Deutelonomi 32 - BIBLU WIWE LỌ 1923

¹ Mì na otọ́, mì olọn lẹ, yẹn bo na dọhó; Bo gbọ aigba lọ ni sè ohó onù ṣie tọn lẹ:

² Nupinplọn ṣie na to kùnkùn di òjikùn lọ, Ohógbè ṣie na to jija di ahún lọ; Di ojikùn finfán lọ to ogbé kikó lọ ji, Podọ di ojikún katakata lẹ lọ to omá lọ ji:

³ Na yẹn na lá oyín OKLUNỌ lọ tọn lọ: Mì jó kiklo hlan Jiwheyẹwhe mítọn.

⁴ Osó lọ, pipé wẹ azọ́n etọn Na whẹ̀dida wẹ ali etọn lẹpo: Jiwheyẹwhe nugbowà tọn de, podọ, matin kunnuhu, Dódónọ podọ jlọjẹnọ wẹ ewọ.

⁵ Yé ko yí gbigble do zán hẹ ẹ, yé ma yín ovi etọn lẹ gba, ovlẹ yetọn wẹ; Whẹndo gblewànọ podọ gbingbán de wẹ yé,

⁶ Gbẹtọ nulunọ podọ gugutọ È, le wẹ mì na suahọ OKLUNỌ lọ do? Ewọ ma wẹ otọ́ towe he tindo we? E wọ wẹ ko basi we bo sọ hẹn we li.

⁷ Flin azán hóhó tọn lẹ lọ, Yí owhè whẹndo sùsù lẹ lọ tọn lẹnpọn. Kanbiọ otọ́ towe, ewọ bo nasọ dohia we; Mẹho towe lẹ yé na dọ na we.

⁸ Whenuena Gigogán na hlan akọta lẹ ogú yetọn, Whenuena é klan ovi gbẹtọ lẹ tọn lẹ lọ dovovo; E do dògbó gbẹtọ lẹ lọ tọn lẹ. Kẹdẹdi osọha ovi Islaeli tọn lẹ lọ tọn.

⁹ Na mimá OKLUNỌ lọ tọn wẹ gbẹtọ etọn lọ; Jakob wẹ mimá ogú etọn tọn.

¹⁰ Ewọ mọ ẹn to aigba gbọgbé de mẹ, Podọ to zungbo vọjẹ gbigbó lọ mẹ; E lédo e pé, é yítuklajẹ na ẹn, E whla ẹ di azìn nukun etọn tọn lọ:

¹¹ Di akùn he to adó etọn wlu de, He to didẹlẹ́do to ovú etọn lẹ ta, Dindlẹn awà etọn lẹ tọn, bẹ́ yé, Zé yé hẹn to awàfun etọn lẹ ji:

¹² OKLUNỌ lọ kẹdẹ wẹ plan ẹn yì, Podọ yẹwhe alọpade ma tin finẹ po e po gba.

¹³ E hẹn ẹn hẹ́ ofi yìji aigba tọn lẹ ji, E bo sọ dù jideji oglegbo lọ tọn; E bo sọ hẹn ẹn gbẹ́n owín sọn osé lọ mẹ, Podọ amì sọn osé okẹ́nnọ lọ mẹ;

¹⁴ Anọsinhiho oyin lẹ tọn, po anọsìn lẹngbọ lẹ tọn po, Po ojó lẹngbọvu lẹ tọn po, Podọ agbò sọn okún Baṣani tọn lẹ lọ tọn mẹ, po gbọgbọẹ lẹ po Po ojó ahún likún tọn lẹ lọ tọn po; Podọ hiẹ nù ovẹ̃n sọn ohùn vẹ̃nsinsén lọ tọn mẹ.

¹⁵ Ṣigba Jẹsuluni lẹzún ojonọ, bo to whẹsó: Hiẹ tin lẹzùn ojonọ, hiẹ yín whinwhẹn tli, hiẹ tin lẹzùn mimẹ̀ Whenẹnu ewọ gbé Jiwheyẹwhe he basi i dai, Bo ma sọ hò Osé whlẹngan etọn tọn lọ pọ́n gba.

¹⁶ Yé yí yẹwhe alọpade lẹ do hẹn ẹn whanwu, Yé yí osùnú lẹ do hẹnhomẹgble e hlan adi.

¹⁷ Yé sánvọ́ hlan aovi lọ he ma yín Jiwheyẹwhe de, Hlan yẹwhe lẹ he yé ma yọnẹn, Hlan yẹwhe yọyo he ṣẹṣẹ jọ lẹ, Mẹhe otọ́ mìtọn lẹ ma dibuna.

