Deutelonomi 22 - BIBLU WIWE LỌ 1923

¹ HIẸ ma na mọ oyin nọvisunnu towe tọn kavi lẹngbọ etọn to bubu yì, bo whla dewe sọn yé de gba: hiẹ nasọ hẹn yé wá nọvisunnu towe de dandan.

² Podọ eyín nọvisunnu towe ma tin to yakẹ hlan de we gba, kavi eyín hiẹ ma yọ́n ẹn gba, whenẹnu hiẹ na hẹn ẹn wá whégbè jẹ ohọ̀ towe mẹ, é bo na tin to de we kaka nọvisunnu towe na to dindin in, hiẹ bo nasọ gò ẹ jó hlan ẹn.

³ Mọ hiẹ na nọ wà hẹ kẹtẹkẹtẹ etọn; podọ mọ wẹ hiẹ na nọ wà hẹ avọ̀ etọn; mọ wẹ hiẹ na nọ wà hẹ onu bubu sọn nọvisunnu towe tọn lẹpo mẹ, he ewọ ko hẹnbu bọ hiẹ ko mọ: hiẹ ma sọgan whla dewe gba.

⁴ Hiẹ ma na mọ kẹtẹkẹtẹ nọvisunnu towe tọn kavi oyin etọn aijije to aliho ta, bo whlá déwe sọn yé dé gba: hiẹ na gọalọna ẹn dandan nado zé yé tite.

⁵ Yọnnusi de ma na yí enẹ he yín sunnusi de tọn do gba, mọ sunnusi de ma nasọ yí avọ̀ yọnnusi de tọn do ogo gba: na mẹdepope he wà onú helẹ yín osùnú de hlan OKLUNỌ lọ Jiwheyẹwhe towe.

⁶ Eyín adọ́ ohẹ de tọn dukosọ nado tin to nukọn towe to ali lọ ho, to atin de mẹ kavi to aigba lọ ji, po ovi lẹ po kavi azìn lẹ, bọ onọ lọ javà do ovi lọ lọ ji, kavi do azìn lẹ lọ ji, hiẹ ma na bẹ onọ po ovi lẹ lọ po gba:

⁷ to alọ depope mẹ hiẹ na gbọ onọ lọ ni yì, ṣigba hiẹ sọgan bẹ ovi lẹ lọ hlan dewe; na é nido yin dagbe to de we, podọ na hiẹ nidò hẹn azán towe lẹ dẹn.

⁸ Whenuena hiẹ do ohò yọ́yọ́ de, whenẹnu hiẹ na basi oglọn de na ohọ̀ta towe, dọ hiẹ hẹn ohùn wá ohò towe ji eyín omẹ de flẹ́ sọn finẹyì blo.

⁹ Hiẹ ma na yí okún wunmẹ awe do do ovẹ̃npa towe gba, sinsẹ́n lọ pete okún he hiẹ ko do lọ po jideji ovẹ̃npa lọ tọn po nikã yin hinhẹn flu.

¹⁰ Hiẹ ma na yí oyin de po kẹtẹkẹtẹ po do pògle dopọ gba,

¹¹ Hiẹ ma na do avọ̀ flusọ de gba, lẹngbọfun po àgbo po dopọ gba.

¹² Hiẹ na basi okẹyẹ lẹ do otónu ẹnẹ awu towe tọn lẹ go, he hiẹ do nọ ṣinyọn dewe.

¹³ Eyín sunnusi de dà asi de bo yi họ̀mẹ jẹ e de, bo sọ gbẹwanna en,

¹⁴ bo hia onú hùwinyan lẹ do okọ̀ nẹ, bo hẹn oyìn ylanylan de wá e ji, bo dọmọ, Yẹn yi yọnnu he, podọ whenuena yẹn wá sẹpo jẹ e de, yẹn ma mọ ohia ogbèji tọn lẹ to ewọ mẹ gba:

¹⁵ whenẹnu wẹ otọ́ yọnnuvú lọ tọn, po onọ etọn po, na yí bo hẹn ohia ogbèji yọnnuvú lọ tọn lẹ tọn jẹgbonu wá je mẹho tòdaho lọ tọn lẹ de to họngbo lọ mẹ:

¹⁶ otọ́ yọnnuvú lọ tọn nasọ dọ hlan mẹho lẹ lọ dọmọ, Yẹn ko viyọnnu ṣie hlan dawe he hlan asi, é bo sọ gbẹwan nẹ̃;

¹⁷ bo, dayi e go, é ko sọ hia onú hùwinyan lẹ do okọ̀ nẹ, dọmọ, Yẹn ma mọ ohia ogbèji tọn lẹ to viyọnnu towe mẹ gba; mọ ohia ogbèji viyọnnu ṣie tọn lọ tọn lẹ ka wẹ ehelẹ. Yé bo na dlẹn avọ̀ lọ to mẹho tòdaho lọ tọn lẹ lọ nukọn.

