Deutelonomi 33 - BIBLU WIWE LỌ 1923

¹ Ehe sọ wẹ odona lọ, he Mosẹ omẹ Jiwheyẹwhe tọn lọ do dona ovi Islaeli tọn lẹ lọ jẹnukonna okú etọn.

² E sọ dọmọ, OKLUNỌ lọ sọn Sinai mẹ wá, Bo fọ́n sọn Suli mẹ jẹ yé de; E to sisé sọn osé Palani mẹ jẹ gbọnu, E sọn fọtọ́n ao omẹ wiwe lẹ lọ tọn mẹ wá: To alọ etọn adusi mẹ wẹ osẹ́n miyọnnọ de te hlan yé.

³ Nugbo é yiwanna gbẹtọ lẹ lọ; Mẹwíwe eton lẹpo tin to alọ towe me: Yé sọ sinai to afọ towe go: Omẹ dopodopo na mọyí sọn ohó towe lẹ mẹ.

⁴ Moṣe degbè osén de tọn na mí, Ogú de na agùnpipli Jakob tọn lọ.

⁵ Ewọ sọ wẹ ahọlu to Jẹsulumi mẹ, Whenuena yè bẹ̀ ogán gbẹtọ lẹ tọn lẹ pli, Whẹndo Islaeli tọn lẹ lọ lẹpo dopọ.

⁶ Gbọ Lẹubeni ni nọgbẹ̀, bo kú blo; Gãnṣo gbọ omẹ jetọn lẹ ní yín yude.

⁷ Podọ ehe wẹ odona Judá tọn lọ: é bo sọ dọmọ, OKLUNỌ, sè, ogbè Juda tọn lọ, Bo hẹn ẹn wá jẹ omẹ etọn lẹ de: Gbọ alọ etọn lẹ ni pé nẹ̀; Hiẹ nasọ yín alọgọ de do mẹglatọ etọn lẹ ji.

⁸ Podọ na Levi tọn é dọmọ, Tummimi towe po Ulimi towe po tin to omẹ wiwe towe de, Mẹhe hiẹ ténpọ̀n to Massa, Mẹhe hiẹ hoavùn hẹ to osìn Meliba tọn lẹ kòn;

⁹ Mẹhe dọ otọ́ etọn tọn, po onọ etọn tọn po dọ, Yẹn ma ko mọ ẹn gba; Mọ é ma sọ yígbè mẹmẹsunnu etọn lọ tọn gba, Mọ é ma sọ yọ́n ovi etọn titi lẹ gba: Na yé ko payi ohó towe go, Bo sọ dayi alènu towe go.

¹⁰ Yé na whẹ̀dida towe le Jakob, Podọ osén towe Islaeli: Yé na yí nuyọ̀nwàn do nukọn towe, Po avọ̀nunina pete po do agbà towe ji.

¹¹ OKLUNỌ, dona nútindo etọn, Bo sọ kẹalọyi azọ́n alọ etọn lẹ tọn: Hò adaja yé he fọ́n do e ji lẹ tọn, Po yé he gbẹwanna ẹn lẹ tọn po, na yé sọ fọ́n ba blo.

¹² Na Bẹnjamini tọn é dọmọ, Wanyinanọ OKLUNỌ lọ tọn na nọnọ̀ mahanu mẹ to e dali; E sọ búnudo e to azán lẹpo gbè, E sọ nọnọ̀ abọ̀ etọn lẹ ṣẹnṣẹn,

¹³ Podọ na Josẹfu tọn é dọmọ, Donanọ sọn OKLUNỌ lọ de aigba etọn ni yín; Na onú họakuẹ olọn tọn lẹ lọ, na ahún lọ, Podọ na odògbó he pàvava to oglọ lọ,

¹⁴ Podọ na onú họakuẹ sinsẹ́n owhè tọn lẹ lọ, Podọ na onú họakuẹ sọn whinwhẹn osùn lẹ lọ tọn lẹ mẹ,

¹⁵ Podọ na onú jọnú osé hóhó lẹ lọ tọn lẹ, Podọ na onú họakuẹ okọta madopodo lẹ lọ tọn lẹ,

¹⁶ Podọ na onú họakuẹ aigba tọn lẹ lọ po ogigọ etọn po, Po ojlo dagbe ewọ he nọnọ̀ nukan lọ mẹ tọn po: Gbọ odona lọ ni wá ota Josẹfu tọn ji, Podọ do otaka ota ewọ he yè klan sọn mẹmẹsunnu etọn lẹ mẹ tọn ji.