¹⁸ Hie ma sọ yín oflinnọ Osé he ji we lọ ton gba, Bo ko sọ wọn Jiwheyẹwhe he dá we

¹⁹ OKLUNỌ lọ sọ mọ ẹn, bo gbẹwanna yé, Na homẹhẹngblenamẹ; visunnu etọn lẹ tọn po viyọnnu e ọn lẹ etọn po.

²⁰ E bo sọ dọmọ, Yẹn na yí nukunmẹ ṣie whla sọn yé de, Yẹn na pọ́n núhe opodo yetọn na yín: Na whẹndo tólivẹtọ talala de wẹ yé, Ovi mẹhe mẹ yise de ma te.

²¹ Yé ko yí enẹ he ma yín Jiwheyẹwhe do bẹn mi whanwu; Yé ko yí avọ́ yetọn lẹ do hẹnhomẹgble mi hlan adi: Yẹn bo nasọ yí enẹlẹ he ma yín gbẹtọ de do hẹn ye whanwu; Yẹn na yí akọta nulunọ de do hẹnhomẹgble yé hlan adi.

²² Na yè pla miyọn de to adi ṣie mẹ, Bo sọ to jiji jẹ kútòmẹ dòpatapata, Bo sọ to aigba dùsúdo po jideji etọn po, Bo sọ simiyọn dòdonu osó lẹ lọ tọn lẹ

²³ Yẹn na bẹ́ nuylankan lẹ do yé ji, Yẹn na zán ogá ṣie lẹ to yé ji:

²⁴ Yè na yí huvé do hẹn yé huliwhan, Bo sọ yí akán jiji lẹ do sú yé do Po dindọn vivẹ́ po; Yẹn nasọ do adú kanlin lẹ tọn hlan yé ji. Po adi onú linlin kọgudu lọ tọn lẹ lọ po.

²⁵ Ohi lọ na to hùhù to gbonu, Podọ nudobu to abò lẹ mẹ: E na và dẹpẹ po awhli po súdo Ovivú po sunnu odà owha tọn lọ

²⁶ Yẹn dọmọ, Yẹn na vunvún yé yìnukọnnukọn, Yẹn na hẹn ofun yé tọn nado gbòdo sọn gbẹtọ lẹ ṣẹnṣẹn:

²⁷ Eyín é ma yín dọ yẹn dibuna homẹgble kẹ̀ntọ lọ tọn Mẹglatọ yetọn lẹ nikã do siwhóda, Ye nikã do dọmọ, Alọ mìton yin zizedaga, Podọ OKLUNỌ lọ ma ko wà ehe gba.

²⁸ Na akọta gbọ́agba hónamẹ tọn de wẹ ye, Wuntuntun de ma tin to yé mẹ gba.

²⁹ Ṣó yé do yín núyọnẹntọ, dọ yé tunwun ehe, Dọ yé do yi opòdo godo yetọn tọn lẹnpọ́n!

³⁰ Nawẹ mẹdopo do yàn fọtọ́n do, Podọ omẹ awe do hẹn fọtọ́n ao họ̀nyi, Adavo dọ, Osé yetọn ko sà yé, Podọ OKLUNỌ lọ ko dè yé jó?

³¹ Na osé yetọn ma tin di Osé mítọn gba, Yèdọ kéntọ mítọn lẹ lọsu yínyín whẹ̀datọ.

³² Na ovẹntin Sọdọmi tọn mẹ wẹ ovẹ̃ntin yetọn sọn Podọ sọn odan Gomola tọn lẹ ji: Ovẹ̃nsinsẹ́n vivẹ́ tọn lẹ wẹ ovẹ̃nsinsẹ́n yetọn lẹ, Yivó wẹ ohín yetọn lẹ:

³³ Adí dlagoni lẹ tọn wẹ ovẹ̃n yetọn, Podọ akàn wlewle olòpalẹ tọn.

³⁴ Ehe ma ka yín titò dai to agbánhò mẹ to dó, Yíyí hiadonu do dohia to adọkunnu ṣie lẹ mẹ?

³⁵ ṣie wẹ ahọsuyí po ahọsu po, To ojlẹ lọ ji whenuena afọ yetọn na tlẹ: Na azán oyà yetọn tọn tin to yakẹ, Podọ onú he tin nado wá yé ji lẹ lọ na yawu wá.

³⁶ Na OKLUNỌ lọ na dawhena omẹ etọn lọ, Bo diọlinlẹnna ede na devi etọn lẹ; Whenuena é mọ dọ yé hẹn huhlọn yetọn yì, Bọ omẹ de ma yín pipòai, yè glọn dai kavi he yè-jó dai.

