Deutelonomi 25 - BIBLU WIWE LỌ 1923

¹ EYÍN nudindọn de tin to omẹ awe ṣẹnṣẹn, bọ yé wá jẹ whẹ̀dida tẹnmẹ, bọ whẹdatọ lẹ dawhẹna yé; whenẹnu yé na sùwhèna dódónọ lọ, bo sọ gblewhẹdo mẹylankan lọ;

² e nasọ yín, eyín mẹylankan lọ tin jẹ nado yín hihò, wẹ whẹdatọ lọ na hẹn ẹn nado mlọn ai, podọ nado yín hihò to nukun etọn mẹ nukọn, kẹdẹdi ylankan etọn gbọn osọha dali.

³ E sọgan na obá kande e, é ma na na zẹmọgo gba: eyín ewọ na na zèmọgo, bo yí obá sùsù do hò e hugan ehelẹ, whenenu mẹmẹsunnu etọn nikã sọawúhia ovlẹnọ hlan we.

⁴ Hiẹ ma na doajanúna oyín lọ whenuena é to gbadó lọ tùn gba.

⁵ Eyín mẹmẹsunnu lẹ nò opọ́, bọ dopo sọn yé mẹ kú, bo ma tindo visunnu de gba, asi oṣiọ lọ tọn ma na wlealọ to gbonu hlan ojónọ de gba: nọvisunnu asú etọn tọn na yì hòmẹ jẹ e de, bo yí i hlan e de hlan asi, bo yí azon yiwà nọvisunnu asú tọn de tọn wà hlan ẹn.

⁶ È nasọ yín, dọ oplọnji he ewọ na ji lọ na yítẹn to oyín nọvisunnu etọn he yín oṣiọ tọn lọ mẹ, na oyín etọn yín gbigbidi sọn íslaeli mẹ blo.

⁷ Podọ eyín sunnu lọ ma jlo nado yí asi nọvisunnu etọn tọn gba; whenenu asi nọvisunnu etọn tọn na hẹji yí jẹ hòngbo lọ kòn jẹ mẹho lẹ lọ de, bo dọmọ, Nọvisunnu asú ṣie tọn gbé nado fọ́n oyín de daga hlan nọvisunnu etọn to Islaeli mẹ, é ma jlo yí aznyiwà nọvisunnu asú tọn de tọn wà hlan mi gba.

⁸ Whenẹnu mẹho tòdaho etọn tọn lẹ lọ na ylọ ẹ, bo dọhó hlan ẹn: podọ eyín ewọ ṣite, bo dọmọ, Yẹn ma jlo nado yí i gba;

⁹ whenẹnu wẹ asi nọvisunnu etọn tọn na wá e de to nukọn mẹho lẹ lọ tọn, bo tún afọpa etọn sẹ sọn afọ etọn mẹ, bo sọ túntán do nukunmẹ etọn mẹ; é nasọ gblọn bo dọmọ, Mowẹ é na nọ yín wiwà do hlan sunnu lọ he ma gla ohò nọvisunnu etọn tọn gba.

¹⁰ Oyín etọn na nọ yín yiylọ to Islaeli mẹ dọ, Owhé ewọ he tindo afọpa etọn túntún tọn lọ.

¹¹ Whenuena sunnusi lẹ to avùnhò hẹ yénọzo omẹ de po awetọ po, bọ asi ode tọn dòn sẹpọ́ nado whlẹn asú etọn sọn alọ ewọ he to hihò e tọn mẹ, bo dè alọ etọn jẹgbonu, bo bé oglọ hẹn nẹ:

¹² whenẹnu hiẹ na sán alọ etọn sẹ, nukun towe ma na tindo awubla de gba.

¹³ Hiẹ ma na tindo opẹ́n alọpalọpa lẹ to apo towe mẹ gba, daho de po pẹvi de po.

¹⁴ Hiẹ ma na tindo ojlẹnu alọpalọpa lẹ to ohọ̀ towe mẹ gba, daho de po pẹvi de po.

¹⁵ Opén pipé podọ gigẹ́ de wẹ hiẹ na tindo; podọ ojlẹnu pipé podọ gigẹ de wẹ hiẹ na tindo: na azán towe nido dẹn to aigba he OKLUNỌ lọ Jiwheyẹwhe towe na we ji.

¹⁶ Na omẹ he wà onú mọnkọ lẹ lẹpo, yèdọ omẹ he yí mawàdódó do wà lẹpo, wẹ osùnú de hlan OKLUNỌ lọ Jiwheyẹwhe towe.

¹⁷ Flin núhe Amalẹki wà hlan we to alihojilemì jẹgbonu sọn Egipti mẹja;

¹⁸ le é pé we to aliho do, bo gbà yé godopete towe tọn lẹ do, yé he yín madogannọ to godo towe lẹpo, whenuena hiẹ yín kúkúsiọ podọ agbọpénọ; bọ ewọ ma dibusi Jiwheyẹwhe gba.

¹⁹ Enẹwutu é na yín, whenuena OKLUNỌ lọ Jiwheyẹwhe towe ko na ogbọjẹ we sọn kẹ̀ntọ towe lẹpo mẹ lẹ́do pé, to aigba he OKLUNỌ lọ Jiwheyẹwhe towe na we na ogú de nado tindo e lọ ji, wẹ hiẹ na gbidi oflin Amalẹki tọn lọ sọn olọn glọ; hiẹ ma na wọn gba.