Deutelonomi 9 - BIBLU WIWE LỌ 1923

¹ ISLAELI È, he tin nado juyì Jọdani gododọ̃n to egbe he nado yì hòmẹ nado yí akọta kiklohu podọ hlọnhlọnnọhu gan hilọsu, todaho kiklo podọ he yè dodòkọ́na jẹ olọn,

² gbẹtọ kiklo podọ he tọ́nalun lẹ de, visunnu Anakimi tọn lẹ lọ, mẹhe hiẹ yọnẹn, podọ mehe tọn hiẹ ko sè dọ, Mẹnu wẹ sogan nọte to visunnu Anaki ton lẹ lọ nukọn?

³ Enewutu yọnẹn to egbé he, dọ OKLUNỌ lọ Jiwheyẹwhe towe wẹ ewọ hè jei gododọ̃n to nukọn towe di miyọn dusúdo de; ewọ na và yé, é bo nasọ hẹn yé yì odò to nukọn towe: mowẹ hiẹ na yàn yé jẹgbonu, bo sọ hẹn yé dọ̀n plaun, dile OKLUNỌ lọ dọhó hlan we do.

⁴ A dọ to ayiha towe mẹ blo, to godo he OKLUNỌ lọ Jiwheyẹwhe towe ko tùn yé jẹgbonu sọn nukọn towe, dọmọ, Na dódó ṣie wẹ OKLUNỌ lọ ko do hẹn mi wá hòmẹ nado tindo aigba he: yídomọ na kanyinylan akọta nẹlẹ tọn wẹ OKLUNỌ lọ do yàn yé jẹgbonu to nukọn towe.

⁵ E ma yín na dódó towe gba, kavi na pipé ayiha towe tọn, wẹ hiẹ do yì hòmẹ nado yí aigba lọ gba ṣigba na kanyinylan akọta helẹ tọn wẹ OKLUNỌ lọ Jiwheyẹwhe towe do yàn yé jẹgbonu sọn nukọn towe, podọ na é nido hẹn ohó he OKLUNỌ lọ whle hlan otọ́ towe lẹ lódo, hlan Ablaham, hlan Isaki, podọ hlan Jakob.

⁶ Enẹwutu yọnẹn, dọ OKLUNỌ Jiwheyẹwhe towe ma na aigba dagbe he we nado tindo e na dódó towe gba; na gbẹtọ kọsinsinyẹnnọ de wẹ hiẹ.

⁷ Hiẹ wọ̀n blo, flin, le hiẹ hẹnhomẹgblena OKLUNỌ lọ Jiwheyẹwhe towe jẹ fifiẹ mẹ to zùngbo lọ mẹ do: sọn azán he gbè hiẹ jẹgbonu yì sọn aigba Egipti tọn lọ ji, kaka mì do wá jẹ otẹn he mẹ, mìlẹ ko to atẹsitọ yín do OKLUNỌ lọ go.

⁸ To Holebi mẹ ga mìlẹ hẹnhomẹgblena OKLUNỌ lọ jẹ fifiẹ mẹ, OKLUNỌ lọ sọ yín adinọ do mì go na ko do và mì.

⁹ Whenuena yẹn hẹji yì jẹ osé lọ mẹ nado yí tafo awe zannu tọn lẹ lọ, yèdọ tafo alènu lọ tọn lẹ he OKLUNỌ lọ basi po mì po, whenẹnu yẹn nọ̀ osé lọ mẹ okle kande po azán kande po; yẹn ma dù akla mọ yẹn ma sọ nù osìn.

¹⁰ OKLUNỌ lọ sọ jó tafo awe zannu tọn lẹ lọ hlan mi he yè yí alọviyẹyẹ Jiwheyẹwhe tọn do wlan; yè bo sọ wlan do yé go kẹdẹdi ohó he lẹ pó, he OKLUNỌ lọ dọ hẹ mì to osé lọ mẹ sọn gblagbla miyọn lọ tọn mẹ to azán agùnpipli lọ tọn mẹ.

¹¹ E sọ wá jọ to opòdo okle kande po ozán kande lọ tọn po, wẹ OKLUNỌ lọ yí tafo zannu ton awe lẹ na mi, yèdọ tafo alènu lọ tọn lẹ.

¹² OKLUNỌ lọ sọ dọ hlan mi dọmọ, Tite, jẹte yì plaun sọn fiyì; na omẹ towe lẹ he hiẹ ko hẹn jẹgbonu sọn Egipti mẹ wá ko hẹn yéde gble; yè ko hẹn yé lẹ́ jẹla plaun sọn aliho he yẹn degbèna yé ji; yé ko basi oboṣiọ kinkọ̀n de na yéde.