³⁷ E nasọ dọmọ, Fie wẹ yẹwhe yetọn le te, Ose lọ ehe mẹ yé yí fibẹ̀tado te;

³⁸ He dù ojó avọsannu yetọn lẹ tọn lọ, Bo so nù óvẹn avọ́nunina nùnù yetọn tọn lọ? Gbọ ye ni tite bo gọalọna mì. Gbọ yé ni yin whlẹngan mìtọn.

³⁹ Pọn dinvie dọ yẹn, yèdọ yẹn, wẹ ewo, Podọ yẹw he de ma tin to dẽ: Yẹn hù, yẹn bo sọ hẹn nọgbè: Yẹn ko doalángona, Yẹn bo sọ hẹnalánkú: Podọ omẹde ma tin he sọgan whlẹn dai sọn alọ: ṣie mẹ.

⁴⁰ Na yẹn zé alọ ṣie daga hlan olọn Bo dọmọ, Dile yen togbè kakadoi,

⁴¹ Eyín yẹn gàn ohi sisẹ́ ṣie, Bọ alọ ṣíe hen whẹ̀dida lọ go; Yẹn na gò ahọsu jó hlan mẹglatọ ṣie lẹ, Bo na sọ suahọ yé he gbẹwanna mi lẹ.

⁴² Yẹn na yí ohùn do hẹn ogá ṣie lẹ núsìn, Ohi ṣie nasọ dù olàn súdo; Pó ohùn alántọṣiọ lọ tọn po po mẹmẹglọ lẹ lọ po, Sọn ṣaunsaunwhenu ahọsuyí lẹ tọn lọto kẹ̀ntọ lọ ji, Ota owhanọ kẹ̀ntọ lọ tọn lọ.

⁴³ Mì to ayajẹ hẹ òmẹ etọn lẹ mì: akọta lẹ emi: Na ewọ na yíahọsu ohùn devi etọn lẹ tọn lọ, Bo na gò ahọsu jó hlan mẹglatọ etọn lẹ, Bo nasọ hasi ovẹ̀se na aigba etọn, na gbẹtọ etọn lẹ.

⁴⁴ Moṣe bo wá bo dọ ohó ohàn he tọn lẹ lọ lepo do otọ́ gbẹtọ lẹ tọn lẹ mẹ, ewọ, po Joṣua visunnu Nuni tọn lọ po.

⁴⁵ Moṣe bo sọ basi opòdo didọ ohó helẹ po ton de hlan Islaeli lẹpo:

⁴⁶ é bo sọ dọ hlan yé dọmọ, Mì zé ayiha mìtọn do hlan ohó he yẹn dekunnuna hlan mì to egbe he lẹpo lọ; he mì na degbèna ovi mìtọn lẹ, nado nọ payihá nado nọ basi ohó oṣén he tọn lẹ lẹpo

⁴⁷ Na é ma yín onú ovọ́ de na mì gba; hẹ ogbẹ̀ mìtọn e yín wutu, podọ gbọn onú he mẹ mìlẹ na hẹn azán mitọn lẹ dẹn to aigba lọ ji, fie mì jei to Jọdani godo nado yí i.

⁴⁸ OKLUNỌ lọ bo sọ dohó hlan Moṣe to azán dopo nẹ lọ gbè, dọmọ,

⁴⁹ Hẹn dewe hẹji yì jẹ osé Abalimi he mẹ, jẹ osé Nebo kòn, he tin to aigba Moabi tọn lọ ji, he tin pànnukọn Jẹliko; bo pọ́n aigba Kanani tọn lọ, he yẹn na hlan ovi Islaeli tọn lẹ lọ na nútindo de:

⁵⁰ bo kú to osé fie hiẹ hẹji jei lọ mẹ, bo yín bibépli hlan omẹ towe lẹ de; dile Aalọn nọvisunnu towe kú to osé Holi mẹ, ho sọ yín bibépli hlan omẹ etọn lẹ de do:

⁵¹ na mìlẹ wàylan do ogo e to gblagbla ovi Islaeli tọn lẹ lọ tọn mẹ to osìn Meliba Kedẹṣi tọn tọn lẹ lọ kòn to zùngbo Zini tọn lọ mẹ wutu; na mìlẹ ma klan mi do wiwe to gblagbla ovi Islaeli tọn lẹ lọ tọn mẹ wutu.

⁵² Na hiẹ na mọ aigba lọ to nukọn towe; ṣigba hiẹ ma na yì finẹdali jẹ aigba he yẹn na ovi Islaeli tọn lẹ lọ mẹ gba.