Eksọdusi 13 - BIBLU WIWE LỌ 19231 OKLUNỌ sọ dọhó hlan Moṣe, dọmọ, 2 Klán plọnji lẹpo do wiwé hlan mi, núdepope he hùn adò to ovi Islaeli tọn lẹ ṣẹnṣẹn, gbẹtọ tọn po kanlin tọn po: ṣie wẹ. 3 Moṣe sọ dọ hlan gbẹtọ lẹ, dọ, Flin azán he, ehe mẹ mì tón sọn Egipti te, sọn owhé mẹglọnọ tọn gbè; na gbọn huhlọn alọ ton dali wẹ OKLUNỌ hẹn mì tẹ́n sọn aigba he ji: yè ma na dù akla otónnọ de. 4 Azán he gbè wẹ mì tọ́nyì to osùn Ábibi mẹ. 5 E na sọ yín whenuena OKLUNỌ na hẹn mì biọ aigba Kenaninu tọn, Hitinu tọn, po Amolinu tọn po, po Hivinu tọn po, po Jẹbusinu tọn po ji, ehe é whlé hlan otọ́ mìtọn lẹ nado na we, aigba de he yí anọsìn po owín po do to sisá, dọ hiẹ na nọ pọ́n sinsẹ́n he go to osùn he mẹ. 6 Azán ṣinawe mì na do dù akla madotọn, azán sinawetọ gbè na yín hùnwhẹ de hlan OKLUNỌ. 7 Akla madotón wẹ yè na dù hò azán ṣinawe lọ; yè ma na mọ akla otónnọ de to de we, mọ yè ma na mọ otọ́n de to de we to agbègbè towe lẹpo mẹ. 8 Hiẹ na sọ dọ na visunnu towe to azán nẹ gbè, dọ, Na enẹ tọn he OKLUNỌ wà na mi whenuena yen tón wá yì sọn Egipti wutu we. 9 E na sọ yín na ohia de hlan we to alọ towe go, podọ na oflin de to nukun towe lẹ ṣẹnṣẹn, dọ osén OKLUNỌ tọn nido tin to onù towe mẹ; na alọ huhlọnnọ we OKLUNỌ do hẹn we tón sọn Egipti. 10 Enẹwutu hiẹ na nọ payi oséndoai he go to owhè etọn nù to whèmẹ whème. 11 E na sọ yín whenuena OKLUNỌ na hen we hó aigba Kenaninu tọn ji dile e whlé hlan we do podọ hlan otọ́ towe lẹ, bo na na ẹn we, 12 dọ hiẹ na dè do ola hlan OKLUNỌ ehe hùn adò lẹpo, po plọnji lepo po he hiẹ tindo he sọn kanlin de me wá; asú lẹ na yín OKLUNỌ ton 13 Plonji kẹtẹkẹte tọn lẹpo hiẹ na yí lengbọvú dopo do fli; eyín hiẹ ma na fli i, whenẹnu hiẹ na wén okò etọn: plọnji gbẹtọ tọn lẹpo to visunnu towe lẹ ṣẹnṣẹn we hie na fli. 14 E na sọ yín whenuena visunnu towe kanbiọ we to ojle he ja mẹ, dọ, Eté wẹ ehe? wẹ hiẹ na dọ hlan ẹn, dọ, Gbọn huhlọn alọ tọn dali wẹ OKLUNỌ do hẹn mí tón sọn Egipti, sọn owhé mẹglọnọ tọn gbè: 15 é sọ wá jọ, whenuena é ma bọawu na Falo nado gbọ mí ni yì, wẹ OKLUNỌ hù plọnji lẹpo to aigba Egipti tọn ji, plọnji gbẹtọ tọn po plọnji kanlin tọn po: enẹwutu wẹ yẹn yí do sánvọ́ hlan OKLUNỌ ehe hùn adò lẹpo, bo yín asu; ṣigba plọnji visunnu ṣie lẹ tọn lẹpo wẹ yẹn fli. 16 E na sọ yín na ohia de to alọ towe go, podọ na nukunmẹblanú lẹ de to nukun towe lẹ ṣẹnṣẹn: na gbon huhlọn alọ tọn dali wẹ OKLUNỌ do hẹn mí tón sọn Egipti. 17 E sọ wá jọ, whenuena Falo ko gbọ gbẹtọ ewlẹ yì, wẹ Jiwheyẹwhe ma plan yé gbọn aliho aigba Filistinu lẹ tọn tọn ji gba, na le é sẹpọ́ sọ; na Jiwheyẹwhe dọmọ, Eya gbẹtọ ewlẹ nikã diọ whenuena yé mọ awhàn, bo lẹ́gọ̀ do Egipti: 18 ṣigba Jiwheyẹwhe plan yè pé gbọn aliho zùngbo tọn dali gbọn Ohù Vẹ̃ mẹ: ovi Islaeli tọn lẹ hẹ́ji yì sọn aigba Egipti tọn ji to gbaja mẹ. 19 Moṣe sọ zé ohú Josefu tọn lẹ hẹn yì po e po: na é ko hẹn ovi Islaeli tọn lẹ whlé titegbe, dọ, Jiwheyẹwhe na dla mì pọ́n nugbonugbo; míwlẹ na sọ hẹn ohú ṣie lẹ hẹ́ji sọnfi yì po mì po. 20 Yé sọ yí gbedopozọnlin yeton sọn Sukkoti, bo whesla do Etami, to agbègbè zùngbo tọn. 21 OKLUNỌ sọ to ylyì to nukọn na yé to okle to dòtin aslọ tọn de mẹ, nado do aliho hia yé; podo to ozan mẹ to dòtin miyọn ton de me, nado na hinhọ́n yé; na yé nido to yìyì to okle po ozán po; 22 Dòtin aslọ tọn to okle, dòtin miyọn ton to ozán mẹ, ma yì sọn nukọn gbẹtọ ewlẹ tọn gba. |
Holy Bible in Gun-Alada © Bible Society of Benin and Bible Society of Nigeria, 1923.
Bible Society of Nigeria