Deutelonomi 2 - BIBLU WIWE LỌ 1923

¹ WHENẸNU mí sọ lé, bo yí gbójizọnlin mítọn yì zùngbo lọ mẹ gbọn aliho lọ dali jẹ Ohù Vẹ̃ lọ kòn, dile OKLUNỌ lọ dọhó hlan mi do: mí sọ lédo osé Seili azán susu.

² OKLUNỌ sọ dọhó hlan mi, dọmọ,

³ Mìlẹ ko lédo osé he dẹn sù: mì lẹ́ hlan agewaji dali.

⁴ Hiẹ ni bo nasẹ gbẹtọ lẹ lọ, dọmọ, Mìwlẹ tin nado jugbọn agboji mẹmẹsunnu mìtọn ovi Esau tọn lẹ lọ tọn dali, he nọnọ̀ Seili mẹ; yé nasọ yín avosatọ na mì tọn: enẹwutu mì ni yí ayipipa hlan mìde:

⁵ a hoavùn hẹ yé blo; na yẹn ma na na we sọn aigba yetọn mẹ gba, lala, sùsù sọmọ na afọpàhomẹ afọ tọn nado zindai ma gba: na yẹn ko yí osé Seili na hlan Esau na nútindo de wutu.

⁶ Mì na nọ họ̀ núdùdù sọn yé si na akuẹ, na mì nido nọ dù; mì nasọ nọ jẹ osìn sọn yé si ga na akuẹ, na mì nido nọ nù.

⁷ Na OKLUNỌ lọ Jiwheyẹwhe towe ko dona we to azọ́n alọ towe tọn lọ lẹpo mẹ: é ko yọ́n zọ̀nlinzinzin towe gbọn zùngbo daho he me: owhè kande helẹ mẹ OKLUNỌ lọ Jiwheyẹwhe towe ko tin po hi po; hiẹ ma ko gbọagbá núde ton gba.

⁸ Mowẹ mí juwáyì sọn mẹmẹsunnu mítọn ovi Esau tọn lẹ lọ de, he nọnọ̀ Seili mẹ, sọn aliho Alaba lọ tọn ji sọn Elati mẹ podọ sọn Ezioni-gebeli mẹ. Mí bo sọ lẹ́ bo juwàyì gbọn aliho zùngbo Moabi tọn lọ dali.

⁹ OKLUNỌ lọ sọ dọ hlan mi dọmọ, A hẹnhomẹgble Moabi blo, mọ a sọ hoavùn hẹ yé to awhànfùntẹn mẹ blo: na yẹn ma na na we sọn aigba etọn mẹ na nútindo de gba; na yẹn ko yí Ali na ovi Loti tọn lẹ lọ na nútindo de wutu.

¹⁰ (Emimi lẹ nọnọ̀ finẹmẹ hóhódai, gbẹtọ daho lẹ de, bo sọ sù, bo tónalun, di Anakimi lẹ lọ:

¹¹ ehelẹ ga wẹ vè hiana Lefaimi, di Anakimi lẹ lọ; ṣigba Moabinu lẹ lọ nọ ylọ yé dọ Emimi.

¹² Holinu lẹ ga nọnọ̀ Seili mẹ hóhódai, ṣigba ovi Esau tọn lẹ lọ yínukọnna yé: yé bo sọ và yé sọn yé nukọn, bo sọ nọnọ̀ otẹn yetọn mẹ; dile Islaeli wà hlan aigba nútindo etọn tọn lọ do, he OKLUNỌ lọ na hlan yé.)

¹³ Mì tite dinvie, mì ni jẹ tòpẹsẹ Zeledi lọ tọn gododọ̃n.

¹⁴ Azán lẹ lọ ehe mẹ mí sọn Kadesi-balnea me wá, kaka yè do hẹn mí wá tọ̀pẹsẹ Zeledi tọn gododọ̃n, yín owhè gbàntónnukunatọ̀n; kaka whẹndo omẹ awhàn tọn lẹ lọ tọn yín súsúdo sọn gblagbla osla lọ tọn mẹ, dile OKLUNỌ lọ whle hlan yé do.

¹⁵ Humọ alọ OKLUNỌ lọ tọn tin to yé ji nado và yé sọn gblagbla osla lọ tọn mẹ, kaka yé do yín súsúdo.

¹⁶ Mowẹ é sọ wá jọ, whenuena omẹ awhàn tọn lẹpo lọ yín susúdo podọ osiọ sọn gbẹtọ lẹ lọ ṣẹnṣẹn,

¹⁷ Wẹ OKLUNỌ lọ dọhó hlan mi, dọmọ,

¹⁸ Egbó hiẹ tin nadò juyì Ali gododọ̃n, agboji Moabi tọn lọ:

¹⁹ podọ whenuena hiẹ wá sẹpọ́ pànnukọn ovi Amọni tọn lẹ lọ, a hẹnhomẹgble yé blo, mọ a sọ hoavùn hẹ yé blo: na yẹn ma na na we sọn aigba ovi Amọni tọn lẹ lọ tọn mẹ na nutindo de gba: na yẹn ko yí i na hlan ovi Loti tọn lẹ lọ na nútindo de wutu.

