Deutelonomi 31 - BIBLU WIWE LỌ 1923

¹ MOṢE bo sọ yì bo dọ ohó helẹ hlan Islaeli lẹpo.

² E sọ dọ hlan yé dọmọ, Owhè kantọ̀n mẹho wẹ yẹn to égbé he; Yẹn ma sọ sọgan jẹgbonu yì podọ wá whegbè ba gba; OKLUNỌ lọ ko sọ dọ hlan mi dọ, Hiẹ ma na hẹji yì Jọdani he godo gba.

³ OKLUNỌ lọ Jiwheyẹwhe towe, ewọ na jẹnukọnna we yì gododọ̃n; ewọ na và akọta nẹlẹ sọn nukọn towe, hiẹ nasọ yí yé: podo Jọṣua, ewọ na jẹnukọnna we yì gododọ̃n, dile OKLUNỌ lọ ko dọhó do.

⁴ OKLUNỌ lọ nasọ wà hlan yé dile é wà hlan Sihọni podọ hlan Ogi do, ahọlu Amolinu lẹ lọ tọn lẹ, podọ hlan aigba yetọn; mẹhe é và lẹ.

⁵ OKLUNỌ lọ nasọ jó yé to mì nukọn, mìlẹ nasọ wà hlan yé kẹdẹdi gbèdide he yẹn ko do degbèna mì lẹpo.

⁶ Mì yín huhlónnọ podọ tudido dagbe de tọn, mì dibu blo, mì sọ yín avosatọ na yé blo: na OKLUNỌ lọ Jiwheyẹwhe towe, ewọ é yín he po hi po to yìyì; é ma na blu we, kavi gbẹ́ we dai gba.

⁷ Moṣe sọ ylọ hlan Jọsua, bo dọ hlan ẹn to nukun Islaeli lẹpo tọn mẹ dọmọ, Yín huhlọnnọ podọ tudido dagbe de tọn: na hiẹ na yì o omẹ he lẹ po jẹ aigba he OKLUNỌ lọ whle hlan otọ́ yetọn lẹ nado na yé; hiẹ nasọ hẹn yé nado yí i.

⁸ OKLUNỌ lọ, ewọ é yín he to yìyì to nukọn towe; é na tin to de we, é ma na blu we, mọ é ma na gbẹ́ we dai gba: a didu blo, mọ a sọ yín flujẹtọ blo.

⁹ Moṣe sọ wlan osẹ́n he, bo yí i jó hlan yẹwhenọ ovi Levi tọn lẹ lọ, he nọ zé alki alẹ̀nu OKLUNỌ lọ tọn lọ hẹn, podọ hlan mẹho Islaeli tọn lẹ lọ lẹpo.

¹⁰ Moṣe sọ degbèna yé, dọmọ, To opòdo owhè sinawe—sinawe tọn, to ojlẹ dido owhè odèdai tọn lọ tọn mẹ, to hùnwhẹ gohọtúntún lẹ tọn mẹ,

¹¹ Whenuena yè hẹn Islaeli lẹpo wá nado sọawúhia to OKLUNỌ lọ Jiwheyẹwhe towe nukọn to otẹn he é na dè lọ mẹ hiẹ na hia osẹ́n he to Islaeli lẹpo nukọn to nisè yetọn mẹ.

¹² Bẹ́ gbẹtọ lẹ lọ pli, sunnusi lẹ po yọnnusi lẹ po po omẹ flinflin lẹ lọ po, po ojónọ towe he tin to hòngbo towe lẹ hòmẹ po, na yé nido sè, podọ na yé nido plọnnu, bo nọ dibusi OKLUNỌ lọ Jiwheyẹwhe mìtọn, bo sọ nọ payi nado basi ohó osẹ́n he tọn lẹ lọ lẹpo;

¹³ podọ na ovi yetọn, he ma ko yọnẹn lẹ, nido sè, bo sọ pọ́n nado nọ dibusi OKLUNỌ lọ Jiwheyẹwhe mitọn, dẹn sọle mi tin to aigba lọ ji fie mì jei Jọdani gododọ̃n nado yí i.

¹⁴ OKLUNỌ lọ sọ dọ hlan Moṣe dọmọ, Dayi e go, azán towe lẹ dindọnsẹpọ bọ hiẹ na kú: Ylọ́ Jọsua, bo do mìde hia to ogohọ̀ opli tọn lọ mẹ, na yẹn nido na aṣẹ de e. Moṣe po Jọsua po sọ yì, bo do yéde hia to ogohọ́ opli tọn lọ mẹ.

¹⁵ OKLUNỌ lọ sọ doawuhia to Ogohọ̀ lọ mẹ to odòtin aslọ tọn de mẹ: odotin aslọ tọn lọ ṣite to ohọ̀n Ogohọ̀ lọ tọn lọ dali.

