EZEKIELI 10 - BIBLU WIWE LỌ 1923

¹ WHENẸNU wẹ yẹn pọ́n, bo dayi e go, to odòvlo he tin to ota kẹlubimi lọ tọn ji mẹ, finẹ sọawuhia to aga yé tọn di é yín zannu safile de, di awusọhia apajlẹ ofìn de tọn tọn.

² Ewọ sọ dọhó hlan dawe yè yí, alà do ṣinyọ̀navọ̀na lọ, bo dọmọ, Biọ kẹkẹfọ lilópó lẹ lọ ṣẹnṣẹn, yèdọ to kẹlubi lọ glọ, bo yí akán miyọn tọn lẹ sọn kẹlubimi lẹ lọ ṣẹnṣẹn do gó alọ towe awelẹ, bo mì yé do tòdaho lọ ta. Ewọ sọ biọ hòmẹ yì to nukun ṣie mẹ

³ Dinvie kẹlubimi lẹ lọ site to adà adusi ohò lọ tọn ji, whenuena dawe lọ yì hòmẹ; aslọ sọ gọ awánu hòmenukọn tọn lọ mẹ.

⁴ Gigo OKLUNỌ tọn so hẹji sọn kẹlubi lọ de yìaga, bo site to hòntonu ohò lọ tọn ta; yè sọ hẹn ohọ̀ lọ gọ na aslọ lọ, podọ awánu lọ sọ tin gọ́ na osisé gigo OKLUNỌ tọn tọn.

⁵ Podọ hùnhlungbè awà kẹlubimi lẹ lọ tọn lẹ sọ yín sisè yèdọ jẹ awánu gbonunukọn tọn lọ mẹ, di ogbè Jiwheyẹwhe Ganhunupo tọn whenuena é to hódọ.

⁶ E sọ wá jọ, whenuena é degbèna dawe yèyi alà do ṣinyọ̀navọ̀na lọ, dọmọ, Yí miyọn sọn kẹkẹfọ lilépó lẹ lọ ṣẹnṣẹn, sọn kẹlubimi lẹ lọ ṣẹnṣẹn, wẹ ewọ yì họmẹ, bo sọ site to kẹkẹfọ de dali.

⁷ Kẹlubi lọ sọ dlẹn alọ etọn jẹgbonu sọn kẹlubimi lẹ lọ ṣẹnṣẹn hlan miyọn he tin to kẹlubimi lẹ lọ ṣẹnṣẹn, bo yí sọn e mẹ, bo sọ yí i do alọ ewọ he yè yí alà ṣinyọnna tọn lẹ mẹ, mẹhe yí i bo sọ tón yì.

⁸ Ojlẹmọ alọ gbẹtọ de tọn sọawuhia finẹ to kẹlubimi lẹ lọ mẹ to awà etọn lẹ glọ.

⁹ Yẹn sọ pọ́n, bo dayi e go, kẹkẹfọ ẹnẹ to kẹlubimi lẹ lọ dali, kẹkẹfọ to kẹlubi dopo dali, podọ kẹkẹfọ dẽvo to kẹlubi dẽvo dali: podọ awusọhia kẹkẹfọ lẹ lọ tọn tin di whèkan zannu Talsisi tọn de.

¹⁰ Podọ na awusọhia yetọn tọn, yé ẹnẹ lẹ tindo apajlẹ doponẹ, di eyín kẹkẹfọ de ko tin to gblagbla kẹkẹfọ de tọn mẹ.

¹¹ Whenuena yé to yìyì yé nọ to yìyì hlan adà yetọn ẹnẹ lẹ dali: yé ma lé le yé to yìyì gba, ṣigba otẹn fiedali ota pọn hlan yé nọ hodo e; yé ma lẹ́ le yé to yìyì gba.

¹² Agbasa yetọn pete, po nẹgbó yetọn lẹ po, po alọ yetọn lẹ po, po awà yetọn lẹ po, po kẹkẹfọ lẹ po, tin gọ́ na nukun lẹ lẹ́do pé, yèdọ kẹkẹfọ lẹ he yé ẹnẹ lẹ tindo.

¹³ Na kẹkefo lẹ lọ tọn, yè ylọ yé to sisè ṣie mẹ dọ kẹkẹfọ lilépé lẹ.

¹⁴ Podọ dopodopo tindo nukunmẹ ẹnẹẹnẹ; nukunmẹ tintan wẹ nukunmẹ kẹlubi tọn, nukunmẹ awetọ wẹ nukunmẹ gbẹtọ de tọn, podọ atóntọ nukunmẹ kinnikinni de tọn, podọ ẹnẹtọ nukunmẹ akùn de tọn.

¹⁵ Kẹlubimi lẹ lọ sọ hẹji yìaga; ehe wẹ núdida gbète lọ he yẹn mọ to otò Kebali dali.

¹⁶ Podọ whenuena kẹlubimi lẹ lọ yì, kẹkẹfọ lẹ lọ to yìyì to yé dali: podọ whenuena kẹlubimi lẹ lọ zé awà yetọn lẹ daga nado hẹji son aigba yìaga, kẹkẹfọ lẹ ga ma lé son yé dali gba.

¹⁷ Whenuena ye nọte, ehelẹ nọte; podọ whenuena yé hẹji yìaga, eheiẹ hẹji yìaga po yé po: na gbigbọ ogbó tọn tin to yé mẹ.

¹⁸ Gigo OKLUNỌ ton sọ jẹgbonu yì sọn hòntònu ohò OKLUNỌ tọn ta, bo nọte to kẹlubimi lẹ lọ ta.

¹⁹ Kẹlubimi lẹ lọ sọ zé awà yetọn lẹ daga, bo hẹji sọn aigba yìaga to nukun ṣie mẹ whenuena yé jẹgbonu yì, po kekẹfọ lẹ lọ po to yé ta gẽ: yé sọ site to ohọ̀n họ̀ngbo whèzẹtẹn tọn ohọ̀ OKLUNỌ tọn lọ tọn ji; bọ gigo Jiwheyẹwhe Islaeli tọn ton sọ tin to yé ta aga

²⁰ Ehe we núdida gbẹ̀te he yẹn mọ to Jiwheyẹwhe Islaeli tọn glọ to otò Kebali dali, yẹn sọ yọnẹn dọ kelubimi lẹ wẹ yé.

²¹ Omẹ dopodopo tindo nukunmẹ ẹnẹ dovõvo, podọ omẹ dopodopo tindo awà ẹne; podọ apajlẹ alọ gbẹtọ de tọn tin to awà yetọn lẹ glọ.

²² Podọ na apajlẹ nukunme yetọn le tọn, yé wẹ nukunmẹ he yẹn mọ to otọ Kebali dali, awusọhia yetọn lẹ po yélọsu po; yé omẹ dopodopo to yìyì to titegbè gẽ.