Deutelonomi 16 - BIBLU WIWE LỌ 1923

¹ Dayi osùn Abibi tọn lọ go, bo nọ payi juwayi lọ go hlan OKLUNỌ lọ Jiwheyẹwhe towe: na osùn Abibi tọn lọ mẹ OKLUNỌ lọ Jiwheyẹwhe towe hẹn we jẹgbonu sọn aigba Egipti tọn lọ ji wá tó ozánmẹ.

² Hiẹ na sánvọ́ juwayi lọ hlan OKLUNỌ lọ Jiwheyẹwhe towe, sọn kanlinpá lọ po kanlinpó lọ po mẹ, to otẹn he OKLUNỌ lọ na dè mẹ nado hẹn oyín etọn nado nọnọ̀ finẹ.

³ Hiẹ ma na yí akla otónnọ do dù i gba; azán ṣinawe hiẹ na dù i po akla madotónnọ po, yèdọ akla nukunbibia tọn lọ; na hiẹ jẹgbonu sọn aigba Egipti tọn lọ ji wá to plapla ji: na hiẹ nido nọ flin azán lọ gbè whenuena hiẹ jẹgbonu sọn aigba Egipti tọn lọ ji wá to azán ogbẹ́ towe tọn lẹpo mẹ.

⁴ Otón de ma na yín mimọ to finẹ to agboji towe lẹpo mẹ azán ṣinawe gba; mọ depope sọn olàn lọ mẹ, he hiẹ do sánvọ́ to azán tintan lọ gbè to whèjai, ma na pò to ozán lọ mẹ kakajẹ afọnnu lọ gba.

⁵ Hiẹ sọgan nọ ma sánvọ́ juwayi lọ to depope họ́ngbo towe lẹ tọn hòmẹ, he OKLUNỌ lọ Jiwheyẹwhe towe na we:

⁶ Adavo to otẹn he OKLUNỌ lọ Jiwheyẹwhe towe na dè nado hẹn oyín etọn nado nọnọ̀ e mẹ me, finẹ hiẹ na sánvọ́ juwayi lọ te to whèjai, to odò yìyì owhè tọn ji, to osã he mì jẹgbonu sọn Egipti mẹ wá lọ ji.

⁷ Hiẹ na mó bo dù i to otẹn he OKLUNỌ lọ Jiwheyẹwhe towe na dè lọ mẹ; hiẹ nasọ lé to afọnnu lọ mẹ, bo yì jẹ ogohò towe lẹ mẹ.

⁸ Hiẹ na dù akla madotọ́nnọ azán ṣidopo: agùnpipli ayidego de na tin to azán ṣinawetọ lọ gbẹ̀ hlan OKLUNỌ lọ Jiwheyẹwhe towe; hiẹ ma na wà azọn de to finẹmẹ gba.

⁹ Hiẹ na yísọhana osẹ́ ṣinawe hlan dewe: sọn ojlẹ he hiẹ ṣẹ̀ nado to agbotogọdọẹ lọ do gbadó he tote lọ mẹ wẹ hiẹ na ṣẹ̀ nado yísọhana osẹ́ ṣinawe lẹ.

¹⁰ Hiẹ nasọ nọ payi hùnwhẹ osẹ́ lẹ tọn lọ go hlan en. Sẹn OKLUNỌ lọ Jiwheyẹwhe towe kẹdẹdi ojlẹ na avọ́nunina ojlomẹ alọ towe tọn de, he hiẹ na na, kẹdẹdi le OKLUNỌ lọ Jiwheyẹwhe towe dona we do:

¹¹ hiẹ nasọ to ayajẹ to OKLUNỌ lọ Jiwheyẹwhe towe nukọn, hiẹ, po visunnu towe po, po viyọnnu towe po, po devisunnu towe po, po deviyọnnu towe po, po Levinu he tin hòngbo towe lẹ hòmẹ lọ po, po ojónọ lọ po, po otósiọvi lọ po, po asúsiọsi lọ po, he tin to gbagbla towe mẹ, to otẹn he OKLUNỌ lọ Jiwheyẹwhe towe ná dè nado hẹn oyín etọn nado nọnó finẹ lọ mẹ.

¹² Hiẹ bo nasọ flin dọ hiẹ ko yín afànumẹ de to Egipti mẹ: hiẹ bo na nọ payi nado nọ basi asẹdai helẹ.

¹³ Hiẹ nasọ nọ payi hùnwhẹ gohótúntiin tọn lọ go azán ṣinawe, to godo he hiẹ ko bépii do whégbé sọn agbà zinhò towe tọn mẹ podọ sọn ahàndanú towe mẹ:

¹⁴ hiẹ nasọ nọ jaya to hùnwhẹ towe mẹ, hiẹ, po visunnu towe po, po viyọnnu towe po, po devisunnu towe po, po deviyọnnu towe po, po Levinu lọ po, po ojónọ lọ po, po otóṣiọvi lọ po, po asúṣiọsi lọ po, he tin to họ́ngbo towe lẹ mẹ.

¹⁵ Azán ṣinawe hiẹ na do nọ payi hùnwhẹ de go hlan OKLUNỌ lọ Jiwheyẹwhe towe to otẹn he OKLUNỌ lọ na dè mẹ: na OKLUNỌ lọ Jiwheyẹwhe towe na dona we to jideji towe lẹpo mẹ wutu, podọ to azón alọ towe lẹ tọn lọ lẹpo mẹ, hiẹ bo na yín ayánọ patapata.

¹⁶ Whlatòn to owhè dopo mẹ sunnusi towe lẹpo na nọ sọawúhia to OKLUNỌ lọ Jiwheyẹwhe towe nukọn to otẹn he é na dé lọ mẹ; to hùnwhẹ akla madotọ́nnọ tọn lọ mẹ, podọ to hùnwhẹ osẹ́ lẹ tọn lọ mẹ, podọ to hùnwhẹ gohòtúntún lẹ tọn lọ mẹ: podọ yé ma na sọawuhia to OKLUNỌ lọ nukọn asigbalọgba gba:

¹⁷ Omẹ dopodopo na na kẹdẹdile é tin sọgan do, kẹdẹdi odona OKLUNỌ lọ Jiwheyẹwhe towe tọn lọ he é ko na we.

¹⁸ Hiẹ na basi whẹ̀datọ lẹ po azọ́ngán lẹ po na dewe to họ̀ngbo towe lẹpo mẹ, he OKLUNỌ lọ Jiwheyẹwhe towe na we, kẹdẹdi whẹndo towe lẹ: yé nasọ nọ yí whẹ̀dida dódónọ do dawhèna gbẹtọ lẹ lọ.

¹⁹ Hiẹ ma na gada whẹ̀dida gba; hiẹ ma na hò gbẹtọ nukunta pọ́n gba: mọ hiẹ ma na yi nunina de gba; na nunina de nọ hẹn nukun núyọnẹntọ lọ tọn lẹ dozinvlu, bo sọ nọ hẹn owhẹ́hó dódónọ lẹ tọn gble.

²⁰ Dódó, dódó. Enẹ he yín dódó patapata wẹ hiẹ na nọ hodo, na hiẹ nido gán, bo yí aigba he OKLUNỌ lọ Jiwheyẹwhe towe na we lọ do dùgú.

²¹ Hiẹ ma na tùn Asela atin hunkọ depope tọn dedo agbà OKLUNỌ lọ Jiwheyẹwhe towe tọn he hiẹ na basi na dewe lọ dali gba

²² Mọ hiẹ ma na zé odotin de dote na dewe gba: he OKLUNỌ lọ Jiwheyẹwhe towe gbẹwanna.