EZEKIELI 12 - BIBLU WIWE LỌ 1923

¹ OHÓ OKLUNỌ tọn ga sọ wá dẽ, dọmọ,

² Visunnu gbẹtọ tọn, gblagbla owhé atẹsitọ lẹ tọn gbè wẹ hiẹ to ninò, he tindo nukun lẹ nado mọ, bo ma mọ, he tindo otò lẹ nado sè, bo ma sọ sè; na owhé atẹsitọ de wẹ yé.

³ Enewutu, hiẹ visunnu gbẹtọ tọn, wleawu núwànù tọn na dewe na oyàndogbé, bo sọ diọtẹn to okle to nukun yetọn mẹ; hiẹ na sọ diọtẹn sọn otẹn towe mẹ jẹ otẹn dẽvo mẹ to nukun yetọn mẹ: é sọgan yín yé na mọhlan dọ yé yín owhé atẹsitọ de.

⁴ Hiẹ bo na sọ hẹn núwànú towe jẹgbonu wá to okle to nukun yetọn mẹ, di núwànú na oyàndogbé: hiẹ lọsu bo na sọ jẹgbonu yì to whèjai to nukun yetọn mẹ, di whenuena omẹ de jẹgbonu yì bio oyàndogbé mẹ.

⁵ Hiẹ ni kùn adó lọ luntón to nukun yetọn mẹ, bo bẹ́ jẹgbonu gbọnfìnẹ yì.

⁶ To nukun yetọn mẹ wẹ hiẹ na zé e hẹn to abò towe ji, bo bé ẹ jẹgbonu yì to zinvlu mẹ; hiẹ na ṣinyọn nukunmẹ towe, bọ hiẹ ma na do mọ aigba lọ: na yẹn ko zé we do na ohia de hlan owhé Islaeli tọn.

⁷ Yẹn sọ wà mọ dole yè degbèna mi do: Yen hẹn núwànú ṣie jẹgbonu to okle, di núwànú na oyàndogbé, podọ to whèjai yẹn sọ yí alọ ṣie do kùn adó lọ luntón; yẹn hẹn ẹn jẹgbonu wá to zinvlu mẹ, bo sọ zé e hẹn to abó ṣie ji to nukun yetọn mẹ.

⁸ To afọnnu lọ ohó OKLUNỌ tọn wá dẽ, dọmọ,

⁹ Visunnu gbẹtọ tọn, bé owhé Islaeli tọn, owhé atẹsitọ lọ ma ko dọ hlan we dọ, Etẹ́ hiẹ to wiwà?

¹⁰ Hiẹ ni dọ hlan yé dọ, Le wẹ OKLUNỌ JIWHEYẸWHE dọ: ozònji he dù ahọvi lọ to Jelusalẹm mẹ, po owhé Islaeli tọn lẹpo po he tin to yé ṣẹnṣẹn.

¹¹ Dọ, yẹn wẹ ohia mitọn: taidi le yẹn ko wà do, mọwẹ yè na wà hlan mìdo: yé na biọ oyàndogbé mẹ yì, biọ mẹmẹglọ mẹ.

¹² Podọ ahọvi lọ he tin tó yé ṣẹnṣẹn na nọ hẹn to abò etọn ji to zinvlu mẹ, bo na jẹgbonu yì: yé na kùn adó lọ luntòn nado bẹ́ jẹgbonu gbọnfìnẹ: ewọ na ṣinyọn nukunmẹ etọn, na ewọ ma na yí nukun etọn lẹ do mọ aigba lọ wutu.

¹³ Yẹn na sọ dlẹn odò ṣie do e ji ga, ewọ na sọ yín wiwle to omọ ṣie mẹ: yẹn na sọ hẹn ewọ wá Babilọni je aigba Kaldeanu lẹ tọn ji; gãnṣo ewọ ma to na mọ ẹn, le ewọ na tlẹ kú to finẹ sọ.

¹⁴ Yẹn bo na sọ vúnvún hlan ojẹhọn lẹpo dali ehe tin lédo e lẹpo nado gọalọna ẹn, po awhànfuntọ etọn lẹpo po; yẹn na sọ dòn ohi lọ hodo yé.

