Humọ hie ko hen ayòdide towe sudeji to aigba Kanani tọn mẹ, jẹ Kaldea; gãnṣo hiẹ ma yin pékọnọ po ehe po gba.

³⁰ Nawẹ ayiha towe jin madogannọ dole, wẹ Oklunọ JIWHEYẸWHE dọ, mimọ hiẹ wà onú he lẹpo, azọ́n yọnnu ayọ̀detọ adingbànnọ de tọn;

³¹ to ehe mẹ hiẹ do otẹn yìaga towe to ota aliho lẹpo tọn mẹ, bo sọ basi otẹn zéyìaga towe to alihogbo lẹpo mẹ; bo ma ko sọ tin di gàlọtọ de gba, he vlẹ opadèmẹ etọn.

³² Asi he deayò de he yi ojonọ le to otẹn asú etọn tọn mẹ!

³³ Yé na nunina lẹ hlan gàlọtọ lẹpo: ṣigba hiẹ na nunina towe lẹ hlan wanyitọ towe lẹpo, bo blanúhẹ yé, na yé nido wá jẹ de we to awà lẹpo ji na ayòdide towe.

³⁴ Podọ olẹ́jẹ lọ tin to hiẹ mẹ sọn yọnnu dẽvo lẹ mẹ to ayòdide towe lẹ mẹ, to e mẹ dọ mẹde ma hodo we nado basi ayòdide gba: podọ le hiẹ dapàme, bọ yè ma padàmẹ de hlan hiẹ gba, enẹwutu hiẹ yín olẹ́jẹnọ.

³⁵ Enẹwutu, hiẹ ogàlotọ È, sè ohó OKLUNỌ tọn:

³⁶ Le wẹ OKLUNỌ JIWHEYẸWHE dọ, Na yè kòn ogànvẹ̃ towe jẹgbonu wutu, bọ yè sọ dè omé towe hia gbọn ayòdide towe le mẹ hẹ wanyitọ towe lẹ; podọ na ovodun osùnú towe tọn lẹpo tọn wutu, podọ na ohùn ovi towe lẹ́ tọn he hiẹ na hìan yé, he hiẹ jó hlan yé;

³⁷ enẹwutu dayi e go, yẹn na bé wanyitọ towe lepo pli, mẹhe hie yí gbèdùdù hẹ po yé he hiẹ ko yiwanna lẹpo po, po yé he hiẹ ko gbẹwanna lẹpo po; yèdọ yẹn na bẹ́ yé pli do oji we to awà lẹpo ji, bo na dè omẹ́ towe hia hlan yé, na yé nido mọ omé towe lẹpo.

³⁸ Podọ yẹn na sọ dawhẹ̀na we, dile yè nọ dawhèna yọnnu he hẹn alọ wle gbà bo sọ kòn ohùn dai do; yen na sọ hen ohùn homẹwlu po awuwhàn po tọn wá oji we

³⁹ Yẹn na jó we do alọ yetọn mẹ ga, yé na sọ họ́ otẹn yìaga towe liai, bo sọ gbà otẹn zéyìaga towe lẹ liai; podo yé na so dè avọ̀ towe lẹ sọn ogo we, bo sọ bẹ́ sikanú dagbedagbe towe lẹ: yé na sọ jó we dai omẹ́nọ, ogbọ̀gbó.

⁴⁰ Yé na hẹn obépli de hẹji wá oji we ga, yé na sọ yí zannu lẹ do dlanzannu do we bo so yí ohi yetọn le do do we luntón

⁴¹ Yé na sọ yí miyọn do mẹ́ ohò towe lẹ bo sọ hẹn whẹ̀dida lẹ sẹ to oji we to nukun yọnnu susu tọn mẹ; podọ yen na sọ hen we nado doalọte sọn ogàlilọ lọ bibasì me, podọ ga hiẹ ma na sọ na padàmẹ depope ba gba.

⁴² Mowẹ yẹn na hẹn homewlu ṣie jẹ ogbọjẹ me hlandali towe, podọ awuwhàn ṣie na sọ fọ́nyì sọn de we, yẹn na sọ yín aboenọ bo ma na sọ yín adinọ ba gba.

⁴³ Na hiẹ ma ko flin azán ovú towe tọn lẹ wutu, ṣigba ko hẹn mi fiẹ to onú he lẹpo mẹ; enẹwutu dayi e go, yẹn ga na hẹn aliho towe wá ota towe ji, wẹ OKLUNỌ JIWHEYẸWHE dọ: hiẹ ma ko wà wantúnnú he hugan osùnú towe lẹpo?

⁴⁴ Dayi e go, omẹ he nọ zán hówhinwhén lẹpo na nọ zán hówhinwhén he do ogo we, dọmọ, Le onọ te, mọwẹ viyọnnu etọn te.

⁴⁵ Viyọnnu onọ towe tọn wẹ hiẹ, he gbẹwanna asú etọn po ovi etọn lẹ́ po; podọ nọviyọnnu noviyọnnu towe lẹ tọn wẹ hiẹ, he gbẹwanna asú yetọn lẹ po ovi yetọn lẹ po: Hitinu de wẹ onọ towe, podọ otọ́ towe Amọlinu de.

⁴⁶ Podọ Samalia wẹ nọviyọnnu towe daho, he nọ nọ̀ alọ amiyọn towe mẹ, ewọ po viyọnnu etọn lẹ po: podọ nọviyọnnu towe pevi he nọ nò alọ adusi towe mẹ, wẹ Sọdọmi po viyọnnu etọn lẹ po.