¹⁶ OKLUNỌ lọ sọ dọ hlan Moṣe dọmọ, Dayi e go, hiẹ na damlọn po otọ́ towe lẹ po; gbẹtọ he lẹ nasọ tite, bo yìyì galilọ de hodo yẹwhe alọpa de aigba lọ tọn lẹ, fie yé jei nado tin to ye ṣẹnṣẹn, bo nasọ gbẹ́ mi dai, bo gbà alẹ́nu ṣie he yẹn ko basi hẹ yé.

¹⁷ Whenẹnu yè na hẹn adi ṣie jimiyọn do yé ji to azán nẹ gbè, Yẹn bo nasọ gbẹ́ yé dai, Yẹn bo na yí nukunmẹ ṣie whla sọn yé de, yé bo na yín súsúdo, oylan sùsù po tukla lẹ po nasọ wá yé ji; sọmọ bọ yé na dọ to azán nẹ gbè dọ, Na Jiwheyẹwhe mítọn ma tin mí ṣẹnṣẹn wutu ma wẹ yè hẹn oylan helẹ wá mí ji?

¹⁸ Yẹn nugbo-nugbo bo na whla nukunmẹ ṣie to azán nẹ gbè na oylan he yé na ko wà lọ lẹpo, to ehe yé yín lilé hlan Yẹwhe devo lẹ de mẹ.

¹⁹ Enẹwutu mì wlan ohàn he na mìde dinvie, hiẹ ni sọ plọn ẹn ovi Islaeli tọn lẹ lọ: yí i do onù yetọn lẹ mẹ, na ohàn he nido yín kunnudetọ de to ovi Islaeli tọn lẹ lọ ji na mi.

²⁰ Whenuena yẹn na ko hẹn yé jẹ aigba he yẹn whle hían otọ́ yetọn lẹ lọ ji, yíyí anọsìn po owín po do to sisà: bọ yé na ko dù bo hẹnhogọ́ yéde, bo klodojó; whenẹnu wẹ yé na lé jẹ yẹwhe devo lẹ de, bo to yé sẹn, bo to vivlẹ mi, bo sọ gbà alẹ́nu ṣie.

²¹ E nasọ wá jọ, whenuena yè hẹn oylan lẹ po tukla lẹ po wá yé ji, wẹ ohàn he na to Kunnude to yé nukọn di kunnudetọ de; na é ma na yín winwọn sọn onù okún yetọn lẹ lọ tọn mẹ gba: na yẹn yọ́n aṣavakinkan yetọn he yé yìyì hodo, yèdọ to dinvie whẹpo yẹn ko do hẹn yé jẹ aigba he yẹn whle lọ ji

²² Moṣe wlan ohàn he to azán dopolọ gbè bo plọn ẹn ovi Islaeli tọn lẹ lọ.

²³ E sọ na aṣẹ de Jọṣua visunnu Nuni tọn lọ, bo dọmọ, Yín huhlọnnọ podọ tudìdo dagbe de tọn: na hiẹ na hen ovi Islaeli tọn lẹ lọ wá jẹ aigba he yẹn whle hlan yé lọ mẹ: yẹn nasọ tin po hi po.

²⁴ E bo sọ wá jọ, whenuena Moṣe ko basi opòdo winwlan ohó osén he tọn lẹ tọn tọn de do owé de mẹ, kaka yè do vẹ̀ yé.

²⁵ Wẹ Moṣe degbèna Levinu he zé alki alénu OKLUNỌ tọn lọ tọn hẹn lẹ lọ, dọmọ,

²⁶ YL owé osén lọ tọn he, bo yi i do adà alki alẹ̀nu OKLUNỌ lọ Jiwheyẹwhe mìtọn tọn lọ tọn tọn dali, na é nido tin finẹ na kunnude de do oji we

²⁷ Na yẹn yọ́n atẹṣiṣi towe, po okò sinsinyẹn towe po: dayi e go, whenuena yẹn gbé togbẹ̀ po mì po to egbé he, mìlẹ ko yín atẹṣitọ do OKLUNỌ lọ go; sùsù whla nẹmunẹmu hugan to okú ṣie godo?

²⁸ Bé mẹho whẹndo mìtọn lẹ lọ tọn lẹpo, po azọngan mìtọn lẹ po pli do dẽ, na yẹn nido dọ ohó helẹ do otọ́ yetọn lẹ mẹ, bo sọ ylọ olọn po aigba po nado dekunnu do yé ji.

²⁹ Na yẹn yónen dọ to okú ṣie godo mì na hẹn mide gble gbidigbidi bo lẹ jẹla sọn ali he yẹn degbèna mì lọ ji; oylan nasọ jọ do mì go to azán godo tọn lẹ mẹ; na mìlẹ na wà enẹ he yín oylan to nukun OKLUNỌ lọ tọn mẹ wutu, nado hẹnhomẹgble e hlan adi gbọn azọ́n alọ mìtọn lẹ tọn lọ dali.

³⁰ Moṣe bo sọ dọ do otó agúnplidopọ Islaeli tọn lọ lẹpo tọn mẹ ohó ohàn he tọn lẹ lọ, kaka yè do vọ́ yé.