EZEKIELI 1 - BIBLU WIWE LỌ 1923

¹ DINVIE é sọ wá jọ to owhè ogbàntọ mẹ, to osùn ẹnẹtọ mẹ, to azán atóntọ osùn lọ tọn mẹ, le yẹn tin to mẹmẹglọ ṣẹnṣẹn to otò Kẹbali dali, wẹ yè hùn olọn lẹ, yẹn sọ mọ númimọ Jiwheyẹwhe tọn lẹ.

² To azán atóntọ osùn lọ tọn mẹ, he yìn owhè atọ̀ntọ mẹmẹglọ ahọlu Jehọiakini tọn tọn,

³ ohó OKLUNỌ tọn gbọntitegbe wá jẹ Ezeklẹli yẹwhenọ lọ de, visunnu Buzi tọn, to aigba Kaldeanu lẹ tọn mẹ to otò Kẹbali dali; podọ alọ OKLUNỌ tọn sọ tin finẹ to e ji.

⁴ Podọ yẹn pọ́n, bo, dayi e go, oyú jẹhọn de sọn agéwaji wá, aslọ daho de, po miyọn he hùnhùn bilabila de po, po sisé de po lédo e pé, podọ sọn ogblagbla etọn mẹ di ambeli nado dèkọpọn, sọn ogblagbla miyọn lọ tọn mẹ.

⁵ Podọ sọn ogblagbla etọn mẹ wẹ apajlẹ núdida gbète ẹnẹ tọn sọn wá. Ehe sọ wẹ awusọhia yetọn; yé tindo apajle gbẹtọ de tọn.

⁶ Podọ omẹ dopodopo tindo nukunmẹ ẹnẹ, omẹ dọpodopo yé tọn sọ tindo awà ẹnẹ.

⁷ Afọ yetọn lẹ sọ yín afọ he jlọwhete lẹ; afọpàhomẹ afọ yetọn lẹ tọn tlii taidi afọpàhomẹ afọ oyìnvú de tọn: yé sọ to siségbà taidi whẹkàn ogànvẹ̃ yè hẹn sẹ́ tọn.

⁸ Yé sọ tindo alọ gbẹtọ de tọn lẹ to awà yetọn lẹ glọ to adà yetọn ẹnẹ lẹ go: yé omẹ ẹnẹ lẹ sọ tindo nukunmẹ yetọn lẹ po awà yetọn lẹ po do le;

⁹ yè pé awà yetọn le dopọ ode do ode go; yé ma lẹ́ whenuena yé to yìyì gba; yé to yìyl omẹ dopodopo to titegbe gẽ.

¹⁰ Na apajlẹ nukunmẹ yetọn lẹ tọn, yé tindo nukunmẹ gbẹtọ de tọn; podọ yé omẹ ẹnẹ lẹ tindó nukunmẹ kinnikinni de tọn to adà adusi ji; podọ yé omẹ ẹnẹ lẹ sọ tindo nukunmẹ oyín de tọn to adà amiyọn ji; yé omẹ ẹnẹ lẹ sọ tindo nukunmẹ akùn de tọn ga.

¹¹ Podọ le wẹ nukunmẹ yetọn lẹ te; awà yetọn lẹ yín kinklan to aga; yè pé awà awe omẹ dopodopo tọn ode do ode go, podọ awe ṣinyọn agbasa yetọn lẹ.

¹² Yé sọ to yìyì omẹ dopodopo to titegbe gẽ: fiedali gbigbọ lọ tin nado yì, wẹ yé yìyì; yé ma lẹ́ whenuena yé to yìyì gba.

¹³ Podọ na apajlẹ núdida gbète lẹ lọ tọn, àwusọhia yetọn tin di akán jiji miyọn tọn lẹ, taidi awusọhia ozòwhán lẹ tọn; é to aga po odò po yì to núdida gbẹ̀te ẹnẹ lẹ ṣẹnṣẹn: podọ miyọn lọ sọ yín sisẹ́, podọ miyọn lọ mẹ wẹ abi jẹgbonu yì sọn.

¹⁴ Podọ núdida gbẹ̀te lẹ lọ to wèzundo bo sọ to lilẹ́gò di awusọhia didè abi tọn de.

¹⁵ Dinvie le yẹn to núdida gbète lẹ lọ pọ́n, dayi e go, kẹkẹfọ dopo to aigba ji to núdida gbẹ̀te lẹ lọ dali, na dopodopo nukunmẹ ẹnẹ etọn lẹ tọn.