²⁰ (Enẹ ga yín linlẹn do aigba Lefaimi tọn de mẹ: Lefaimi lẹ ko nọnọ̀ finẹmẹ hóhódai; ṣigba Amọninu lẹ lọ nọ ylọ yé do Zamzummimi;

²¹ gbẹtọ kiklo lẹ de, podọ sùsù, bo tọ́nalun, di Anakimi lẹ lọ; ṣigba OKLUNỌ lọ và yé to yé nukọn; yé sọ bọdo yé go, bo nọnọ̀ otẹn yetọn mẹ:

²² dile é wà na ovi Esau tọn lẹ do, he nọnọ̀ Seili mẹ, whenuena é và Holinu lẹ lọ sọn yé nukọn; yé bo sọ yinukọnna yé, bo nọnó oten yetọn mẹ yèdọ jẹ azán he gbè:

²³ po Awiminu lẹ lọ po he nọnọ̀ gbetatò lẹ mẹ kaka yi jẹ Gaza, Kaftolimi lọ, he jẹgbonu sọn Kaftoli mẹ wá và yé, bo sọ nọnó otẹn yetọn mẹ.)

²⁴ Mì tite mi yí gbéjizọnlin mìtọn, bo juyì agbadò Alnọni tọn lọ mẹ: dayi e go, yẹn ko jó Sihoni Amolinu lọ, ahọlu Hẹẹboni tọn, po aigba etọn po do alọ towe mẹ: só nado to yíyí i, bo sọ hoavùn hẹ ẹ to awhànfùntẹn mẹ.

²⁵ Azán he gbó wẹ yẹn na ṣẹ́ nado to avọ̀sisa towe po osi towe po yí do akọta lẹ lọ ji he tin to olọn pete glọ, mẹhe na sè linlin towe, bo na sisọ, bo nasọ tin to awufiẹ mẹ na towe tọn wutu.

²⁶ Yẹn sọ do mẹdagun lẹ hlan sọn zùngbo Kẹdemoti tọn Tọ mẹ jẹ Sihoni ahọlu Hẹṣbọni tọn lọ de po ohó jijọho tọn lẹ po, dọmọ,

²⁷ Gbọ yẹn ni gbọn aigba towe mẹ luntón: aligbo lọ ji wẹ yẹn na gbọn yì, yẹn ma na lẹ́ do alọ adusi kavi do amiyọn gba.

²⁸ Hiẹ na sà núdùdù na mi na akuẹ, na yẹn nido dù; bo sọ na osìn mi na akuẹ, na yẹn nido nù: gbọ yẹn ni gbọn aigba towe mẹ luntón to afọ ṣie ji kẹdẹ wẹ;

²⁹ dile ovi Esau tọn lẹ lọ he nọnó Seili mẹ, po Moabinu lẹ lọ po he nọnọ̀ Ali mẹ, wà hlan mi do; kaka yẹn do juyì Jọdani gododọ̃n jẹ aigba lọ mẹ he OKLUNỌ lọ Jiwheyẹwhe mìtọn na mí.

³⁰ Ṣigba Sihọni ahọlu Hẹṣbọni tọn lọ ma sọ jlo na gbọ na mí ni gbọn e dali luntón gba: na OKLUNỌ lọ Jiwheyẹwhe towe hẹn otù etọn sinyẹn, bo sọ hẹn ayiha jẹglo, na é nido jó e do alọ towe mẹ, dile e te to egbe he.

³¹ OKLUNỌ lọ sọ dọ hlan mi dọmọ, Dayi e go, Yẹn ko ṣè nado to Sihọni jó do alọ towe mẹ po aigba etọn po to nukọn towe: sè nado to yíyí i, na hiẹ nido yí aigba etọn na ogú.

³² Whenẹnu wẹ Sihọni jẹgbonu wá mí ji ewọ po omẹ etọn lẹpo po, jẹ awhànfùntẹn mẹ to Jahazi.

³³ OKLUNỌ lọ Jiwheyẹwhe mítọn jó e to mí nukọn; mí sọ hò e po visunnu etọn lẹ po, po omẹ etọn lepo po.

³⁴ Mí sọ yí tòdaho etọn lẹpo to ojlẹ nẹ mẹ, bo sọ và tòdaho sunnusi lẹ tọn dopodopo gbidigbidi, po yọnnu lẹ po po omẹ flinflin lẹ po; mí ma jo ode dai pò gba:

³⁵ kanlinyìnyìn lẹ sokẹdẹ wẹ mí yí na ogblannú de hlan mìde, po ogblannú tòdaho lọ lẹ tọn po he mí ko hó.

³⁶ Sọn Aloeli mẹ he tin to otónu agbadò Alnoni tọn lọ tọn go, podọ sọn tòdaho lọ mẹ he tin to agbadò lọ mẹ, yèdọ Gileadi, tòdaho he yìji gbahu na mí de ma tin finẹ gba: OKLUNỌ lọ Jiwheyẹwhe mítọn jo popo to mí nukọn:

³⁷ aigba ovi Amọni tọn lẹ tọn ṣokẹdẹ wẹ hiẹ ma na wá sẹpọ́ gba; awà otò Jabọki lọ tọn lẹpo, po todaho otò okọta tọn lọ lẹ po, po fidepope OKLUNỌ lọ Jiwheyẹwhe mítọn kóna mí po.