Deutelonomi 30 - BIBLU WIWE LỌ 1923

¹ E nasọ wá jọ, whenuena onú helẹ pó yínhẹnwá oji we, odona lọ po odẹ́hodo lọ po he yẹn ko zé do nukọn towe, bọ hiẹ na flin yé to akọta lẹ lọ ṣẹnṣẹn fiedali OKLUNỌ lọ Jiwheyẹwhe towe yàn we hlan,

² bo na lẹ́gọ̀ do OKLUNỌ lọ Jiwheyẹwhe towe de, bo na nọ yí ayiha towe lẹpo, podọ po alindọn towe lẹpo po do setónuna ogbè etọn kẹdẹdi ehe yẹn ko degbèna we to egbé he lẹpo, hiẹ po ovi towe lẹ po;

³ na whẹnenu wẹ OKLUNỌ lọ Jiwheyẹwhe towe na lẹ́gọ̀ do mẹglọnọ towe de, bo tindo lẹblanu to oji wẹ, bo nasọ lẹ́gọ̀ bo ṣinyan we sọn akọta lẹ lọ lẹpo mẹ, fiedali OKLUNỌ lọ Jiwheyẹwhe towe ko vúnvún we hlan.

⁴ Eyín mẹyandogbé towe lẹ de tin to opòdopatapata adà olọn tọn lọ lẹ mẹ, finẹ OKLUNỌ lọ Jiwheyẹwhe towe na sinyan we sọn, podọ finẹ wẹ é na hẹn we sọn wá:

⁵ OKLUNỌ lọ Jiwheyẹwhe towe na hẹn we sọn finẹ wá jẹ aigba he otọ́ towe lẹ yí lọ mẹ, hiẹ nasọ yí i; é nasọ wà dagbe na we, bo hẹn we sudeji hugan otọ́ towe lẹ

⁶ OKLUNỌ lọ Jiwheyẹwhe towe na gbòwhẹna ayiha towe, po ayiha okún towe tọn po, nado nọ yí ayiha towe lẹpo, po alindọn towe lẹpo po do yiwanna OKLUNỌ lọ Jiwheyẹwhe towe, na hiẹ nido gán.

⁷ OKLUNỌ lọ Jiwheyẹwhe towe bo nasọ yí dẹ̀hodo helẹ pó do kẹntọ towe lẹ ji, podọ do yé he gbẹwanna we lọ ji, he homẹkẹndo we lọ.

⁸ Hiẹ nasọ légọ̀ bo setónuna ogbè OKLUNỌ lọ tọn, bo sọ basi gbèdide etọn he yẹn degbèna we to egbó he lẹpo.

⁹ OKLUNỌ lọ Jiwheyẹwhe towe na hẹn we zùn sùsùnọ to azọ́n alọ towe mẹ tọn lẹpo mẹ, to sinsẹ́n agbasa towe tọn mẹ, podọ to sinsẹ̀n kanlinyìnyìn towe tọn mẹ, podọ to sinsẹ̀n aigba towe tọn mẹ, na dagbe: na OKLUNỌ lọ nasọ vọ̀ ayajẹ to oji we na dagbe, dile é jaya to otọ́ towe lẹ ji do:

¹⁰ eyín hiẹ na setónuna ogbè OKLUNỌ lọ Jiwheyẹwhe towe tọn, nado nọ payi gbèdide etọn lẹ go po asẹdai etọn he yè wlan do owé osẹ́n tọn he mẹ lẹ po; eyín hiẹ lẹ́ do OKLUNỌ lọ Jiwheyẹwhe towe de po ayiha towe lẹpo po, podọ po alindọn towe lẹpo po.

¹¹ Na gbèdide he he yẹn degbèna we to egbé he, é ma yín sinsinyẹn gbahu na we gba, mọ é ma tin dẹn boboe gba.

¹² E ma tin to olọn mẹ gba, bọ hiẹ do do dọmọ, Mẹnu wẹ na hẹji yì jẹ olọn mẹ na mí, bo hẹn ẹn wá mí de, bo hẹn mí nado sè e, na mí nido nọ basi i?

¹³ Mọ é ma sọ tin to ohù lọ godo, bọ hiẹ do do dọmọ, Mẹnu wẹ nayi ohù lọ gododọ̃n na mí, nado hẹn ẹn wá jẹ mí de, bo hẹn mí nado sè e, na mí nido nọ basi i.

¹⁴ Ṣigba ohó lọ tin to yakẹ talala to de we, to onù towe mẹ, podọ to ayiha towe mẹ, na hiẹ nido nọ basi i.

¹⁵ Pọ́n, yẹn ko zè to egbé he do nukọn towe ogbẹ́ po dagbe po, podọ okú po oylan po.

¹⁶ To ehe mẹ yẹn naṣẹ we te to egbé he nado nọ yiwanna OKLUNỌ lọ Jiwheyẹwhe towe, nado nọ zinzọnlin to ali etọn lẹ mẹ, podọ nado nọ payi gbèdide etọn lẹ go po aṣẹdai etọn lẹ po po whẹ̀dida etọn lẹ po, na hiẹ nido gán bo sudeji, podọ na OKLUNỌ lọ Jiwheyẹwhe towe nido dona we to aigba lọ mẹ fie mẹ hiẹ jei nado yí i.

¹⁷ Ṣigbá eyín ayiha towe lẹ́kọ, bọ hiẹ ma na sè gba, ṣigba bo na yín dindọn ji, bo to yẹwhe devo lẹ litaina, bo sọ to yé sẹ́n;

¹⁸ Yẹn sakunnu hlan mì to egbẹ́ he, dọ mì na dọ̃n dandan; mì ma na hẹn azán mìtọn lẹ dẹn to aigba lọ ji gba fie mì jujei Jọdani gododọ̃n nado yì e mẹ nado yí i.

¹⁹ Yẹn ylọ olọn po aigba po nado dekunnu do mì ji to egbé he, dọ yẹn ko zé ogbẹ́ po okú po, dona lọ po odẹ́hodo lọ po do nukọn towe: enẹwutu dè ogbé, na hiẹ nido gán, hiẹ po okún towe po:

²⁰ Nado nọ yiwanna OKLUNỌ lọ Jiwheyẹwhe towe, nado nọ setónuna ogbè etọn, podọ nado nọ dọnsẹpọ jẹ e de: na ewọ wẹ ogbé towe po ogà azán towe lẹ tọn po: na hiẹ nido nọnọ̀ aigba he OKLUNỌ lọ whle hlan otọ́ towe lẹ, hlan Ablaham, hlan Isaki, podọ hlan Jakob nado na yé lọ mẹ.