Deutelonomi 18 - BIBLU WIWE LỌ 1923

¹ Yẹwhenọ lẹ Levinu lẹ lọ, po whẹndo Levi tọn lọ lẹpo po, ma na tindo mimá de kavi ogú po Islaeli po gba: yé na nọ dù avọ́nunina OKLUNỌ lọ tọn lẹ basi gbọn miyọn dali lẹ, po ogú etọn po.

² Yé ma na tindo ogú de to mẹmẹsunnu yetọn lọ ṣẹnṣẹn gba: OKLUNỌ lọ wẹ ogu yetọn, dile é ko dọhó hlan yé do.

³ Ehe wẹ na yín onújọ yẹwhenọ lẹ lọ tọn sọn gbẹtọ lẹ lọ si, sọn yé he yí avósannu de na lẹ si, eyín é yín oyin kavi lẹngbọ, wẹ yé na yí abọ́ lọ na blan yẹwhenọ lọ, po aglan awe lẹ po, po adọgbó lọ po.

⁴ Sinṣéntintan gbadó towe tọn, po ovẹ̃n towe tọn po, po amì towe tọn po, po tintan ofún léngbọ towe lẹ tọn tọn po, wẹ hiẹ na na ẹn.

⁵ Na OKLUNỌ lọ Jiwheyẹwhe towe ko dè e sọn whẹndo towe lọ lẹpo mẹ, nado nọ site nado nọ wàdevizọ́n to oyín OKLUNỌ lọ tọn mẹ, ewọ po visunnu etọn lẹ po kakadoi.

⁶ Podọ eyín Levinu de sọn hòngbo towe lẹ depope ma jẹgbonu sọn Islaeli lepo mẹ wà, fie é wáwáṣi te, bo wá po ojlẹ alindọn etọn tọn lẹpo po jẹ otẹn he OKLUNỌ lọ na dè lọ mẹ;

⁷ whenẹnu é na nọ wàdevizọ́n to oyín OKLUNỌ lọ Jiwheyẹwhe etọn tọn mẹ, dile mẹmẹsunnu etọn Levinu lẹ lọ to wiwà do, he nọ site to OKLUNỌ lọ nukọn finẹ.

⁸ Yé na tindo mimá mọnkọ lẹ nado dù, dogó enẹ he sọn sisà otọ́gú etọn tọn mẹ wá.

⁹ Whenuena hiẹ yín hinhẹn wá jẹ aigba he OKLUNỌ lọ Jiwheyẹwhe towe na we lọ ji, hiẹ ma na plọn nado nọ wà hodo osùnú akota nẹlẹ tọn le gba.

¹⁰ Yè ma na mọ omẹ depope to de we finẹ he hen visunnu etọn kavi viyọnnu etọn nado ju gbọn miọn mẹ yì gba, ode he nọ zán asẹ, óde he nọ yí apajlẹnú basi, kavi afìnyọnnọ de, kavi ówọntọ de.

¹¹ Kavi bojlẹtọ de, kavi wédotọ de po gbigbọ aovi tọn de po, kavi azétọ de, kavi aṣẹtúndomẹtọ de.

¹² Na mẹdepope he wà onú helẹ yín osùnú de hlan OKLUNỌ lọ: na osùnú helẹ tọn wutu OKLUNỌ lọ Jiwheyẹwhe towe yàn yé jẹgbonu sọn nukọn towe.

¹³ Hiẹ na yín pipé to OKLUNỌ lọ Jiwheyẹwhe towe de.

¹⁴ Na akòta nẹlẹ, he hiẹ na yí na nútindo, nọ tùntóai hlan yé he nọ yí apajlẹnu basi lẹ, podọ hlan asẹnọ lẹ: ṣigba na hiẹ tọn, OKLUNỌ lọ Jiwheyẹwhe towe ma dikena we nado nọ wà mọ gba.

¹⁵ OKLUNỌ lọ Jiwheyẹwhe towe na zé Yẹwhegán de fọ́n hlan we sọn gblagbla towe mẹ, sọn mẹmẹsunnu towe lẹ mẹ, jijlẹ do ogo e; ewọ wẹ mì na tùntóai hlan;

¹⁶ kẹdẹdi ehe hiẹ jlo lẹpo sọn OKLUNỌ lọ Jiwheyẹwhe towe de to Holebi mẹ to azán agùnpipli lọ tọn mẹ, dọmọ, A dike yẹn sọ vọ̀ ogbè OKLUNỌ lọ Jiwheyẹwhe ṣie tọn sè blo, mọ a sọ dike yẹn mọ miyọn daho he ba blo, na yẹn kú blo.

¹⁷ OKLUNỌ lọ bo sọ dọ hlan mi dọmọ, Enẹ he yé ko dọ yé ko dọ dagbe.

¹⁸ Yẹn na zé Yẹwhegán de fọ́n na yé sọn mẹmẹsunnu yetọn lẹ mẹ, jijlẹ do ogo e; yẹn na yí ohó ṣie lẹ do onù etọn mẹ, é bo na dọhó hlan yé he yen degbèna ẹn lẹpo.

¹⁹ E bo na wá jọ, dọ mẹdepope he ma na tùntóai hlan ohó ṣie he é na dọ to oyín ṣie mẹ lẹ, yẹn na kan ẹn biọ sọn e de.

²⁰ Ṣigba yewhegánlọ he na yí unzizè do dọ ohó de to oyín ṣie mẹ, he yẹn ma ko degbèna ẹn nado dọ gba, kavi he na dọhó to oyin yẹwhe devo lẹ tọn mẹ, yẹwhegán doponẹ lọ na kú.

²¹ Podọ eyín hiẹ dọ to ayiha towe mẹ dọmọ, Nawẹ mí na yọ́n ohó he OKLUNỌ lọ ma ko dọ lọ do

²² Whenuena yẹwhegán de dọhó to oyín OKLUNỌ lọ tọn mẹ, eyín onú lọ ma hodo, kavi wá jọ gba, enẹ wẹ onú he OKLUNỌ lọ ma ko dọ lọ gba: yẹwhegán lọ ko yí unzizó do dọ ẹ, hiẹ ma na yín avosatọ na e tọn gba.