Deutelonomi 20 - BIBLU WIWE LỌ 1923

¹ WHENUENA hiẹ jẹgbonu yì jẹ awhànfùntẹn do kẹ́ntọ towe lẹ ji, bo mọ osọ́ lẹ, po kẹkẹ lẹ po, po gbẹtọ hugan hiẹ de lẹ po, hiẹ ma na yín avosatọ na yé tọn gba: na OKLUNỌ lọ Jiwheyẹwhe towe tin to de we, he hẹn we hẹji sọn aigba Egipti tọn lọ ji wá.

² E bo nasọ yín, whenuena mìlẹ dọ̀n sẹpọ́ jẹ awhànfùntẹn lọ, wẹ yẹwhenọ lọ na dọnsẹpọ́ bo dọhó hlan gbẹtọ lẹ lọ,

³ bo na dọ hlan yé dọ, Eslaeli E, sè, mìlẹ dindọ̀n sẹpọ́ jẹ awhànfùntẹn to egbé he do kóntọ mìtọn lẹ ji: mì dike ayiha mìtọn kusiọ blo; mì dibu blo, kavi sisọ blo, mọ mí sọ yín avosatọ na yé tọn blo;

⁴ na OKLUNỌ lọ Jiwheyẹwhe mìtọn wẹ ewọ he to yìyì po mì po, nado hoavùn na mì hẹ kẹ́ntọ mìtọn lẹ, nado whlẹn mì

⁵ Azọ́ngan lẹ lọ nasọ dọhó hlan gbẹtọ lẹ lọ, dọmọ, Sunnusi tẹwẹ tin finẹ he ko gbá ohò yọ́yọ́ de, bo ma ko klan ẹn do wiwe? gbọ ni yì bo lẹ́gọ̀ do ohò etọn mẹ, ewọ nikã kú to awhànfùntẹn lọ mẹ bọ sunnusi devo klan ẹn do wiwe.

⁶ Podọ sunnusi tẹwẹ tin finẹ he ko do ovẹ̃npa de, bo mazán sinsẹ̀n etọn lọ? gbọ é ni yì bo lẹ́gọ̀ do owhé etọn gbè, ewọ nikã kú to awhànfùntẹn lọ mẹ, bọ sunnusi devo zán sinsẹ́n etọn.

⁷ Podọ sunnusi tẹwẹ tin finẹ he ko dà asi de, bo ma ko plan ẹn? gbọ é ni yì bo lẹ́gọ̀ do owhé etọn gbè, ewọ nikã kú to awhànfùntẹn lọ mẹ, bọ sunnusi devo plan ẹn.

⁸ Azọ́ngán lẹ lọ nasọ dọhó hlan gbẹtọ lẹ lọ dogó, yé nasọ dọmọ, Sunnusi tẹwẹ tin finẹ he yín obúnọ podọ ayíhakusiọnọ? gbọ é ni yì bo lógò do owhé etọn gbè, ayiha mẹmẹsunnu etọn lẹ tọn nikã yọ́ di ayiha etọn.

⁹ E nasọ yín, whenuena azóngán lẹ lọ ko basi opòdo hódidọ tọn de hlan gbẹtọ lẹ lọ, wẹ yé na dè awhàngán awhànpa lẹ tọn do gbẹtọ lẹ lọ nu.

¹⁰ Whenuena hiẹ dòn sepó jẹ tòdaho de kòn nado hoavùn hẹ ẹ, whenẹnu hiẹ ni la jijọho hlan ẹn.

¹¹ E nasọ yín, eyín é basi gbègbingblọn jijọho tọn na we, bo hùnhòn hlan we, whenẹnu é na yín, dọ gbẹtọ he yè mọ finẹmẹ lẹpo na lẹzùn sẹ́njọtọ hlan we, bo nasọ nọ sẹ́n we.

¹² Podọ eyín é ma na basi jijọho de po hiẹ po gba, adavo na basi awhàn hẹ we, whenẹnu hiẹ na doawhànlédo e:

¹³ podọ whenuena OKLUNỌ lọ jiwheyẹwhe towe jó e do alọ towe mẹ hiẹ na yi onù ohi lọ tọn do hò sunnusi etọn lẹ dopodopo:

¹⁴ ṣigba yọnnusi lẹ lọ, po omẹ flinflin lẹ lọ po, po kanlinyìnyìn lẹ lọ po, po ehe tin to tòdaho lọ mẹ lẹpo po, yèdọ ogblannú etọn lọ lẹpo, wẹ hiẹ na bẹ́ na amánanú de hlan dewe; hiẹ bo nasọ dù ogblannú kẹ́ntọ towe lẹ tọn lọ he OKLUNỌ lọ Jiwheyẹwhe towe ko na we.

¹⁵ Le wẹ hiẹ na wà hlan tòdaho lẹpo lọ he tin to olá boboe sọn de we, he ma yín ode sọn tòdaho akọta helẹ tọn mẹ.

¹⁶ Ṣigba sọn tòdaho akọta helẹ tọn lẹ mẹ, he OKLUNỌ lọ Jiwheyẹwhe towe na we na ogú de, hiẹ ma na whlen núdepope he gbigbọ dogbẹ́ gba:

¹⁷ ṣigba hiẹ na và yé gbidigbidi; Hitinu lọ, po Amolinu lọ po, po Kananinu lọ po, po Pelizinu lọ po, po Hivinu lọ po, po Jebusinu lọ po; dile OKLUNỌ lọ Jiwheyẹwhe towe ko degbèna we do:

¹⁸ na yé plọn mì nado nọ wà hodo osùnú yetọn lẹ blo, he yé ko wà hlan yẹwhe yetọn lẹ; mọ bọ mìlẹ do wàylando do OKLUNỌ lọ Jiwheyẹwhe mìtọn go.

¹⁹ Whenuena hiẹ na doawhànlẹ́do tòdaho de ojlẹ dindẹn de, to bibasi awhàn hẹ ẹ mẹ nado yí i, hiẹ ma na và atin etọn lẹ gbọn zinzán asiọvi de do yé ji dali gba; na hiẹ sọgan dù sọn yé mẹ, hiẹ ma na sán yé liai gba; na gbẹtọ wẹ atin danji tọn lọ, bọ é do yín didoawhànlédo na we?

²⁰ Atin lẹ lọ he hiẹ yọnẹn dọ yé ma yín na núdùdù gba, jãnwẹ hiẹ na và bo sọ sán yé liai; hiẹ nasọ do agbó lẹ do tòdaho he to awhàn basi hẹ we lọ ji, kaka é do họ.