Deutelonomi 19 - BIBLU WIWE LỌ 1923

¹ WHENUENA OKLUNỌ lọ Jiwheyẹwhe towe na sán akọta lẹ lọ sẹ̀, aigba mẹhetọn OKLUNỌ lọ Jiwheyẹwhe towe na we, bọ hiẹ sọ yinukọnna yé, bo to tòdaho yetọn lẹ mẹ nọ̀, podọ to ohò yetọn lẹ mẹ;

² hiẹ na klan tòdaho atọ̀n dovo na dewe to gblagbla aigba towe tọn mẹ, he OKLUNỌ lọ Jiwheyẹwhe towe na we nado tindo e.

³ Hiẹ na dè aliho lọ na dewe, bo sọ má agboji aigba towe lọ tọn le, he OKLUNỌ lọ Jiwheyẹwhe towe hẹn we nado yigú, do ogbó atọ̀n mẹ, na mẹhùtọ dopodopo nido nọ họ̀nyì fìnẹ.

⁴ Podọ ehe wẹ owhèhó mẹhùtọ lọ tọn, he na nọ họ̀nyì finẹ bo gán: mẹdepope he hù kọmenu etọn madodego, bo ma gbẹwanna ẹn dai gbà;

⁵ di whenuena omẹ de jei zùnmẹ po kọmẹnu etọn po nado họ́ atin, bọ alọ etọn zé asiọvi lọ nado yí do sán atin lọ liai, bọ ogàn lọ sún sọn atin lọ mẹ, bo je kọmẹnu etọn go, bo é kú; ewọ na họ̀nyi jẹ dopọ tòdaho helẹ tọn mẹ bo gán:

⁶ ahọsuyítọ ohùn tón lọ nikã domọna mẹhùtọ lọ, whenuena ayiha etọn tin miyọnawu, bo pla ẹ, na aliho lọ dẹn wutu, bo linú in hù; linlẹn ewọ ma jẹ na okú, sọle ewọ ma gbẹwanna ẹn dai gba.

⁷ Enẹwutu yẹn degbèna we, dọmọ, Hiẹ na klan tòdaho atọ̀n dovo na dewe.

⁸ Podọ eyín OKLUNỌ ọ Jiwheyẹwhe towe hẹn agboji towe zùn daho, dile é ko whle hlan otọ́ towe lẹ do, bo na aigba lọ lẹpo we he é gblọnadanna nado na hlan otọ́ towe lẹ;

⁹ eyín hiẹ na payi gbèdide he lẹpo go nado nọ basi i, he yẹn degbèna we to egbé he, nado nọ yiwanna OKLUNỌ lọ Jiwheyẹwhe towe, podọ nado nọ zinzọnlin to ali etọn lẹ ji tẹgbẹ, whenẹnu wẹ hiẹ na dè tòdaho atọ̀n dogó na dewe, gọ́na atọ̀n helẹ:

¹⁰ Na ohùn omẹ homẹvọnọ de tọn yín kinkọ̀ndai to gblagbla aigba towe tọn mẹ blo, he OKLUNỌ lọ Jiwheyẹwhe towe na we na ogú de, mọ ohùn bo ha tin to oji we.

¹¹ Ṣigba eyín omẹ de gbẹwanna kọmẹnu etọn, bo tọwu dai nẹ̃, bo fọ́n tite do e ji, bo linú in sọmọ nado hẹn okú wá bọ é kú; bọ é sọ họ̀nyì jẹ dopo tòdaho helẹ tọn mẹ:

¹² whenẹnu mẹho tòdaho etọn tọn lọ na domẹhlan bo hẹn ẹn sọn finẹ wá, bo jó e do alọ ahọsuyitọ ohùn tọn lọ tọn mẹ, na é nido kú.

¹³ Nukun towe ma na blawuna ẹn gba, aigba hiẹ na dè ohùn homẹvọnọ lọ tọn sọn Islaeli mẹ, na é nido nọ yì dagbe to de we.

¹⁴ Hiẹ ma na sẹ́tẹnna aigbahia kọmẹnu towe tọn, he yé hóhótọ lẹ ko do, to ogú towe he hiẹ do yígú mẹ, to aigba he OKLUNỌ lọ Jiwheyẹwhe towe na we nado tindo e lọ mẹ.

¹⁵ Kunnudetọ dopo ma na fọ́n tite do omẹ de ji na oylankan de gba, kavi na ylando de, to ylando he ewọ do wàylando depope mẹ: do onù kunnudetọ awe tọn, kavi do onù kunnudetọ atọ̀n tọn, wẹ owhẹ́hó de na yín hinhẹn lodo.

¹⁶ Eyín kunnudetọ mawàdódónọ de fọ́n tite do omẹ de ji nado dekunnu atẹ̀ tọn do okò nẹ̃;

¹⁷ whenẹnu sunnusi awe lẹ, mẹhe ṣẹnṣẹn nudindọn lọ te lẹ, na site to OKLUNỌ lọ nukọn, to yẹwhenọ lẹ lọ nukọn po whẹ̀datọ lẹ lọ po he na tin to azán nẹlẹ mẹ;

¹⁸ whẹdatọ lẹ lọ na basi okanbiọ sọwhiwhe tọn: bo, dayi e go, eyín kunnudetọ lọ yín kunnudetọ lalonọ de, bo ko yí lalo do dekunnu do nọvisunnu etọn kọ;

¹⁹ whenẹnu wẹ mìlẹ na wà hlan ẹn, dile ewọ ko lẹn nado wà hlan nọvisunnu etọn do: mọwẹ hiẹ na dè oylan lọ sẹ̀ sọn gblagbla towe mẹ.

²⁰ Enẹlẹ he pò na sè, bo sinú, podọ sọn whenẹnu bo ma nasọ wà oylan mọnkọ depope to gblagbla towe mẹ ba gba.

²¹ Podọ nukun towe ma na blawu gba; ogbè na yi na ogbẹ́, nukun na nukun, adú na adú, alọ na alọ, afọ na afọ.