Deutelonomi 5 - BIBLU WIWE LỌ 1923

¹ MOSE sọ ylọ jẹ Islaeli lẹpo de, bo dọ hlan yé dọmọ, Islaeli È, sè asẹdai lẹ lọ po whẹ̀dida lẹ lọ po he yẹn dọ to otó mìtọn lẹ mẹ to egbé he, na mì nido plọn yé, bo sọ payiha nado nọ basi yé.

² OKLUNỌ lọ Jiwheyẹwhe mítọn basi alẹnu de hẹ mí to Holebi mẹ.

³ OKLUNỌ lọ ma basi alènu he hẹ otọ mítọn lẹ gba, ṣigba hẹ mí, yèdọ míwlẹ, popo mí mẹhe tọn to ofi togbẹ̀ to egbé he.

⁴ OKLUNỌ lọ dọhó hẹ mì nukun hlan nukun to osé lọ mẹ sọn gblagbla miyọn lọ tọn mẹ,

⁵ (Yẹn bo ṣite to OKLUNỌ lọ po mì po ṣẹnṣẹn to ojlẹ nẹ mẹ, nado do ohó OKLUNỌ lọ tọn lọ hia mì: na mìwlẹ yín avosatọ na miyọn lọ tọn wutu, bo ma hẹji yì jẹ osé lọ mẹ gba;) dọmọ,

⁶ Yẹn wẹ OKLUNỌ lọ Jiwheyẹwhe towe, he hẹn we jẹgbonu sọn aigba Egipti tọn lọ ji wá, jẹgbonu sọn owhé afànumẹ tọn lọ gbè.

⁷ Hiẹ ma na tindo yẹwhe devo lẹ de dogọ̀ mi.

⁸ Hiẹ ma na basi obosiọ pipa de hlan de we, apajlẹ ojlẹmọ depope tọn hẹ tin to olọn mẹ tàga, kavi he I in to aigba mẹ todò, kavi he tin to osìn mẹ to aigba lọ glọ:

⁹ hiẹ ma na dẹ́ dewe dodò hlan yé gba, kavi sẹ̀n yé gba: na yẹn OKLUNỌ lọ Jiwheyẹwhe towe Jiwheyẹwhe awuwhànnọ de wẹ, he nọ dla ylanwà otọ́ lẹ tọn pọ́n to ovi lẹ ji, podọ to whẹndo atọ̀ntọ ji podọ to ẹnẹtọ yé he gbẹwanna mi lẹ tọn ji;

¹⁰ bo sọ nọ do lẹblanu hia hlan fọtọ́n yé he yiwanna mi lẹ tọn bo sọ to gbèdide ṣie lẹ go payi.

¹¹ Hiẹ ma na yí oyín OKLUNỌ lọ Jiwheyẹwhe towe tọn lọ na olalo gba: na OKLUNỌ lọ ma na hẹn ewọ he to oyín etọn yí na olalo matinwhẹgbledo gba.

¹² Nọ payi gbọjẹzán lọ go, nado klan ẹn do wiwe, dile OKLUNỌ lọ Jiwheyẹwhe towe degbèna we do.

¹³ Azán ṣidopo hie na do jẹtukla, bo wà azón towe lẹpo:

¹⁴ Ṣigba azán sinawetọ lọ ogbọjẹ de wẹ hlan OKLUNỌ lọ Jiwheyẹwhe towé: to e mẹ hiẹ ma na wà azọ́n depope, hiẹ, kavi visunnu towe, kavi viyọnnu towe, kavi devisunnu towe, kávi deviyonnu towe, kavi oyin towe, kavi kẹtẹkẹtẹ towe, kavi kanlinyìnyìn towe depope, kavi ojónọ towe he tin to hòngbo towe lẹ hòmẹ; na devisunnu towe po deviyọnnu towe po nido gbọjẹ di hiẹ.

¹⁵ Hiẹ nasọ flin dọ devi de wẹ hiẹ to aigba Egipti tọn ji, OKLUNỌ lọ Jiwheyẹwhe towe sọ hẹn we jegbonu wá sọnfinẹ gbọn alọ hlọnhlọnnọ de dali podọ gbọn awà dindlẹn jẹgbonu de dali: enẹwutu wẹ OKLUNỌ lọ Jiwheyẹwhe towe naṣẹ we nado nọ payi gbọjẹzán lọ go.

¹⁶ Gbogbena oto towe po onọ towe po, dile OKLUNỌ lọ Jiwheyẹwhe towe nasẹ we do: na azán towe nido yín ogà, podọ é nido yì na dagbe to de we, to aigba he OKLUNỌ lọ Jiwheyẹwhe towe ná we lọ ji.

¹⁷ Hiẹ ma na hùmẹ.

