Deutelonomi 23 - BIBLU WIWE LỌ 1923

¹ EWỌ he yè doalán ogo na to okún lẹ lọ mẹ, kavi tindo awutugonu oglọ tọn etọn lẹ sinsán sẹ, ma na biọ agùnpipli OKLUNỌ lọ tọn mẹ gba.

² Ayòvi de ma na biọ agùnpipli OKLUNỌ lọ tọn mẹ gba; yèdọ jẹ whẹndo aotọ mẹ wẹ mẹdepope sọn etọn lẹ de mẹ ma na do biọ agùnpipli OKLUNỌ lọ tọn mẹ.

³ Amoninu de kavi Moabinu de ma na biọ agùnpipli OKLUNỌ lọ tọn mẹ gba; yèdọ jẹ whẹndo aotọ mẹ wẹ omẹ depope he yín yé tọn ma na do biọ agùnpipli OKLUNỌ lọ tọn mẹ kakadoi:

⁴ na yé ma yí akla podọ po osìn po do pé mì to aliho ji whenuena mí jẹgbonu sọn Egipti mẹ ja wutu; podọ na yé dà Balaami visunnu Beoli tọn lọ do oji we sọn Petọli Mesopotami tọn mẹ, nado hodèdo wẹ wutu.

⁵ Gãnṣo OKLUNỌ lọ Jiwheyẹwhe towe ma jlo tùntóai hlan Balaami gba; ṣigba OKLUNỌ lọ Jiwheyẹwhe towe lé dẹhodo lọ do odona de mẹ hlan we, na OKLUNỌ lọ Jiwheyẹwhe towe yiwanna we wutu,

⁶ Hiẹ ma na din jijọho yetọn gba kavi dagbe yetọn to azán towe lẹpo mẹ kakadoi.

⁷ Hiẹ ma na gbẹwanna Ẹdominu de gba; na nọvisunnu towe wẹ ewọ: hiẹ ma na gbẹwanna Egiptinu de gba; na hiẹ yín ojónọ to aigba etọn ji wutu

⁸ Ovi whẹndo atọ̀ntọ tọn lẹ he yè ji hlan yé na biọ agùnpipli OKLUNỌ lọ tọn mẹ.

⁹ Whenuena hiẹ jẹgbonu yì awhànfuntẹn mẹ to kẹ̀ntọ towe lẹ ji, whenẹnu hiẹ na whla dewe sọn onú ylanylan lẹpo mẹ.

¹⁰ Eyín sunnusi de tin mí ṣẹnṣẹn finẹ, he yín mawénọ gbọn enẹ he dùkọsọna ẹn to zánmẹ tọn dali, whenẹnu wẹ ewọ na jẹgbonu yì sọn osla lọ mẹ, ewọ ma na wá osla lọ hòmẹ gba:

¹¹ ṣigba é na yín, whenuena whèjai ja, é na do ede osìn mẹ: podọ whenuena owhè tin todò, ewọ na wá osla lọ hòmẹ.

¹² Hiẹ na tìndọ otẹnmọ de to osla lọ godo ga fie hiẹ na nọ tòn jẹgbonu yì;

¹³ hiẹ na tindo dòkùnnu de to adanwànu towe lẹ mẹ; é bo nasọ yín, whenuena hiẹ sinai to gbonu, hiẹ na yí do nọ kùndò bo sọ lẹ́ godo bo ṣinyọnnudo enẹ he sọn hiẹ mẹ wá.

¹⁴ Na OKLUNỌ lọ Jiwheyẹwhe towe to zọnlinzin to gblagbla osla towe tọn mẹ, nado whlẹn we, podọ nado jó kẹ̀ntọ towe lẹ to nukọn towe; enẹwutu wẹ osla towe na yín wiwe: dọ ewọ mọ onú mawénọ de to hiẹ mẹ bo lẹ̀ sọn hie de blo.

¹⁵ Hiẹ ma na jó devi he sí sọn mẹmẹnu etọn de jẹ de we de hlan mẹmẹnu etọn gba;

¹⁶ ewọ na nò de we, to gblagbla towe mẹ, to otẹn he é na dè to ọhò dopo hòngbo towe lẹ tọn mẹ, fie jlo e hugan; hiẹ ma na bianukunna ẹn gba.

¹⁷ Galọtọ de ma na tin finẹ sọn viyọnnu Islaeli tọn lẹ mẹ gba, mọ Sọdọmijijọnọ de ma nasọ tin visunnu Islaeli tọn lẹ lọ mẹ finẹ gba.

¹⁸ Hiẹ ma na hẹn opakàkuẹ galilọ tọn de wá, kavi azọ́nkuẹ avún de tọn jẹ ohò OKLUNỌ lọ Jiwheyẹwhe towe tọn mẹ na opadido depope gba: na yèdọ awe helẹ yín osùnú de hlan OKLUNỌ lọ Jiwheyẹwhe towẹ.

¹⁹ Hiẹ ma na yàn to ale ma di osẹ̀n tọn ji hlan nọvisunnu towe gba; ale ma di osẹ̀n tọn akuẹ tọn, ale ma di ọsòn tọn núdùdù tọn, ale ma di osén tọn onú depope yè yàn to ale ma di osẹ̀n tọn ji tọn:

²⁰ hiẹ sọgan yàn hlan gbéjinu de to ale ma di osẹ̀n tọn ji; ṣigba hiẹ ma na yàn to ale ma di osẹ̀n tọn ji hlan nọvisunnu towe gba: na OKLUNỌ lọ Jiwheyẹwhe towe nido dona we to ehe hiẹ zé alọ towe hlan lẹpo mẹ, to aigba fie mẹ hiẹ jei nado tindo e lọ ji.

²¹ Whenuena hiẹ na dopa de hlan OKLUNỌ lọ Jiwheyẹwhe towe, hiẹ ma na yin awugbọ̀pònọ nado sú i gba: na OKLUNỌ lọ Jiwheyẹwhe towe na kan ẹn biọ sọn de we dandan; é bo na yin oylando de to hiẹ mẹ.

²² Ṣigba eyín hiẹ na doalọte nado dopa, é ma yin oylando de to hiẹ mẹ gba.

²³ Enẹ he jẹgbonu yi sọn nùflo towe lẹ mẹ hiẹ na payido bo wà; kẹdẹdile hiẹ ko dopa hlan OKLUNỌ lọ Jiwheyẹwhe towe do, avọ́nunina ojlonọ de, he hiẹ ko yí onù towe do gblọnadanna.

²⁴ Whenuena hiẹ wá jẹ ovẹ̃npa kọmẹnu towe tọn mẹ, whenẹnu hiẹ sọgan dù vẹ̃nsinsẹ́n hògigó towe to awuvivò towe titi mẹ: ṣigba hiẹ ma na bẹ́ depope do núzinzán towe mẹ gba.

²⁵ Whenuena hiẹ wá jẹ ogle gbadó kọmẹnu towe tọn lọ tọn mẹ, whenẹnu hiẹ sọgan yi alọ towe do flán gbadó lẹ lọ; ṣigba hie ma na dè agbògọdọẹ je ogle gbadó kọmẹnu towe tọn lọ tọn mẹ gba.