¹⁸ Mẹho tòdaho nẹ tọn lẹ lọ nasọ yí dawe lọ bo hò e;

¹⁹ yé bo na sàwhẹ̀do e to ṣekẹli fataka tọn kanweko mẹ, bo bé yé na hlan otọ́ yọnnuvú lọ tọn, na ewọ ko hẹn oyín ylanylan de wá awhli Islaeli tọn de ji wutu: ewọ bo nasọ yín asi etọn, é ma sọgan gbé ẹ to azán etọn lẹpo mẹ gba.

²⁰ Ṣigba eyín onú he yín nugbo, ohia ogbèji tọn lẹ lọ ma yín mimọ to yọnnuvú lọ mẹ gba.

²¹ Whenẹnu wẹ yé na hẹn yọnnuvú lọ jẹgbonu wá jẹ ohòn owhé otọ́ etọn tọn lọ tọn ji, sunnusi tòdaho etọn tọn lẹ nasọ yí zannu lẹ do dlanzannudo e na é ni kú: na é ko wà nujagò to Islaeli mẹ wutu, nado zán galilọ to owhé otọ́ etọn tọn gbè; mọwẹ hiẹ na dè oylan lọ sẹ̀ sọn gblagbla towe mẹ do.

²² Eyín sunnusi de yín mimọ kinkọndopọ hẹ yọnnu wlealọna de hlan asú de, whenẹnu yé awelẹ na kú, sunnu lọ he kọndopọ hẹ yọnnu lọ, po yọnnu lọ po: mọwẹ hiẹ na dè oylan lọ sẹ̀ sọn Islaeli mẹ do.

²³ Eyín yọnnuvú de tin he yín awhli de yín didà hlan asú de, bọ sunnusi de mọ ẹn to tòdaho lọ mẹ, bo kọ̀ndopọ hẹ ẹ;

²⁴ whenẹnu mì na hẹn yé awelẹ jẹgbonu jẹ ohọ̀ngbo todaho nẹ tọn lọ kọ̀n, mì bo na yí zannu lẹ do dlanzannudo yé, na yé ni kú; yọnnuvú lọ, na e ma dawhá wutu, tintin to to otoho vho lọ mẹ podọ sunnu lọ, na é ko hòhuwhẹ asi kọmẹnu etọn tọn wutu: mọwe hiẹ na dè oylan lọ sè sọn gblagbla towe mẹ do.

²⁵ Ṣigba eyín sunnusi de mọ yọnnuvú lọ he yè dà lọ to ogle mẹ bọ sunnusi lọ hẹn ẹn po huhlọn po, bo kòndopọ hẹ ẹ; whenẹnu sunnusi he kọndopo hẹ ẹ lọ kẹdẹ wẹ na kú:

²⁶ ṣigba hiẹ ma na wà núde hlan yọnnuvú lọ gba: oylando he jẹ na okú de ma tin to yọnnuvú lọ mẹ gba: na di whenuena omẹ de fọ́n do kòmẹnu etọn ji, bo hù i, yedọ mọwẹ owhẹho he te:

²⁷ na ewọ mọ en to dangbo: yọnnuvú didà lọ dawhá, bọ omẹ de ma tin finẹ nado whlẹn ẹn.

²⁸ Eyín Sunnusi de mọ yọnnuvú de he yín awhli de, he yè ma dà gba, bo tẹ́ do e go, bo kọ̀ndopọ hẹ ẹ, bọ yé yín mimọ;

²⁹ whenẹnu sunnusi he kọ̀ndopọ hẹ ẹ lọ na na ṣekẹli kandeao fataka tọn hlan otọ́ yọnnuvú lọ tọn, é bo nasọ yín asi etọn, na ewọ ko hòhuwhẹ ẹ wutu; ewọ ma sọgan gbẹ́ ẹ dai to azán etọn lẹpo mẹ gba.

³⁰ Sunnusi de ma na yí asi otò etọn tọn gba, bo ma nasọ hùn avọ̀ otọ̀ etọn tọn gba.