¹⁸ Mọ hiẹ ma na dèayọ gba.

¹⁹ Mọ hie ma na fìnnúyí gba.

²⁰ Mọ hiẹ ma na zé lalo kunnudide do kọmẹnu towe ji gba.

²¹ Mọ hiẹ ma na donukunkẹn do asi kọmẹnu towe tọn go gba; mọ hiẹ ma na jlo owhé kọmẹnu towe tọn gba, ogle etọn, kavi devisunnu etọn, kavi deviyọnnu etọn, oyin etọn kavi kẹtẹkẹtẹ etọn, kavi onú depope he yín kọmẹnu towe tọn.

²² Ohó helẹ wẹ OKLUNỌ lọ dọ hlan agùnpipli mìtọn lẹpo to osé lọ mẹ sọn gblagbla miyọn lọ tọn mẹ, sọn aslọ lọ mẹ, podọ sọn zinvlu titli lọ mẹ, po ogbè daho de po. E ma sọ dèdogó humọ gba. E bo sọ wlan yè do tafo zannu tọn awe ji, bo yí yé na hlan mi.

²³ E sọ wá jọ, whenuena mì sè ogbè lọ sọn gblagbla zinvlu lo ton mẹ, whenuena osé lọ yí miyọn do to jiji, we mì wá sẹpọ́ jẹ dẽ, yèdọ nukọntọ whẹndo mìtọn lẹ tọn lẹpo, po mẹho mìtọn lẹ po;

²⁴ mìwlẹ sọ dọmọ, Dayi e go, OKLUNỌ lọ Jiwheyẹwhe mitọn ko do gigo etọn hia mí, po kiklo etọn po, mi bo ko sọ sè ogbè etọn sọn gblagbla miyọn lọ tọnmẹ; mi ko mọ to egbé he dọ Jiwheyẹwhe nọ dọhó hẹ gbẹtọ, é bo sọ nọ nọgbẹ.

²⁵ Enẹwutu dinvie etẹwutu wẹ mi do kú? na miyọn daho he na fiọ mí súdo: eyín mí sọ sè ogbè OKLUNỌ lọ Jiwheyẹwhe mitọn tọn de ba, whenẹnu mi na kú.

²⁶ Na mẹnu wẹ tin finẹ sọn agbasalan lẹpo mẹ, he ko sè ogbè Jiwheyẹwhe gbẹnọ lọ tọn to hódọ sọn gblagbla miyọn tọn mẹ, dile mìlẹ ko sè do, bo sọ togbẹ̀?

²⁷ Hiẹ ni yì sẹpọ́, bo sè ehe OKLUNỌ lọ Jiwheyẹwhe mítọn na dọ lẹpo: hiẹ ni bo dọhó hlan mí ehe OKLUNỌ lọ Jiwheyẹwhe mitọn na dọ hlan mí lẹpo, mí na sè e, bo sọ basi i;

²⁸ OKLUNỌ lọ bo sọ sè ogbè oho mìtọn lẹ tọn, whenuena mì dọhó hlan mi; OKLUNỌ lo sọ dọ, hlan mi dọmọ, Yẹn ko sè ogbè ohó omẹ he lẹ lọ ton lẹ, he yé ko dọ Hlan wé; yé ko dọ ehe yé dọ lẹpó dagbe.

²⁹ Ṣó dọ yé tindo ayiha mọnkọ de di ehe whepoponu, nado nọ dibusi mi, bo payi gbèdide ṣie lẹpo go, na é nido yin dagbe to yé de, podọ to ovi yetọn lẹ de kakadoi

³⁰ Yì dọ hlan yé dọ, Mì lẹ́gọ̀ jẹ ógohọ̀ mìtọn lẹ kọ̀n.

³¹ Ṣigba ná hiẹ tọn, hiẹ ni ṣite to dali ṣie tofi, yẹn nasọ dọ gbèdide lọ lẹ̀po hlan we, po aṣẹdai lẹ lọ po, po whẹ̀dida lẹ lọ po, he hiẹ na nọ plọn yé, na yé nido nọ basi yé to aigba he yen na yé nado tindo e lọ ji.

³² Enẹwutu mì na nọ payi nado basi dile OKLUNỌ lọ Jiwheyẹwhe mìtọn ko degbèna mì do: mì ma na lé jẹla hlán alọ adusi mẹ kavi hlan amiyọn mẹ gba.

³³ Mìlẹ na nọ zinzọnlin to aliho he OKLUNỌ lọ Jiwheyẹwhe mìtọn ko degbèna mì lọ lẹpo mẹ, na mì nido nọgbè, podọ na é nido yín dagbe to mì de, podọ na mì nido hẹn azán mìtọn lẹ dẹn to aigba he mì na yi na nútindo lọ ji.