Deutelonomi 27 - BIBLU WIWE LỌ 1923

¹ MOSE po mẹho Islaeli tọn lẹ lọ po degbèna gbẹtọ lẹ, dọmọ, Mì nọ payi gbèdide he yẹn dègbèna mì to egbé he lẹpo go.

² E bo na yín to azán lọ gbè whenuena mì na juyi jọdani gododọ̃n jẹ aigba he OKLUNỌ lọ Jiwheyẹwhe towe na we lọ ji, we hiẹ na zé zannu daho le dote na dewe, bo yí whóyinyan do tlẹ yé:

³ hiẹ bo na wlan ohó osén he tọn lẹpo do yé ji, whenuena yè hẹn we juyi gododọ̃n; na hiẹ nido yì jẹ aigba he OKLUNỌ lọ Jiwheyẹwhe towe na we lọ mẹ, aigba yí anọ́sìn po owín po do to sisà de, dile OKLUNỌ lọ, Jiwheyẹwhe otọ́ towe lẹ tọn lọ, ko gblọnadanna we do.

⁴ E nasọ yin whenuena mì juyi Jọdani gododọ̃n, wẹ mì na zé zannu helẹ dote, he yẹn degbèna mì to egbé he, to osé Ebali mẹ, hiẹ bo nasọ yí whéyinyan dó tlẹ yé.

⁵ Finẹ wẹ hiẹ na do agbà de hlan OKLUNỌ lọ Jiwheyẹwhe towe te, agbà zannu lẹ tọn de: hiẹ ma na zé azónwànu ogàn tọn de daga do yé ji gba.

⁶ Zannu mapamapa lẹ wẹ hiẹ na do do agbà OKLUNỌ lọ Jiwheyẹwhe towe tọn lọ: hiẹ nasọ yi avọ́nunina mimẹ̀ lẹ na to fìnẹji hlan OKLUNỌ lọ Jiwheyẹwhe towe:

⁷ hiẹ nasọ nọ yí avọ́nunina jijọho tọn lẹ do sánvọ́, bo nasọ nọ dù to finẹ; hiẹ bo nasọ nọ jaya to OKLUNỌ lọ Jiwheyẹwhe towe nukọn.

⁸ Hiẹ nasọ wlan ohó osẹ́n he tọn lẹ lọ lẹpo do zannu lẹ lọ ji diun talala.

⁹ Moṣe po yẹwhenọ Levinu lẹ lọ po BỌ dọhó hlan Islaeli lẹpo, domọ, Islaeli È, nabọẹ, bo tùntóai; egbé he wẹ hiẹ tin lẹzùn gbẹtọ OKLUNỌ lọ Jiwheyẹwhe towe tọn lẹ.

¹⁰ Enewutu hiẹ na nọ sètónuna ogbè OKLUNỌ lọ Jiwheyẹwhe towe tọn, bo sọ basi gbèdide etọn lẹ po asẹdai etọn lẹ po, he yẹn degbèna we to egbé he.

¹¹ Moṣe sọ nasẹ gbẹtọ lẹ lọ to gbèdoponẹ, dọmọ,

¹² Ehelẹ na site to osé Gelizimi ji nado nọ dona gbẹtọ lẹ lọ, whenuena yè hẹn mì juyi Jọdani gododọn; Simeoni, po Levi po, po Juda po, po Issakali po, po Josefu po, po Bẹnjamini po:

¹³ podọ ehelẹ wẹ nasọ ṣite to osé Ebali ji na dẹhodo lọ; Leubeni, Gadi, po Aṣeli po, po Zẹbuluni po, Dani, po Naftali po.

¹⁴ Levinu lẹ lọ na nọ yi ogbè lélé de do gblọn, bo dọ hlan omẹ Islaeli tọn lẹ lọ lẹpo dọ.

¹⁵ Dèhodonọ omẹ lọ yin he basi boṣiọ pipa kavi kinkọ̀n de, osùnú de hlan OKLUNỌ lọ, azọ́n alọ ananọ lọ tọn lẹ lọ tọn, bo zé e dote to nuglọ. Gbẹtọ lẹ lọ lẹpo nasọ gblọn bo dọ, Niṣẹ.

¹⁶ Dẹhodonọ ewọ yin he ma hò otọ́ etọn kavi onọ etọn pọ́n. Gbẹtọ lẹ lọ lẹpo bo na dọ, Niṣẹ.

¹⁷ Dẹhodonọ ewọ yín he sẹtẹnna aigbahia kọmẹnu etọn tọn. Gbẹtọ lẹ lọ lẹpo bo na dọ Niṣẹ.

¹⁸ Dèhodonọ ewọ yín he hen nukuntọ́nnọ lọ nado danbu sọn aliho lọ ji. Gbẹtọ lẹ lọ lẹpo bo na dọ, Niṣẹ.

¹⁹ Dèhodonọ ewọ yín he gada whẹ̀dida ojónọ lọ tọn, tọsiọvi, po asúsiọsi po. Gbẹtọ lẹ lọ lẹpo bo na dọ, Niṣẹ.

²⁰ Dẹhodonọ ewọ yín he Kòndopọ hẹ asi otọ́ etọn tọn; na é ko hùn avọ̀ otọ́ etọn tọn wutu. Gbẹtọ lẹ lọ lẹpo bo na dọ, Niṣẹ.

²¹ Dẹhodonọ ewọ yín he kondopọ hẹ kanlin hunkọ depope tọn. Gbẹtọ lẹ lọ lẹpo bo na dọ, Niṣẹ.

²² Dẹhodonọ ewọ yín he kòndopọ hẹ nọviyọnnu etọn, viyọnnu otọ́ etọn tọn, kavi viyọnnu onọ etọn tọn. Gbẹtọ lẹ lọ lẹpo bo na dọ, Niṣẹ.

²³ Dẹhodonọ ewọ yín he kòndopọ hẹ onọ asi etọn tọn. Gbẹtọ lẹ lọ lẹpo bo na dọ, Niṣẹ.

²⁴ Dẹ̀hodonọ ewọ yín he linú kọmẹnu etọn to nuglọ. Gbẹtọ lẹ lọ lẹpo bo na dọ, Niṣẹ.

²⁵ Dẹ̀hodonọ ewọ yin he yí nunina nado hù gbẹtọ homẹvọnọ de. Gbẹtọ lẹ lọ lẹpo bo na dọ, Niṣẹ.

²⁶ Dèhodonọ ewo yín he ma hẹn ohó oṣén he tọn lẹ lọ lódo nado nọ basi yé. Gbẹtọ lẹ lọ lẹpo bo na dọ, Niṣẹ.