Deutelonomi 8 - BIBLU WIWE LỌ 1923

¹ GBÈDIDE lọ lẹpo he yẹn degbèna we to egbé he wẹ mìlẹ na nọ payiha nado nọ basi, na mìlẹ nido nọgbè, bo sudeji, bo yì họmẹ bo yí aigba lọ he OKLUNỌ lọ whle hlan otọ́ mìtọn lẹ.

² Hiẹ nasọ nọ flin aliho he OKLUNỌ lọ Jiwheyẹwhe towe ko hẹn we gbọn lẹpo to owhè kande helẹ mẹ to zùngbo lọ mẹ, na é nido hòhuwhẹ we, nado tén we pọn, nado yọn núhe tin to ayiha towe mẹ, eyín hiẹ na payi gbèdide etọn lẹ go, kavi lala.

³ E sọ hòhuwhẹ we, bo hẹn húvé hù we, bo sọ yí mana do yìn we, he hiẹ ma yọnẹn, mọ otọ towe lẹ ma yọnẹn gba; na é nidọ hẹn we yọnen dọ gbẹtọ ma togbẹ̀ gbọn núdùdù kẹdẹ dali gba, ṣigba gbọn onú dopodopo he tọnsọn onù OKLUNỌ lọ tọn mẹ jẹgbonu dali wẹ gbẹtọ togbẹ̀ te.

⁴ Avọ̀ towe ma dohó to ogo we, mọ afọ towe ma ji, to owhè kande helẹ mẹ gba.

⁵ Hiẹ nasọ yílẹn to ayiha towe mẹ, dọ, dile omẹ de nọ wọhẹ visunnu etọn do, mọwẹ OKLUNỌ lọ Jiwheyẹwhe towe wọhẹ we do.

⁶ Hiẹ bo na payi gbèdide OKLUNỌ lọ Jiwheyẹwhe towe tọn lẹ lọ go, nado nọ zinzọnlin to ali etọn lẹ ji, podọ nado nọ dibusi i.

⁷ Na OKLUNỌ lọ Jiwheyẹwhe towe hẹn we wá jẹ aigba dagbe lọ ji, aigba otán osìn tọn lẹ de, asisà lẹ tọn po osédo lẹ po hẹ to sisà jẹgbon jẹ agbadò lẹ mẹ po okọta lẹ po;

⁸ aigba oli tọn de po bale po, po ovẹ̃ntin lẹ po po ovotin lẹ po po pomeglanate lẹ po; aigba amì olivieli tọn lẹ de po owin po;

⁹ aigba de hemẹ hiẹ na dù núdùdù te matin núdìndon, hiẹ ma na bà onú de pò to e mẹ gba, aigba de zannu ehetọn lẹ yín ogànyu, podọ sọn okọta ehetọn lẹ mẹ hiẹ sọgan kùn ogànvẹ̃ te.

¹⁰ Hiẹ na dù bo sọ yín gigọ́, hiẹ bo nasọ dona OKLUNỌ lọ Jiwheyẹwhe towe na aigba dagbe lọ he é ko na we.

¹¹ Payiha hiẹ nikã wọ̀n OKLUNỌ lọ Jiwheyẹwhe towe, to gbèdide etọn lọ ma yìn mẹ, po whẹ̀dida etọn lẹ po, po aṣẹdai etọn lẹ po, he yẹn degbèna we to egbé he:

¹² hiẹ nikã ko dù bo sọ yín gigọ́, bo ko dó ohò dagbedagbe lẹ, bo nọnọ̀ e mẹ;

¹³ podọ whenuena kanlinpó towe lẹ po kanlinpá towe lẹ po sùdeji, bọ yè sọ hẹn fataka towe po sika towe po sùdeji, bọ yè sọ hẹn ehe hiẹ tindo lẹpo sùdeji;

¹⁴ whenẹnu bọ ayiha towe yín zizé daga, bọ hiẹ won OKLUNỌ lọ Jiwheyẹwhe towe, he hẹn we jẹgbonu sọn aigba Egipti tọn lọ ji wá, sọn owhé afànume lọ tọn gbè;

¹⁵ mẹhe plan we gbọn zùngbo kiklo podọ he dobu lọ mẹ luntọ́n, fiemẹ odàn miyọnnọ lẹ te po aklekle lẹ po, podọ aigba nugblanọ fie osìn de ma tin te; mẹhe hẹn osìn jẹgbonu wá na we sọn osé okẹ́n tọn lọ mẹ;

¹⁶ mẹhe yí mana do yìn we to zùngbo lọ mẹ, he otọ́ towe lẹ ma yonẹn gba: na é nido hòhuwhẹ we, podọ na ewọ nido tén we pọn, nado wà dagbe na we to osọgodo towe:

¹⁷ hiẹ bo sọ dọ to ayiha towe me dọmọ, Huhlọn ṣie po hlọnhlọn alọ ṣie tọn po ko tindo adọkunnu he na mi.

¹⁸ Ṣigba hiẹ na nọ flin OKLUNỌ lọ Jiwheyẹwhe towe, na ewọ wẹ mẹhe na huhlọn we nado tindo adọkunnu; na é nido hẹn alọ́nu etọn he é whle hlan otọ́ towe lẹ lódo, dile é te to azán he gbè.

¹⁹ E nasọ yín, eyín hiẹ wọ̀n OKLUNỌ lọ Jiwheyẹwhe towe, bo sọ zinzọnlin hodo yẹwhe devo lẹ, bo sọ to yé sẹ́n, bo sọ to taliaina yé, Yẹn sàhẽlu do mì ji to egbé he dọ mì na dọn nugbonugbo.

²⁰ Di akọta lẹ lọ he OKLUNỌ lọ basi nado dọ̀n to mì nukọn, mọwe mìwlẹ na dọ̀n do; na mìwlẹ ma ko na tùntóai hlan ogbè OKLUNỌ lọ Jiwheyẹwhe mìtọn tọn lo wutu.