Deutelonomi 6 - BIBLU WIWE LỌ 1923

¹ DINVIE ehe wẹ gbèdide lọ, asẹdai lẹ lọ, po whẹ̀dida lo po, he OKLUNỌ lọ Jiwheyẹwhe mitọn degbèna nado nọ plọn mi, na mì nido nọ basi yé to aigba lọ ji fiedali mi jei gododọ̃n nado yí i na nútindo:

² na hiẹ nido nọ dibusi OKLUNỌ lọ Jiwheyẹwhe towe, nado nọ payi aṣẹdai etọn lẹpo go po gbèdide etọn lẹ po, he yẹn degbèna we, hiẹ, po visunnu towe po, po visunnu visunnu towe tọn po to azán ogbẹ̀ towe tọn lẹpo mẹ; podọ na azán towe nido yín hinnẹndẹn.

³ Enẹwutu sè, Islaeli È, bo nọ payi nado basi i; na é nido yín dagbe to de we, podọ na mi nido sudeji talalá, dile OKLUNỌ lọ, Jiwheyẹwhe otọ́ towe lẹ tọn lọ ko gblọnadan hlan we do, to aigba he yí oyìnnọ́ po owín po do to sisà lọ mẹ.

⁴ Islaeli È, sè, OKLUNỌ lọ Jiwheyẹwhe mítọn OKLUNỌ dopọ wẹ:

⁵ hiẹ bo na yí ayiha towe lẹpo, po alindọn towe lẹpo po, po hlọnhlọn towe lẹpo po, do yiwanna OKLUNỌ lọ Jiwheyẹwhe towe.

⁶ Podọ ohó helẹ, he yẹn degbèna we to egbe he, na tin to ayiha towe ji:

⁷ hiẹ nasọ yí sọwhiwhe dó plón yé ovi towe lẹ, bo sọ dọhó yetọn whenuena hiẹ sinai to owhé towe gbè, podọ whenuena hiẹ to zọnlinzin to aliho ji, podọ to whenuena hiẹ mlọn ai, podọ to whenuena hiẹ fọ́n tite.

⁸ Podọ hiẹ nasọ sìn yé dó alọ towe go na ohia de; yé nasọ tin na ozínja lẹ to nukun towe lẹ ṣẹnṣẹn.

⁹ Hiẹ bo nasọ wlan yé do odòtin ohòn ohò towe tọn lẹ tọn lẹ go, podọ to hòngbo towe lẹ go.

¹⁰ E nasọ wá yín, whenuena OKLUNỌ lọ Jiwheyẹwhe towe na hẹn we wá jẹ aigba lọ mẹ he é whle hlan otọ́ towe lẹ, hlan Ablaham, hlan Isaki, podọ hlan Jakob, nado na we; tòdaho kiklo podọ whànpẹnọ, he hiẹ ma do,

¹¹ po owhé lẹ po he gó na onú dagbe lẹpo, he hiẹ ma gọ́, po odòtò kùnkùn lẹ po, he hiẹ ma kùn, ovẹ̃npa lẹ po olivetin lẹ po, he hiẹ ma do, hiẹ bo nasọ dù bo yín gigọ́hò.

¹² Whenẹnu payiha hiẹ nikã wọ̀n OKLUNỌ lọ, he hẹn we jẹgbonu sọn aigba Egipti tọn lọ ji wá, sọn owhé afànumẹ tọn lọ gbé

¹³ Hiẹ na nọ dibusi OKLUNỌ lọ Jiwheyẹwhe towe; podọ ewọ wẹ hiẹ na nọ sẹ́n, bo nasọ nọ whle gbọn oyín etọn dali.

¹⁴ Mìlẹ ma na yi hodo yẹwhe devo lẹ gba, sọn yẹwhe akọta lẹ lọ tọn lẹ mẹ he tin lẹ́do mì pé lẹ;

¹⁵ na OKLUNỌ lọ Jiwheyẹwhe towe to gblagbla towe mẹ wẹ Jiwheyẹwhe awuwhànnọ de; adi OKLUNỌ lọ Jiwheyẹwhe towe tọn nikã yín hinhẹnjimiyọn do oji we, ewọ bo nasọ và we sẹ̀ sọn nukunmẹ aigba lọ tọn.

¹⁶ Mìlẹ ma na whlẹ́ OKLUNỌ lọ Jiwheyẹwhe mìtọn pọ́n gba, dile mì whle e pọn to Massa mẹ do.

¹⁷ Mìlẹ na yi sọwhiwhe do payi gbèdide OKLUNỌ lọ Jiwheyẹwhe mìtọn tọn lẹ go, po okunnuhó etọn lẹ po, po asẹdai etọn lẹ po, he é ko degbèna we lẹpo.

¹⁸ Podọ hiẹ na nọ wà enẹ he yín jijlọ po dagbe po to nukun OKLUNỌ lọ tọn mẹ: na é nido yín dagbe to de we, podọ na hiẹ nido yì hòmẹ bo tindo aigba dagbe lọ he OKLUNỌ lọ whle hlan otọ́ towe lẹ,

¹⁹ nado sisẹ́ kẹ̀ntọ towe lẹpo jẹgbonu sọn nukọn towe, dile OKLUNỌ lọ ko dọhó do.

²⁰ Whenuena ovi towe kanbiọ we to ojlẹ he ja mẹ, dọmọ, Ete wẹ okunnuhó lẹ lọ, po asẹdai lẹ lọ po, po whẹ̀dida lẹ lọ po he OKLUNỌ lọ ko degbèna mì na

²¹ whenẹnu wẹ hiẹ na dọ hlan ovi towe dọ, Afànumẹ Falo tọn wẹ mí yín to Egipti; bọ OKLUNỌ lọ sọ hẹn mí jẹgbonu po alọ hlọnhlọnnọ de po sọn Egipti mẹ wá:

²² OKLUNỌ lọ bo sọ do ohia lẹ po nujawu lẹ po hia, daho podọ yinylan to Egipti ji, to Falo ji, podọ to owhé etọn lépo ji, to nukun mítọn lẹ nukọn:

²³ é bo sọ hẹn mi jẹgbonu sọn finẹ wá, na é nido hẹn mí wá họ̀mẹ, nado na aigba lọ mí he é ko whle hlan otọ́ mítọn lẹ.

²⁴ OKLUNỌ lọ sọ naṣẹ mí nado nọ basi aṣẹdai helẹ pó, nado nọ dibusi OKLUNỌ lọ Jiwheyẹwhe mítọn, na dagbe; mítọn to whepoponu, na é nido hla mí dogbẹ̀, kẹdẹdi azán he gbè tọn.

²⁵ E bo nasọ yín dódó hlan mí, eyinmí payiha nado nọ basi gbèdide he lẹpo to OKLUNỌ lọ Jiwheyẹwhe mítọn nukọn, dile é ko degbèna mí do.