¹⁷ Oyìnsú etọn plọnji lọ, gigodaho wẹ ẹtọn; Podọ azò etọn lẹ azò afinankún tọn lẹ wẹ: Yé wẹ é na do sọazò gbẹtọ lẹ lọ popoyetọn, yedọ opodo aigba lọ tọn lẹ lọ: Podọ yé wẹ fọtọ́n ao Eflaimi tọn lẹ lọ, Podọ yé wẹ fọtọ́nfọtọ́n Manasse tọn lẹ lọ

¹⁸ Podọ na Zẹbuluni tọn é dọmọ, Zẹbuluni, to ayajẹ, to gbonujẹ towe me; Po Issakali po, to ogohọ̀ towe lẹ mẹ.

¹⁹ Yé na ylọ gbẹtọ lẹ lọ jẹ osé lọ kọ̀n; Finẹ wẹ yé na yi avọsannu dódó tọn lẹ na te: Na yé na gbẹ́n ogégé ohù lẹ tọn lọ, Po adọkunnu whiwhla aigba tọn lẹ po.

²⁰ Podọ na Gadi tọn é dọmọ, Donanọ ewọ yín he hẹn Gadi yiai: Ewọ to ninọ̀ di kinnisi de, Bo vún awà lọ, Yèdọ otaka ota lọ tọn.

²¹ E dè odá tintan lọ na ede, Na finẹ wẹ yè hla mimá otògán de tọn do; Ewọ bo sọ wá jẹ nukọntọ gbẹtọ lẹ lọ tọn lẹ de, E hẹn dódówà OKLUNỌ lọ tọn sẹ, Po whẹ̀dida etọn lẹ po hẹ Islaeli

²² Podọ na Dani tọn é dọmọ, Ovú kìnni de tọn wẹ Dani, He lọ̀n jẹgbonu sọn Baṣani mẹ wá.

²³ Na Naftali tọn é dọmọ, Naftali E, yíyí nukundagbe do pékọna, Bo sọ yí odona OKLUNỌ lọ tọn lọ do gọ́. Hiẹ ni tindo whèyihọ dali po hùwaji po.

²⁴ Podọ na Aṣeli tọn é dọmọ, Donanọ wẹ Aṣeli hugan visunnu lẹ; Gbọ é ni yín alọkẹyi hlan mẹmẹsunnu etọn lẹ, Bo sọ gbọ é ni ylẹ́n afọ etọn do amì mẹ.

²⁵ Afọpa towe lẹ na yín ogànyu po gánvẽ po; Podọ di azán towe lẹ, mọ wẹ huhlọn towe na te.

²⁶ Mẹde ma yín jijlẹ finẹ do Jiwheyẹwhe go gba, Jẹsulumi E, Mẹhe hó olọn lọ ji na alọgọ towe, Podọ to gigodaho etọn mẹ to agahomẹ lẹ lọ go.

²⁷ Jiwheyẹwhe madopodo lọ wẹ ofi ninó towe, Podọ to oglọ wẹ awà madopodo lẹ lọ te: E ko sọ tùn kèntọ lọ jẹgbonu sọn nukọn towe, Bo dọmọ, To vivà.

²⁸ Islaeli bo sọ to ninò mahanu mẹ, Asisà Jakob tọn lọ kẹdẹ, To aigba gbadó po ovẹ̃n po tọn de mẹ; Nugbo, olọn etọn lẹ to ahún kùn dai.

²⁹ Islaeli È, jijọhono wẹ hiẹ: Mẹnu wẹ tin jijlẹ do ogo we, gbẹtọ whinwhlẹn lẹ gbọn OKLUNỌ lọ dali de, Awọyínu alọgọ towe tọn lọ, Podọ enẹ wẹ ohi gigodaho towe tọn lọ Kẹ̀ntọ towe lẹ bo nasọ jó yéde hlan we; Hiẹ bo nasọ nọ zìn gbọn ofi yìaga yetọn lẹ ji.