Deutelonomi 7 - BIBLU WIWE LỌ 1923

¹ WHENUENA OKLUNỌ lọ Jiwheyẹwhe towe na hẹn we wá jẹ aigba lọ mẹ fie hiẹ jei nado yi i, bo na dọn akọta sùsù sún sọn nukọn towe, Hitinu lọ, po Gilgasinu lọ po, po Amolinu lọ po, po Kananinu lọ po, po Pelizinu lọ po, po Hivitenu lọ po, po Jẹbusinu lọ po, akọta ṣinawe kiklohu podọ hlọnhlọnnọhu gán hiẹ;

² podọ whenuena OKLUNỌ lọ Jiwheyẹwhe towe na jó yé to nukọn towe, bọ hiẹ na hò yé; whenẹnu hiẹ na và ye gbidigbidi; hiẹ ma na basi alẹ́nu de po yé po gba, kavi do lẹblanu hia hlan yé gba;

³ mọ hiẹ ma na basi alọwle lẹ po yé po gba; hiẹ ma na yí viyọnnu towe na hlan visunnu etọn gba, kavi na yí viyọnnu etọn hlan visunnu towe gba.

⁴ Na ewọ na gò visunnu towe ṣe sọn hihodo mi mẹ, na yé nido nọ sẹ́n yẹwhe devo lẹ; mọwẹ yè na hẹn adi OKLUNỌ lọ tọn jimiyọn do mì jì, ewọ bo nasọ và mì plaun.

⁵ Le wẹ mì na wà hẹ yé do; mì na họ́ agbà yetọn lẹ liai, bo sọ sán odòtin yetọn lẹ gidigidi, bo sọ hò vodunzùn yetọn lẹ liai, bo yí miyọn do mẹ́ oboṣiọ pipa yetọn lẹ.

⁶ Na omẹ wiwe lẹ de wẹ hiẹ hlan OKLUNỌ lọ Jiwheyẹwhe towe: OKLUNỌ lọ Jiwheyẹwhe towe ko dè we nado yín omẹ gbọnvò de hlan ede, sọn akọta he tin to nukunmẹ aigba ji tọn lẹpo mẹ.

⁷ OKLUNỌ lọ ma zé wanyi etọn do mì ji, kavi dè mì, na mì yín sùsù to osọha mẹ hugan gbẹtọ lẹ de wutu gba; na mì wẹ ovude talala sọn akọta lẹpo mẹ:

⁸ ṣigba na OKLUNỌ lọ yiwanna mì wutu wẹ, podọ na ewọ na do payi whiwhle lọ go he é whle hlan otọ́ mìtọn lẹ wutu wẹ, OKLUNỌ lọ do yi alọ hlọnhlọnnọ de do hẹn mì jẹgbonu wá, bo sọ fli mì sọn owhé afànumẹ tọn lọ gbè, sọn alọ Falo tọn mẹ ahọlu Egipti tọn lọ.

⁹ Enẹwutu yọnẹn dọ OKLUNỌ lọ Jiwheyẹwhe towe, ewọ wẹ Jiwheyẹwhe; Jiwheyẹwhe nugbonọ lọ, he nọ payi alẹ́nu po lẹblanu po go hẹ yé he yiwanna ẹn bo sọ ayipa gbèdide etọn lẹ go jẹ whẹndo lẹ fọtọ́n de;

¹⁰ bo sọ gọ̀ahọsu yé he gbẹwanna ẹn to nukun yetọn mẹ, nado và yé: ewọ ma na yín awugbọ̀pònọ hlan ewọ he gbẹwanna ẹn lọ de gba, é na gòahọsu i to nukun etọn mẹ.

¹¹ Enẹwutu hiẹ na nọ payi gbèdide lọ go, po asẹdai lẹ lọ po, po whẹ̀dida lẹ lọ po, he yẹn degbèna we to egbé he, nado nọ basi yé.

¹² E nasọ wá jọ, na mì tùntóai hlan whẹ̀dida helẹ wutu, bo sọ to ayihapa, nado nọ basi yé, wẹ OKLUNỌ lọ Jiwheyẹwhe towe na payiha alẹ́nu lọ go to de we po lẹblanu lọ po he é whle hlan otọ́ towe lẹ;

¹³ ewọ na yiwanna we, bo nọ dona we, bo hẹn we sùdeji: ewọ nasọ dona sinsẹ́n agbasa towe tọn ga po sinsẹ̀n aigba towe tọn po, gbadó towe po ovẹ̃n towe po po amì towe po, jideji oyin towe lẹ tọn po lẹngbọvi lẹngbọpa towe lẹ tọn po, to aigba lọ ji he ewọ whle hlan otọ towe lẹ nado na yé.