¹⁶ Awusọhia kẹkẹfọ lẹ lọ tọn po azón yetọn po tin jijlẹ do owhèkàn belili de tọn go: podọ yé omẹ ẹnẹ lẹ tindo apajlẹ dopo: podọ awusọhia yetọn po azọ́n yetọn po tin di é yín kẹkẹfọ de to gblagbla kẹkẹfọ de tọn mẹ.

¹⁷ Whenuena yé to yìyì, yé to yìyì to adà yetọn ẹnẹ lẹ ji: yé ma ló whenuena yé to yìyì gba.

¹⁸ Na okòkle yetọn lẹ tọn, yé tin yìji bo dobu; podọ yé omẹ ẹnẹ lẹ tindo okòkle yetọn lẹ gọ́ na nukun lẹ lédo pé.

¹⁹ Whenuena núdida gbẹte lẹ lọ to yìyì, kẹkẹfọ lẹ lọ sọ to yìyì to adà yetọn mẹ: podọ whenuena núdida gbète lẹ lọ yín zizé daga sọn aigba, kẹkẹfọ lẹ lọ sọ yín zizé daga.

²⁰ Fidepopedali gbigbọ lọ tin nado yì, yé nọ yì; fìnẹdali wẹ gbigbọ lọ tin nado yì: podọ kẹkẹfọ lẹ lọ sọ nọ yín zizé daga to yé ji; na gbigbọ ogbẹ̀ nudida gbẹ̀te lọ tọn tin to kẹkẹfọ lẹ lọ mẹ.

²¹ Whenuena enẹlẹ yìyì, ehelẹ yìyì; podọ whenuena enẹlẹ site, ehelẹ site; podọ whenuena yè zé enẹlẹ daga sọn aigba, kẹkẹfọ lẹ yín zizé daga to yé ji: na gbigbọ ogbẹ̀ núdida gbẹ̀te lọ tọn tin to kẹkẹfọ lẹ lọ mẹ.

²² Podọ to ota núdida gbẹ̀te lọ tọn wẹ apajlẹ dovlomẹ de tọn te, taidi owhèkan osìhago he dobu tọn, he dlẹn jẹgbonu to ota yetọn lẹ to aga.

²³ Podọ to dovlomẹ lọ glọ wẹ awà yetọn lẹ te titegbe, ode hlan ode dali: omẹ dopodopo tindo awe he sinyọn adà he ji, podọ omẹ dopodopo sọ tindo awe hé ẹinyọn adà nẹ ji, agbasa yetọn lẹ.

²⁴ Podọ whenuena yé to yìyì, yẹn sè hùnhlungbè awà yetọn lẹ tọn taidi hùnhlungbè osìn daho le tọn, taidi ogbè Ganhunupo tọn, hùnhlungbè zingidi tọn de taidi hùnhlungbè awhànpa de tọn: whenuena yé site, yé jó awà yetọn lẹ do odò.

²⁵ Ogbè de sọ tin to dovlomẹ lọ ji aga he tin to ota yetọn lẹ: whenuena yé site, yé jó awà yetọn lẹ do odò.

²⁶ Podọ to dovlomẹ lọ to aga he tin to ota yeton lẹ wẹ apajlẹ ofìn de tọn te, di awusọhia ozannu sapfile de tọn: podọ to apajlẹ ofìn lọ tọn ji wẹ apajlẹ de te di awusọhia gbẹtọ de tọn to e ji aga.

²⁷ Yẹn bọ mọ di owhẹ̀kan ambeli tọn, di awusọhia miyọn tọn to e homẹ lẹ́do pé, sọn awusọhia adaja etọn tọn mẹ podọ hlanaga; podọ sọn awusọhia adaja etọn tọn mẹ podọ hlandò yẹn mọ di é yín awusọhia miyọn tọn, osisẹ́ sọ tin finẹ lédọ e pe.

²⁸ Di awusọhia ayídowhẹdo tọn he tin to aslọ mẹ to azán ojikun tọn mẹ, mọwẹ awusohia osisé lọ tọn te lẹ́do pé. Ehe wẹ awusọhia apajlẹ sọn gigo OKLUNỌ tọn lọ tọn mẹ. Podọ whenuena yẹn mọ ẹn, yẹn jai to nukunmẹ ṣie ji, podọ yẹn sọ sè ogbè omẹ de tọn he to hódọ.