¹⁵ Yé na sọ yọnẹn dọ yẹn wẹ OKLUNỌ, whenuena yẹn na kija yé do akọta lẹ ṣẹnṣẹn, bo sọ vúmún yé gbọn otò lẹ mẹ.

¹⁶ Ṣigba yẹn na jó omẹ pẹvi de sọn yé mẹ dai sọn ohi lọ si, sọn ohùvé lọ si, podọ sọn azònylankan lọ si; na yé nido nọ lá osùnú yetọn lẹ to akọta lẹ ṣẹnṣẹn to fiedali yé wá; yé na sọ yọnẹn dọ yẹn wẹ OKLUNỌ.

¹⁷ Humọ ohó OKLUNỌ tọn sọ wá dẽ dọmọ,

¹⁸ Visunnu gbẹtọ tọn, yí sisọpàpà do dù akla towe, bo so yí sìsọsisọ po awuhihò po do nù osìn towe;

¹⁹ bo sọ dọ hlan omẹ aigba lọ ton lẹ dọ, Le wẹ OKLUNỌ JIWHEYẸWHE dọ gbọn tòmenu Jelusalẹm tọn lẹ tọn, po aigba Islaeli ton po dali do: Yé na yí awuhihọ́ do dù akla yetọn, bo sọ yi awujiji do nù osìn yetọn, na aigba yetọn nido yín ojẹvó sọn ogigọ́ etọn mẹ, na huhlon yé he nọ nò e mẹ finẹ lẹpo tọn tọn wutu.

²⁰ Podọ tòdaho he mẹ yè ko nọnọ̀ lẹ na sọ yín ogbògbé, aigba lọ na sọ yín ovọ́jẹ de; mìwlẹ na sọ yọnẹn dọ yẹn wẹ OKLUNỌ.

²¹ Ohó OKLUNỌ tọn SỌ wá dẽ, dọmọ,

²² Visunnu gbẹtọ tọn, eté wẹ hówhinwhén he he mì tindo to aigba Islaeli tọn mẹ, dọmọ, Yè hẹn azán lẹ dite, númimọ lẹpo bo sọ gbọ̀vọ?

²³ Enẹwutu dọ na yé dọ, Le wẹ OKLUNỌ Jiwheyẹwhe dọ: Yẹn na hẹn hówhinwhén he nado doalọte, bọ yé ma na sọ zán ẹn di hówhinwhén de tó Islaeli mẹ gbède ba; ṣigba dọ hlan yé dọ, Azán le tin sẹpọ́, po ohó númimọ lẹpo tọn po.

²⁴ Na númimọ vọtọ po odose mẹkike tọn pọ depope ma na sọ tin to owhé Islaeli tọn hòmẹ gbède ba.

²⁵ Na yen wẹ OKLUNỌ; yẹn na dọhó, podọ ohó he yẹn na dọ na yín yíyíwà; é ma na sọ yín ogàdona ba gba: pa to azán mitọn lẹ mẹ, hiẹ owhé atẹsitọ È, wẹ yẹn na dọ ohó lọ, bo na sọ yí i basi, wẹ OKLUNỌ JIWHEYẸWHE dọ.

²⁶ Ohó OKLUNỌ tọn vọ wá dẽ, dọmọ́,

²⁷ Visunnu gbẹtọ tọn, dayi e go, yé owhe Islaeli tọn tọn lẹ to didọmọ, Númimọ he ewọ mọ tin na azán he ja, podọ ewọ dọdọdai ojlẹ he tin aganu boboe lẹ tọn.

²⁸ Enẹwutu dọ hlan ye dọ, Le wẹ OKLUNỌ JIWHEYẸWHE dọ: Ode sọn ohó ṣie lẹ mẹ ma na sọ yín ogádona depope ba gba, ṣigba ohó he yẹn na dọ na yín yíyíwà, wẹ OKLUNỌ JIWHEYẸWHE dọ.