Deutelonomi 3 - BIBLU WIWE LỌ 1923

¹ MÍ sọ lé, bo hẹji yì aliho lọ ji jẹ Wẹ; Baṣani: Ogi ahọlu Baṣani tọn lọ jẹgbonu wá mí ji, ewọ po omẹ etọn lẹpo po, jẹ awhànfùntẹn mẹ to Edlei.

² OKLUNỌ lọ sọ dọ hlan mi dọmọ, A dibuna ẹn blo: na yẹn ko jó e, po omẹ etọn lẹ po, po aigba etọn po, do alọ towe mẹ; hiẹ bo nasọ wà hlan ẹn dile hiẹ wà hlan Sihọni ahọlu Amolinu lẹ tọn lọ do, he nọnọ̀ Hẹṣbọni.

³ Mowẹ OKLUNỌ lọ Jiwheyẹwhe mítọn jó Ogi ga, ahọlu Baṣani tọn lọ, po omẹ etọn lẹpo po, do alọ mítọn mẹ: bọ mí sọ hò e kaka yè ma do jó ode dai pó nẹ̃ gba.

⁴ Mí sọ yí tódaho etọn lẹpo to ojlẹ nẹ mẹ; tòdaho de ma tin finẹ he mí ma yí sọn yé si; tòdaho kandeko, popolẹpo agbègbèji Algobi tọn lọ, ahọludu Ogi tọn lọ to Baṣani mẹ.

⁵ Ehelẹ pó wẹ tòdaho dòkọnọ lẹ po adó yìaga lẹ po, hòngbo lẹ, po gànpatin lẹ po; dogó tòmimlin lẹ sùsù gégé de.

⁶ Mí sọ và yé gbidigbidi, dile mí wà hlan Sihọni ahọlu Hẹṣbọni tọn lọ do, vivà tòdaho sunnusi lẹ tọn dopodopo, po yọnnusi lẹ po po omẹ flinflin lẹ po.

⁷ Ṣigba kanlinyìnyìn lọ lẹpo, po ogblannú tòdaho lọ lẹ tọn po, wẹ mí yí na ogblannú de hlan mìde.

⁸ Mí bo sọ yí aigba lọ to ojlẹ nẹ mẹ sọn alọ ahọlu awe Amolinu lẹ tọn lẹ si he tin Jọdani gododọ̃n, sọn agbadò Alnoni tọn lọ mẹ je osé Helmoni kọn;

⁹ (Helmoni he Sidoninu lẹ nọ ylọ Silioni, Amolinu lẹ lọ bo sọ nọ ylọ ẹ dọ Simli;)

¹⁰ tòdaho aigba vlala lọ lẹ tọn lẹpo, po Gileadi lẹpo po, po Baṣani lẹpo po, jẹ Saleka po Edlei po, tòdaho ahọludu Ogi tọn lẹ lọ to Baṣani mẹ.

¹¹ (Na Ogi ahọlu Baṣani tọn kẹdẹ wẹ po sọn pipòtọ Lefaimi lọ lẹ tọn mẹ; dayi e go, adọzan ogànyu tọn de wẹ adọzan etọn; é ma ka tin to Labba ovi Amọni tọn lẹ lọ tọn mẹ? awàgba sinẹnẹ wẹ ote etọn, podọ awàgba ẹnẹ wẹ ogblo e ton, kẹdẹdi awagba gbẹtọ de tọn.)

¹² Aigba he wẹ mí sọ yí to nútindo mẹ tò òjlẹ nẹ mẹ: sọn Aloeli mẹ, he tin to agbadò Alnoni tọn lọ dali, po odá otò okọta Gileadi tọn lọ tọn po, po tòdaho eton lẹ lọ po wẹ yẹn yína hlan Lẹubeninu lẹ lọ; podọ hlan Gadinu lẹ lọ:

¹³ podọ pipòtọ Gileadi tọn, po Baṣani lepo po, ahọludu Ogi tọn lọ wẹ yẹn yína hlan odá whẹndo Manasse: tọn lọ; agbègbeji Algobi tọn lọ lẹpo, yèdọ Baṣani lẹpo. (Dọpolọ wẹ yè nọ ylọ dọ aigba Lefaimi lẹ lọ tọn.

¹⁴ Jaili visunnu Manasse tọn lọ yí agbègbèji Algobi tọn lẹpo, jẹ agboji Gesulinu lẹ lọ tọn po Maakatinu lẹ lọ po; bo nọ ylọ ye, yèdọ Baṣani, kẹdẹdi oyín etọn lọsu, Havvoti-jaili, jẹ azán he gbè.)