⁴⁷ Gãnṣo hiẹ ma ko zinzọnlin to aliho yetọn lẹ mẹ, kavi wà hodo osùnú yetọn lẹ gba; ṣigba, di eyín enẹ wẹ yín onú pevi talala de, hiẹ yín gbigbletọ hú yé to aliho towe lẹpo mẹ.

⁴⁸ Le yẹn togbẹ̀, wẹ Oklunọ JIWHEYẸWHE dọ, Sọdọmi nọviyọnnu towe ma ko Wà, èwọ kavi viyọnnu etọn lẹ, dile hiẹ ko wà do gba, hiẹ po viyọnnu towe lẹ po.

⁴⁹ Dayi e go, ehe wẹ oylanwà Sọdọmi nọviyọnnu towe tọn; osakla, gigọ́ akla tọn, po vivo gbódùdù tọn po tin to ewọ mẹ podọ to viyọnnu etọn lẹ mẹ; mọ ewọ ma sọ nahuhlọn alọ wamọnọ po agbatọnọ po tọn gba.

⁵⁰ Podọ yé sọ yín kiklatọ, bo to osùnú wà to nukọn ṣie: enẹwutu wẹ yẹn bẹ́ yé yì whenuena yẹn mọ ẹn.

⁵¹ Mọ Samalia ma tlẹ ko wà odá sọn ylando towe lẹ mẹ gba; ṣigba hiẹ ko hẹn osùnú towe lẹ sudeji húgan yé, bo ko sọ sùwhẹ́na nọviyọnnu towe lẹ gbọn osùnú towe he hiẹ ko wà lepo dali.

⁵² Hiẹ ga, ni hẹn owinyan towe titi, to ehe mẹ hiẹ ko na whẹ̀dida na nọviyọnnu towe te; gbọn ylando towe lẹ mẹ dọ hiẹ ko wà osùnú hú yé, yéwlẹ yín dódónọ hú hiẹ: mọwe, hiẹ ni yín oflunọ ga, bo sọ hẹn owinyan towe, to ehe mẹ hiẹ ko sùwhèna nọviyọnnu towe lẹ te.

⁵³ Yẹn bo na sọ lẹ́gọ̀ jẹ mẹmẹglọ yetọn ji, mẹmẹglọ Sọdọmi po viyonnu etọn lẹ po tọn, po mẹmẹglọ Samalia po viyọnnu etọn lẹ po tọn, po mẹmẹglọ mẹglọnọ towe lẹ tọn po to gblagbla yé tọn mẹ:

⁵⁴ Na hiẹ nido hẹn owinyan towe titi, podọ bo do yín mẹmọwinyan na popo he hiẹ ko wà lẹpo tọn wutu, to ehe mẹ hie yín ohọmemiọn de hlan yé te.

⁵⁵ Podọ nọviyọnnu towe, Sọdọmi po viyọnnu etọn lẹ po, na lẹ́gọ̀ do otẹn nukọnton yetọn me, podọ Samalia po viyọnnu etọn le po na sọ lẹ́gọ̀ do otẹn nukọntọn yetọn me, podo hiẹ po viyọnnu towe lẹ po na sọ legò do oten nukọntọn mìtọn mẹ.

⁵⁶ Na yè ma dọhó Sọdọmi nọviyọnnu towe tọn gbọn onù towe dali to azán osakla towe tọn mẹ gba;

⁵⁷ whẹpo yè do dè kanyinylan towe hia, di to ojlẹ ovle viyọnnu Silia tọn lẹ tọn mẹ tọn, po yé he tin lẹ́do we lẹpo tọn po, viyọnnu Filistini lẹ ton lẹ, he wà Ovlẹ hlan we lédo pó

⁵⁸ Hiẹ ko hẹn wantúntún towe po osùnú towe lẹ po, wẹ OKLUNỌ dọ.

⁵⁹ Na le wẹ OKLUNỌ Jiwheyẹwhe dọ: Yèdọ yẹn na zán hẹ we dile hiẹ ko wà do, he ko vlẹ whiwhle lọ to gbigbà alẹ̀nù lọ mẹ.

⁶⁰ Ṣogãn yẹn na flin alẹ̀nù ṣie hẹ we to azán ovú towe tọn lẹ mẹ, yẹn na sọ hen alẹ̀nù madopodo de lódo hlan we.

⁶¹ Whenẹnu wẹ hiẹ na flin aliho, towe lẹ, bo sọ yín mẹmọwinyan, whenuena hiẹ na mọ nọ-viyọnnu towe lẹ yí, nọviyọnnu towe daho lẹ po pẹvi towe po: bọ yen na jó yé hlan we na viyọnnu lẹ, ṣigba gbon alẹ̀nù towe dali ma gba.

⁶² Podọ yẹn na sọ hẹn alẹ̀nù ṣie lódo to de we; hiẹ bo na sọ yọnẹn dọ yẹn wẹ OKLUNỌ;

⁶³ na hiẹ nido flin, bo sọ yín oflunọ, bo ma sọ do kó onù towe gbède ba, na owinyan towe tọn wutu; whenuena yẹn ko na ehe hiẹ ko wà lẹpo we, wẹ OKLUNỌ JIWHEYẸWHE dọ.