Deutelonomi 17 - BIBLU WIWE LỌ 1923

¹ Hiẹ ma na yí oyin le, kavi lẹngbọ de, hemẹ azọ̀n de te kavi núylanhun depope do sánvọ́ hlan OKLUNỌ lọ Jiwheyẹwhe towe gba: na osùnú de wẹ enẹ hlan OKLUNỌ lọ Jiwheyẹwhe towe.

² Eyín é yín mimọ to gblagbla towe mẹ, to depope hòngbo towe he OKLUNỌ lọ Jiwheyẹwhe towe na we lẹ lọ hòmẹ finẹ, sunnusi de kavi yọnnusi, he wà enẹ he yín oylan to nukun OKLUNỌ lọ Jiwheyẹwhe towe tọn mẹ, to sẹ́nmejijẹna alónu etọn mẹ,

³ bo ko yì bo sèn yẹwhe devo lẹ, bo litaìna yé, kavi owhè lọ, kavi osùn lọ, kavi depope Sọn awhànpa olọn tọn lọ mẹ, he yẹn ma degbèna;

⁴ bọ é yín didọ na we, bọ hiẹ ko sọ sè e, whenẹnu hiẹ na yí sọwhiwhe do dindona, bo, dayi e go, eyín é yín nugbo, bọ onú lọ sọ diun, dọ osùnú mọnkọ yín wiwà to Islaeli mẹ;

⁵ whenẹnu wẹ hiẹ na hẹn sunnusi nẹ kavi yọnnusi nẹ jẹgbonu wá, he ko wà onú ylanylan he, jẹ hòngbo lẹ lọ kọ̀n, yèdọ sunnu lọ po yọnnu lọ po; hiẹ nasọyí zannu lọ do dlanzannudo yé, bọ yékú.

⁶ Do onù kunnudetọ awe tọn, kavi kunnudetọ atọ̀n, wẹ ewọ he tin nado kú na yín hùhù; do onù kunnudetọ dopo tọn ewọ ma na yín hùhù gba.

⁷ Alọ kunnudetọ lẹ lọ tọn na yín tintan to e ji nado hù i, enẹgodo alọ gbẹtọ lẹ lọ lẹpo tọn. Mowẹ hiẹ na dè oylan lọ sẹ́ sọn gblagbla towe mẹ do.

⁸ Eyín owhẹ́ sinsinyẹn hugan de fọ́n to finẹ to whẹ̀dida mẹ na we, to ohùn po ohùn po ṣẹnṣẹn, to owhẹ́hó po whèhó po ṣẹnṣẹn, to núlimẹ po núlimẹ po ṣẹnṣẹn, yínyín owhẹ́ nudindọn tọn lẹ to họ̀ngbo towe lẹ hòme: whenẹnu wẹ hiẹ na fọ́n, bo hẹji yì jẹ otẹn he OKLUNỌ lọ Jiwheyẹwhe towe na dè lọ mẹ;

⁹ hiẹ bo na wá jẹ yẹwhenọ Levinu lẹ lọ de, podọ jẹ whẹ̀datọ he na tin to azán nẹlẹ mẹ lọ de: hiẹ bo nasọ kanbiọ; yé bo na do whẹ́dahó whẹ̀dida tọn lọ hia we:

¹⁰ hiẹ nasọ wà kẹdẹdi ohó whẹ́da tọn lọ he yé na dohia we sọn otẹn he OKLUNỌ lọ na dè nẹ mẹ; hiẹ bo na nọ payi nado nọ wà kẹdẹdi ehe yé na plọn we lẹpo.

¹¹ Kẹdẹdi ohó osẹ̀n he yé na plọn we lọ tọn, podọ kẹdẹdi whẹ̀dida he yé na dọ na we lọ, wẹ hiẹ na wà: hiẹ ma na lé jẹla sọn whèdahi he yé na dohia we lọ mẹ hlan alọ adusi mẹ, kavi hlan amiọn mẹ gba

¹² Podọ dawe lọ he yí unzizó do wà, to ma tùntóai hlan yẹwhenọ nẹ he nọ site nado wàdevizọ́n to finẹ to OKLUNỌ lọ Jiwheyẹwhe towe nukọn gba, kavi hlan whèdatọ lọ, yèdọ dawe nẹ na kú; hiẹ bo na dè oylan lọ sé sọn Islaeli mẹ.

¹³ Gbẹtọ lọ lẹpo bo na sè, bo sinú, bo ma sọ yí unzizó dò wà ba gba.

¹⁴ Whenuena hiẹ yín hinhen wá jẹ aigba he OKLUNỌ lọ Jiwheyẹwhe towe na we lọ ji, bo na tindo e, bo na nonọ̀ finẹmẹ; bo na dọmọ, Yẹn na do ahọlu de do oji e, di akọta he tin lẹ́do mi pé lọlẹpo;

¹⁵ mẹhe OKLUNỌ lọ Jiwheyẹwhe towe na dè jãnwẹ hiẹ na do do ahọlu do oji we: dopo sọn mẹmẹsunnu towe lẹ ṣẹnṣẹn wẹ hiẹ na do do ahọlu do oji we: hiẹ ma sọgan dè gbéjinu de do oji we, he ma yín nọvisunnu towe gba.

¹⁶ Ewọ ma na hẹn osé plisù hlan ede jãnwẹ, kavihẹn gbẹtọ lẹ lọ nado lẹ́gọ̀ do Egipti gba, hlan opòdo lọ na é do do hẹn osé lẹ sùpli: sọle OKLUNỌ lọ ko dọ hlan mì dọmọ, Mìlẹ sọn ojlẹ he mẹ sọ lẹ́gọ̀ do aliho nẹ ji ba blo.

¹⁷ Mọ ewọ ma na da asi lẹ plisù hlan ede gba, na ayiha etọn ma na do lé yì gba: mọ é ma na bẹ́ fataka po sika po plisù gégé hlan ede gba.

¹⁸ E nasọ yín, whenuena ewọ sinai to ofìn ahọludu etọn tọn lọ ji, wẹ é na wlan ohiadoai osẹ́n he tọn de to owé de mẹ, sọn enẹ he tin to yẹwhenọ Levinu lẹ lọ nukọn:

¹⁹ é bo na tin to e de, é bo na nọ hia finẹmẹ to azán ogbé etọn tọn lẹpo mẹ: na é nido nọ plọn nado nọ dibusi OKLUNỌ lọ Jiwheyẹwhe etọn, nado nọ payi ohó osẹ́n he tọn lẹpo go po aṣẹdai helẹ po, nado nọ basi yé:

²⁰ na ayiha etọn ma na do yín zizé daga hugan mẹmẹsunnu etọn lẹ, podọ na ewọ lé jẹla sọn gbèdide lọ mẹ hlan alọ adusi kavi hlan amiọn blo: hlan opòdo lọ na é nido hẹn azán etọn dẹn to ahọludu etọn mẹ, ewọ po ovi etọn lọ po, to gblagbla Islaeli tọn lọ mẹ.