¹⁵ Yẹn bo sọ yí Gileadi na hlan Makili.

¹⁶ Podọ hlan Lẹubeninu lẹ lọ pòdọ hlan Gadinu lẹ lọ wẹ yẹn yína sọn Gileadi yedọ jẹ agbadò Alnoni tọn lọ mẹ, ṣẹnṣẹn agbadò lọ tọn lọ, po agboji etọn lọ po; yedọ jẹ otọ́ Jabboki lọ kòn, he yín agboji ovi Amọni tọn lẹ lọ tọn;

¹⁷ Alaba lọ ga, po Jọdani po po agboji etọn po, sọn Kinneleti mẹ yèdọ jẹ ohù Alaba lọ kòn, Ohù Ojẹ tọn, lọ, to asisà Pisga tọn le lọ glọ hlan whèzẹten dali.

¹⁸ Yẹn bo sọ degbèna mì to ojlẹ nẹ mẹ, dọmọ, OKLUNỌ lọ Jiwheyẹwhemìtọn ko na aigba he mì to egbé nado tindo e: mì na juyì gododọ̃n biblagbajana to mẹmẹsunnu mìtọn ovi Islaeli tọn lẹ lọ nukọn, omẹ tùdido tọn lẹpo.

¹⁹ Ṣigba asi mìtọn lẹ, po omẹ flinflin mìtọn lẹ po, po kanlinyìnyìn mìtọn lẹ po, (yẹn yọnẹn dọ, mì tindo kanlinyìnyìn sùsù,) na nọnọ̀ tòdaho mìtọn he yẹn ko na mì le mẹ;

²⁰ kaka. OKLUNỌ lọ do na gbọjẹ mẹmẹsunnu mìtọn le, di hlan mìlẹ, bọ yéwle ga tindo aigba lọ he OKLUNỌ lọ Jiwheyẹwhe mitọn ná yé to Jọdani godọdọn whenẹnu wẹ mì na lẹ́gọ̀ ome dopodopo jẹ nútindo etọn kòn, he yẹn ko na mì i

²¹ Yẹn bo sọ degbena Jọsua to ojlẹ nẹ mẹ, dọmọ, Nukun towe lẹ ko mọ ehe OKLUNỌ lọ Jiwheyẹwhe mìtọn ko wà hlan ahọlu awe helẹ: mọwẹ OKLUNỌ lọ na wà hlan ahọludu lẹ lọ fiedali mì jujei tọn lẹpo.

²² Mìle ma na dibuna yé gba: na OKLUNỌ lọ Jiwheyẹwhe mitọn, ewọ wẹ é yín he to ovùnhò na mì.

²³ Yẹn sọ vè OKLUNỌ lọ to ojlẹ nẹ mẹ, domọ,

²⁴ OKLUNỌ È Jiwheyẹwhe, hiẹ ko sè nado to kiklo towe dohia devi towe, po alọ sinsinyẹn towe po: na yẹwhe tẹwẹ tin finẹ to olọn mẹ kavi to aigba me, he sọgan wà kẹdẹdi azón towe lẹ, podo kẹdẹdi owalọ hlọnhlọnnọ towe lẹ?

²⁵ Yẹn vẹ́ wẹ, gbọ yẹn ni yì gododọ̃n, bo mọ aigba dagbe he tin to Jọdani gododọ̃n lọ, osé dagbenọ nẹ, po Lebanọni po.

²⁶ Ṣigba OKLUNỌ lọ yín homẹgblènọ do ogo e na mìtọn wutu, bo ma tùntóai hlan mi gba: OKLUNỌ lọ bo dọ hlan mi dọ, gbọ é ni pé we; a sọ dọhó whẹhó he tọn hlan mi ba blo.

²⁷ Heji yì jẹ aga Pisga tọn lọ mẹ, bo zé nukun towe lẹ dagá hlan whèyìhò dali, podọ hlan agewaji dali, podọ hlan huwaji dali, podọ hlan whèzẹtẹn dali, bo yí nukun towe lẹ do pọ́n: na hiẹ ma na yì Jọdani he gododọ̃n gba.

²⁸ Ṣigba naṣẹ Jọsua, bo dotuhomẹna ẹn, bo nahuhlọn ẹn: na ewọ wẹ na yì gododọ̃n to gbẹtọ he lẹ nukọn, ewọ wẹ nasọ hẹn yé nado yí aigba he hiẹ mọ lọ na ogú.

²⁹ Mowẹ mi nọte to agbadò lọ mẹ titegbè pannùkọn Beti-peoli.