Deutelonomi 26 - BIBLU WIWE LỌ 1923

¹ E nasọ yín, whenuena hiẹ yín hinhẹn wá jẹ aigba he OKLUNỌ lọ Jiwheyẹwhe towe na we na ogú de lọ ji, bo tindo e, bo sọ nọnọ̀ finẹmẹ;

² wẹ hiẹ na dè sọn sinsén aigba lọ tọn lẹpo mẹ, he hiẹ na hẹn sọn aigba towe he OKLUNỌ lọ Jiwheyẹwhe towe na we lọ mẹ wá whégbè; hiẹ nasọ yí i do oha de mẹ, bo na yì jẹ otẹn he OKLUNỌ lọ Jiwheyẹwhe towe na dè, nado hẹn oyín etọn nado nọnọ̀ finẹ lọ mẹ.

³ Hiẹ nasọ wá yẹwhenọ he na tin to azán nẹlẹ mẹ lọ de, bo dọ hlan ẹn dọ, Yẹn yigbè to egbé he hlan OKLUNỌ lọ Jiwheyẹwhe towe, dọ yè hẹn mi wá jẹ aigba he OKLUNỌ lọ whle hlan otẹ mítọn lẹ na nado na mí lọ ji.

⁴ Yẹwhenọ lọ bo na yí oha lọ Sọn alọ towẹ mẹ, bo zé e dai to agbà OKLUNỌ lọ Jiwheyẹwhe towe tọn lọ nukọn.

⁵ Hiẹ bo na gblọn bo dọ to OKLUNỌ lọ Jiwheyẹwhe towe nukọn dọ, Silianu búbútọ de wẹ otọ́ se, é bo sọ jẹte yì Egipti mẹ, bo wáwáṣi finẹ, vude to osọha mẹ; e bo sọ lẹzùn akọta de to finẹ daho, hlọnhlọnnọ, podọ sùsùnọ:

⁶ Egiptinu lẹ lọ sọ zán mí ylankan, bo bianukunna mí, bo sọ zé afànuzọ́n sinsinyẹn do mí ji:

⁷ mí bo sọ dawhá hlan OKLUNỌ lọ, Jiwheyẹwhe otọ́ mítọn lẹ tọn lọ, OKLUNỌ lọ sọ sè ogbè mítọn, bo sọ pọ́n nukunbibia mítọn, po magbọjẹ mítọn po, po awusinyẹn mítọn po:

⁸ OKLUNỌ lọ bo sọ hẹn mí jẹgbonu sọn Egìpti mẹ wá po alọ hlọnhlọnnọ de po, podọ po awà dindlẹn jẹgbonu de po, podọ po awujiji daho po, podọ po ohia lẹ po, podọ po nujawu lẹ po:

⁹ é bo ko sọ hẹn mí wá jẹ otẹn he mẹ, bo ko sọ na aigba he mí, aigba yí anọ́sìn po owín po do to sisà de.

¹⁰ Podọ dinvie, dayi e go, yẹn ko hẹn sọn sinsẹ́n tintan aigba lọ tọn mẹ wá, he hiẹ, OKLUNỌ È, ko na mí, Hiẹ nasọ zé e dai to OKLUNỌ lọ Jiwheyẹwhe towe nukọn, bo sọ litai to OKLUNỌ lọ Jiwheyẹwhe towe nukọn:

¹¹ hiẹ nasọ to ayajẹ to dagbe he OKLUNỌ lọ Jiwheyẹwhe towe ko na hlan we lẹpo mẹ, podọ hlan owhé towe, hiẹ, po Levinu lọ po, po ojónọ he tin to gblagbla towé mẹ lọ po.

¹² Whenuena hiẹ ko basi opòdo madaonina madao jideji towe tọn lẹpo tọn de to owhè atọ̀ntọ lọ mẹ, he yín owhè madaonina tọn lọ, whenẹnu wẹ hiẹ na yí Í na hlan Levinu lọ, hlan ojónọ lọ, hlan tọsiọvi lọ, podọ hlan asusiọsi lọ, na yé nido dù to hòngbo towe lẹ hòmẹ, bo yín gigọ́;

¹³ hiẹ bo na dọ to OKLUNỌ lọ Jiwheyẹwhe towe nukọn dọmọ, Yẹn ko dè onú hìhio lẹ lọ sọn owhé ṣie gbé, podọ bo ko yí yé na hlan Levinu lọ, podọ hlan ajónọ lọ, hlan tọsiọvi lọ, podọ hlan asúṣiọsi lọ, kẹdẹdi gbèdide towe lẹpo he hiẹ ko degbèna mi: Yẹn ma jẹsénmẹna ode sọn gbèdide towe lẹ mẹ gba, mọ yẹn ma sọ wọn yé gbà:

¹⁴ yẹn ma ko dù sọn e mẹ to awubla ṣie mẹ gba, mọ yẹn ma ko sọ dè sẹ̀ sọ̀n e mẹ gba, yínyín mawé, kavi na sọn e mẹ ná oṣiọ lọ gba: yẹn ko tuntóai hlan ogbè OKLUNỌ lọ Jiwheyẹwhe ṣie tọn, yẹn ko wà kẹdẹdi ehe hiẹ degbèna hlan mi lẹpo.

¹⁵ Pọ́n odò sọn fininọ wiwe towe mẹ, sọn ólọn mẹ, bo dona Islaeli omẹ towe lẹ, po aigba hé hiẹ ko na mí lọ po, dile hiẹ ko whle hlan ọtù mítọn lẹ do, aigba yí anọ́sìn po owín po do to sisà de.

¹⁶ OKLUNỌ lọ Jiwheyẹwhe towe degbèna we to egbé he nado nọ basi asẹdai helẹ po whẹ̀dida lẹ po: enẹwutu hiẹ na nọ yí ayiha towe lẹpo, podọ po alindọn towe lẹpo po do payi yé go.

¹⁷ Hiẹ ko yígbèna OKLUNỌ lọ to egbé he nado nọ yín Jiwheyẹwhe towe, podọ hiẹ na nọ zinzọnlin to ali etọn lẹ lọ mẹ, bo nọ payi asẹdai etọn lẹ go, po gbèdide etọn lẹ po, po whẹ̀dida etọn le po, bo sọ nọ tùntóai hlan ogbè ẹtọn.

¹⁸ OKLUNỌ lọ ko sọ yígbèna we to egbe he nado nọ yín gbẹtọ gbọnvò de hlan ede, dile é ko gblọnadanna we do, podọ hiẹ do nọ ayi gbèdide etọn lẹpo go:

¹⁹ podọ nado ẹn we yìjì hugan akọta he é ko basi lẹpo, na pipa de, podọ na oyín de, podọ na ogbégbigbo de; podọ na hiẹ nido yín gbẹtọ wiwe de hlan OKLUNỌ lọ Jiwheyẹwhe towe, dile é ko dọhó do.