Deutelonomi 21 - BIBLU WIWE LỌ 1923

¹ EYIN omẹ de yín mimọ alantọsiọ to aigba he OKLUNỌ lọ Jiwheyẹwhe towe na we nado tindo e lọ ji, aimimlọn to ogle mẹ, bọ mẹhe ko linú in ma yín yinyọnẹn gba:

² whenẹnu mẹho towe lẹ po whẹdatọ towe lẹ po na jẹgbonu wá, yé nasọ jlẹ hlan tòdaho lẹ lọ he tin lẹ́do ewọ he yín alantọsiọ lọ:

³ e nasọ yín, dọ tòdaho lọ he tin sẹpò talala jẹ omẹ alantọsiọ lọ de yèdọ mẹho tòdaho nẹ tọn lẹ na yí oyìnsiwhe dopo sọn kanlinpó lọ mẹ, he yè ma ko yí do wàzòn, podọ he ma ko dòn to oglepọnu lọ mẹ.

⁴ Mẹho tòdaho nẹ tọn lẹ lọ na hẹn oyìnsiwhe lọ jẹte wá jẹ agbadò de mẹ po osìn sisà po, he yè ma pọ̀ mọ yè ma dó, bo na wẹ́n okọ̀ oyìnsiwhe lọ tọn finẹ to agbadò lọ mẹ:

⁵ yẹwhenọ lẹ visunnu Levi tọn lẹ lọ na wá sẹpò; na yé wẹ OKLUNỌ lọ Jiwheyẹwhe towe ko dè nado nọ wàdevizọ́n hlan ẹn, podọ nado nọ dona to oyín OKLUNỌ lọ tọn mẹ; podọ kẹdẹdi ohó yetọn wẹ nudindọn lẹpo po nulimẹ lẹpo po na te:

⁶ mẹho tòdaho nẹ tọn lẹ lọ lẹpo, mẹhe tin sẹpò talala hlan alantọsiọ lọ de, na klọ alọ yetọn lẹ do oyìnsiwhe lọ ta okò ehetọn yè ko wén to agbadò lọ mẹ:

⁷ yé nasọ gblọn bo dọmọ, Alọ mítọn lẹ ma I o kòn ohùn he dai gba, mọ nukun mítọn lẹ ma ko mọ ẹn gba.

⁸ OKLUNỌ E, jona Islaeli omẹ towe lẹ, mẹhe hiẹ ko fli lẹ, bo sọ dikena ohùn homẹvọnọ nado nọ̀ gblagbla Islaeli omẹ towe lẹ tọn mẹ blo. Ohùn lọ bo nasọ yín jijona yé.

⁹ Mọ hiẹ na dè ohùn homẹvọnọ lọ só sọn gblagbla towe mẹ do, whenuena hiẹ na wà enẹ he yín jlọjlọ to nukun OKLUNỌ lọ tọn mẹ.

¹⁰ Whenuena hiẹ jẹgbonu yì jẹ awhánfuntẹn do kẹ̀ntọ towe lẹ ji, bọ OKLUNỌ lọ Jiwheyẹwhe towe jó yé do alọ towe lẹ mẹ, bọ hiẹ bé yé yì mẹglọnọ.

¹¹ Bo mọ yọnnu whanpẹnọ de to mẹglọnọ lẹ lọ ṣẹnṣẹn, bọ hiẹ sọ tindo ojlo de hlan ẹn, bo na jlo yì i hlan we na asi;

¹² whenẹnu hiẹ na hẹn ẹn wá whégbè jẹ ohò towe mẹ; ewọ bo na lùn oda etọn, bo pà ofẹ̀n etọn lẹ;

¹³ e bo na klọ̀n avọ̀ mẹmẹglọ etọn tọn lọ sè sọn ogo, bo na nọnọ̀ ohọ towe mẹ bo yí otọ̀ etọn po onọ etọn po osùn dopo gigọ̀: to enẹgodo hiẹ na yì họ̀mẹ jẹ e de, bo yín asú etọn, ewọ bo nasọ yín asi towe.

¹⁴ E nasọ yín, eyín hiẹ ma tindo homẹvivi de to ewọ mẹ gba, whenẹnu hiẹ na gbọ e ni yì fie ewọ na jlo, ṣigba hiẹ ma na sà ẹ na akuẹ de lala gba, hiẹ ma na zán hẹ ẹ di kanlinmọ de gba, na hiẹ ko hòhuwhẹ ẹ wutu.

¹⁵ Eyín sunnusi de tindo asi awe ode mẹyiwanna podọ awetọ mẹgbẹwanna, bọ yé awelẹ sọ ji ọvi lẹ nò, mẹyiwanna lọ po mẹgbẹwanna lọ po; podọ eyín visunnu plọnji lọ yín ewọ he yè gbẹwanna tọn;

¹⁶ whenẹnu é na yín, to azán he gbè é hẹn visunnu etọn lẹ nado yígú enẹ he ewọ tindo tọn, wẹ ewọ ma na sọgan hẹn visunnu mẹyiwanna lọ tọn zùn plọnji to ogbẹ̀ whenu visunnu mẹgbẹwanna lọ tọn gba, he yín oplọnji lọ:

¹⁷ ṣigba ewọ na yígbèna oplọnji lọ, visunnu mẹgbẹwanna lọ tọn lọ, gbọn yẹndawe mimá ehe é tindo lẹpo tọn de nina ẹn dali: na ewọ wẹ ṣìṣẹ̀ huhlọn etọn tọn lọ; ojlọjẹ oplọnji lọ tọn etọn wẹ.

¹⁸ Eyín sunnusi de tindo visunnu adingbannọ de podọ atẹnọ, he ma na setónuna ogbè otọ̀ etọn tọn kavi ogbè onọ etọn tọn, podọ le yé tlẹ hò e sọ, ma tùntóai hlan yé gba:

¹⁹ whenẹnu wẹ otọ̀ etọn po onọ etọn po na hẹn e go, bo hẹn ẹn jẹgbonu wá jẹ mẹho tòdaho etọn tọn lẹ de, podọ jẹ họngbo otẹn oton tọn lọ ji;

²⁰ yé nasọ dọ hlan mẹho tòdaho etọn tọn lẹ lọ dọmọ, Vis-unnu mítọn he adingbannọ wẹ podọ atẹnọ, é ma jlo na sètonuna ogbè mítọn gba; dùvànọ de wẹ ewọ, podọ ahànnùmunọ de.

²¹ Omẹ tòdaho etọn tọn lọ lẹpo na yi zannu lẹ do dlanzannudo e, na é ni kú: mọwe hiẹ na dè oylan lọ sẹ̀ sọn gblagbla towe mẹ do; Islaeli lẹpo bo na sè, bò sínú.

²² Ẹyín sunnusi de ko wà ylando de he jẹ na okú, bọ ewọ sọ yin hùhù, bọ hiẹ zé e pla atin de go;

²³ agbasa etọn ma na nọ̀ atin lọ ji to ozán lẹpo mẹ gba, ṣigba hiẹ na di i to gbèdoponọ dandan; na ewọ he yè zépla yín mẹhòdẹ̀do sọn Jiwheyẹwhe de de: na hiẹ flu aigba towe blo he OKLUNỌ lọ Jiwheyẹwhe towe na we na ogú de.