¹⁴ Hiẹ na yín donanọ hu akọta lẹpo: sunnu kavi yọnnu de ma na yín wẹ́nsinọ to mì ṣẹnṣẹn finẹ gba, kavi to kanlinyìnyìn mìtọn lẹ mẹ gba.

¹⁵ OKLUNỌ lọ na dè olànmẹzòn lẹpo sẹ́ sọn de we, é ma sọ to na yí awutuzọ̀n ylankan Egipti tọn lẹ de, he hiẹ yọnẹn, do oji we gba, ṣigba bo na yi yé do yé he gbẹwanna we lẹpo ji.

¹⁶ Hiẹ nasọ sukún akọta lọ lẹpo tọn do he OKLUNỌ lọ Jiwheyẹwhe towe na jó hlan we lẹ; nukun towe ma na blawuna yé gba: mọ hiẹ ma na sẹ́n yẹwhe yetọn lẹ gba; na ehe na yín omọ de hlan we.

¹⁷ Eyín hiẹ na dọ to ayiha towe mẹ dọmọ, Akọta helẹ tin hugan yẹn; nawẹ yẹn sọgan yàn ye jẹgbonu do?

¹⁸ Hiẹ ma na yín avosatọ na yé tọn gba: hiẹ na flin dagbedagbe núhe OKLUNỌ lọ Jiwheyẹwhe towe wà hlan Falo, podọ hlan Egipti lẹpo;

¹⁹ owhlepọ́n daho he nukun towe lẹ mọ, po ohia lẹ lọ pọ, po nujawu lẹ lọ po, po alọ hlọnhlọnnọ lọ po, po awà dindlẹn jẹgbonu lọ po, ehe dali OKLUNỌ lọ Jiwheyẹwhe hẹn we jẹgbonu wá; mọwẹ OKLUNỌ lọ Jiwheyẹwhe wà hlan akọta lọ lẹpo do, na mẹhe tọn hiẹ avosatọ yín.

²⁰ Humọ OKLUNỌ lọ Jiwheyẹwhe towe na do ogbón hlan yé ṣẹnṣẹn, kaka yé he yè pòdai lẹ, bo whla yéde sọn de we lẹ, dòn sọn nukọn towe.

²¹ Yè ma na hẹn we yín avosatọ na yé gba: na OKLUNỌ lọ Jiwheyẹwhe towe tin to gblagbla hiẹ tọn mẹ, Jiwheyẹwhe kiklo de podọ didobu de.

²² OKLUNỌ lọ Jiwheyẹwhe towe na tùn akọta nẹlẹ jẹgbonu to nukọn towe pẹpẹ: hiẹ ma sọgan sukún yé tọn do whladopo gba, okanlin nukanmẹ tọn lẹ lọ nikã jideji do oji we.

²³ Ṣigba OKLUNỌ lọ Jiwheyẹwhe towe na jó yé to nukọn towe, bo nasọ yí gbigbàdo daho de do gbà yé do, kaka yé do yín vivà.

²⁴ E na jó ahọlu yetọn lọ do alọ towe mẹ, hiẹ nasọ hẹn oyín yetọn nado dòn son olọn glọ: omẹ de ma na tin sọgan nado site to nukọn towe finẹ, kaka hiẹ ko do và yé.

²⁵ Boṣiọ pipa yẹwhe yetọn lẹ tọn lẹ wẹ hiẹ na yí miyọn do mé: hiẹ ma na donukunkẹndo fataka lọ kavi sika lọ go he tin to yé go gba, kavi yí i hlan dewe gba, hiẹ nikã yín mọdona to e mẹ: na osùnú de wẹ hlan OKLUNỌ lọ Jiwheyẹwhe towe:

²⁶ podọ hiẹ ma na hẹn osùnú de wá jẹ ohọ̀ towe mẹ, bo sọ lẹzùn onú klandovo jijlẹ do e go de: hiẹ na gbẹwanna en gbidigbidi, hiẹ bo nasọ hòwán ẹn gbidigbidi; na onú klandovo de wẹ.