Deutelonomi 34 - BIBLU WIWE LỌ 1923

¹ MỌṢE bo sọ heji yì son dànfáfá Moabi tọn lẹ lọ ji jẹ osé Nebo kọn, jẹ aga Pisga tọn lọ, he tin pànnukọn Jẹliko. OKLUNỌ lọ sọ do aigba Gileadi tọn lọ lẹpo hia ẹ, jẹ Dani;

² po Naftali lẹpo po, po aigba Eflaimi po Manasse tọn lọ po, po aigba Juda tọn lẹpo po, jẹ ohù wheyihọdali tọn lọ ji;

³ po huwaji lọ po, po Dànfáfá agbàdo tọn lọ tọn po ji, otòdaho atin odó tọn lẹ, jẹ Zoali.

⁴ OKLUNỌ lọ sọ dọ hlan ẹn dọmọ, Ehe wẹ aigba he yẹn whle hlan Ablaham, hlan Isaki, podọ hlan Jakob lọ, dọmọ, Yẹn na na ẹn hlan okún towe: Yẹn ko hẹn we yí nukun towe lẹ do mọ ẹn, ṣigba ma na yì gododọ̃n dali gba.

⁵ Mọ Moṣe devi OKLUNỌ lọ tọn kú do to finẹ to aigba Moabi tọn lọ ji, kẹdẹdi ohó OKLUNỌ lọ tọn lọ.

⁶ E bo sọ di i do agbadò lọ mẹ to aigba Moabi tọn lọ ji pànnukọn Beti-peoli: ṣigba mẹde ma yọ́n núde gbọn oyówhéetọn tọn dali jẹ egbé he gba.

⁷ Moṣe bo sọ yín owhè kantọ̀n mẹho whenuena é kú: nukun etọn ma súzín gba, mọ huhlọn etọn ma sọ yín dèpo gba.

⁸ Ovi Islaeli tọn lẹ lọ sọ viavi na Moṣe to dànfáfá Moabi tọn lẹ lọ ji azán ogbàn: mọ yè hẹn azán avivivi tọn lẹ lọ to awubla mẹ na Moṣe pote.

⁹ Jọṣua visunnu Nuni tọn lọ yín gigọ́ na gbigbọ nuyọnẹn tọn lọ; na Moṣe ko zé alọ etọn lẹ do e jì: ovi Islaeli tọn lẹ lọ sọ tùntóai hlan ẹn, bo sọ to wiwà dile OKLUNỌ lọ degbèna Moṣe do.

¹⁰ Yẹwhegán de ma ko fọ́n to godo to Islaeli mẹ jijlẹ do Moṣe go gba, mẹhe OKLUNỌ lọ yọnẹn nukunmẹ hlan nukunmẹ;

¹¹ to ohia lẹ lọ lẹpo mẹ po nujawu lẹ lọ po, he OKLUNỌ lọ do e hlan nado basi to aigba Egipti tọn lọ ji, hlan Falo, podọ hlan devi etọn lẹ lepo, podọ hlan aigba etọn lẹpo;

¹² podọ to alọ hlọnhlọnnọ lọ lẹpo mẹ, podọ to núdobu daho lọ lẹpo mẹ, he Moṣe wà to nukun Islaeli lẹpo tọn lọ mẹ.