¹³ Huganmọ OKLUNỌ lọ dohó hlan mi, dọmọ, Yẹn ko mọ omẹ he lẹ, bo, dayi e go, gbẹtọ kòsinsinyẹnnọ de wẹ:

¹⁴ ágò na mi, na yẹn nido và yé, bo gbidi oyín yetọn sọn olọn glọ, yẹn bo nasọ basi akọta de sọn hiẹ mẹ hlọnhlọnnọhu pọdọ kiklohu gan yéwlẹ.

¹⁵ Mowẹ yẹn lẹ bo jẹte sọn osé lọ ji wá, osé lọ bo sọ yí miyọn do to jiji: tafo awe alẹ̀nu lọ tọn lẹ sọ tin to alọ ṣiẹ awe lẹ mẹ.

¹⁶ Yẹn bo sọ pọ́n, bo, dayi e go, mìlẹ ko wàylando do OKLUNỌ lọ Jiwheyẹwhe mìtọn go; mì ko basi oyìnvú kinkọ̀n de na mìde: mìlẹ ko lẹ́ jẹla plaun sọn aliho he OKLUNỌ lọ de gbèna mì lọ ji,

¹⁷ Yẹn bo sọ hẹn tafo awe lẹ lọ go, bo fọ̀ yé dlan sọn alọ ṣie awe lẹ mẹ, bo gbà yé to nukun yetọn lẹ nukọn.

¹⁸ Yẹn bo sọ họ́ jai to OKLUNỌ lọ nukọn, di tintan lọ tọn, okle kande po ozán kande po j yẹn ma dù akla mọ yẹn ma nù osìn; na ylando mìtọn ehe mì do wàylando lẹpo tọn wutu, to wiwà mẹ enẹ he yín oylan to nukun OKLUNỌ lọ tọn mẹ nado hẹnhomẹgble e jẹ adi mẹ.

¹⁹ Na yẹn yín avosatọ adi lọ po homẹmahùn miyọnawu lọ tọn po, ehe OKLUNỌ lọ do yín homẹgblenọ do mì go nado và mì. Ṣigba OKLUNỌ lọ tùntóai hlan mi to ojlẹ nẹ mẹ ga.

²⁰ OKLUNỌ lọ bo sọ yín adinọ do Aalọn go nado ko và ẹ: Yẹn sọ hodẹ́ na Aalọn to ojlẹ dopolọ mẹ ga.

²¹ Yẹn sọ yí ylando mìtọn, oyìnvú he mì ko basi lọ, bo yí miyọn do fiọ ẹ, bo tùn in, bo li i mẹ́, kaka é do tin taidi kọgudú: yẹn sọ bẹ́ kọgudú etọn lọ dlan jẹ otán lọ mẹ he to tejẹ sọn osé lọ mẹ.

²² Podọ to Tabela, podọ to Massa, podọ to Kibloti-hataava, mì hẹnhomegble OKLUNỌ lọ jẹ fifiẹ mẹ.

²³ Podọ whenuena OKLUNỌ lọ do mì hlan sọn Kadesi-balnea mẹ, dọmọ, Mì hẹji yì bo yí aigba he yẹn ko na mì lọ; whenẹnu mìlẹ sọ ṣiatẹ do gbèdide OKLUNỌ lọ Jiwheyẹwhe mìtọn tọn go, mìlẹ ma sọ yi i se, kavi tùntóai hlan ogbè etọn gba.

²⁴ Mìlẹ ko yín atẹṣitọ do OKLUNỌ lọ go sọn azán he gbè yẹn yón mì.

²⁵ Mowẹ yẹn họ́ jai to OKLUNỌ lọ nukọn okle kande po ozán kande po wẹ yẹn do hó jai; na OKLUNỌ lọ ko dọ é na và mì wutu.

²⁶ Yẹn bo sọ hodè hlan OKLUNỌ lọ, bo dọmọ OKLUNỌ E Jiwheyẹwhe, a và omẹ towe lẹ podọ ogú towe blo, he hiẹ ko fli gbọn kiklo towe mẹ, he hiẹ ko hẹn jẹgbonu sọn Egipti mẹ wá po alọ hlọnhlọnnọ de po.

²⁷ Flin devi towe le, Ablaham, Isaki, po Jakob po; a pọ́n hlan adingbàndido omẹ he lẹ tọn dali blo, kavi hlan kanyinylan yetọn dali kavi hlan lando yetọn dali blo:

²⁸ aigba lọ fie hiẹ hẹn mí jẹgbonu sọn wá nikã dọmọ, Na OKLUNỌ lọ ma tin sọgan nado hẹn yé jẹ aigba he é gblọnadanna yé lọ mẹ wutu, podọ na é gbẹwanna yé wutu, é hẹn yé jẹgbonu wá nado hù yé to zùngbo lọ mẹ.

²⁹ Gãnṣo omẹ towe lẹ wẹ yé podọ ogú towe he hiẹ hẹn jẹgbonu wá, gbọn huhlọn daho towe dali podọ gbọn awà dindlẹn jẹgbonu towe dali.