Deutelonomi 15 - BIBLU WIWE LỌ 1923

¹ To opòdo owhè ṣinawesinawe tọn hiẹ na nọ basi ogòjó de.

² Podọ ehe wẹ hunkọ ogòjó lọ tọn: akuẹnọ lẹpo na nọ gọ̀ enẹ he é ko yàn jó hlan kọmẹnu etọn; é ma na gbi i yí sọn kọmẹnu etọn po nọvisunnu etọn po si gba; na ogòjó OKLUNỌ lọ tọn ko yin lila wutu.

³ Hiẹ sọgan gbi i yi sọn ojónọ de si: ṣigba núdepope he yín towe bo tin to nọvisunnu towe de, alọ towe na gọ̀jó.

⁴ Sigba wamọnọ de ma na tin to de we finẹ gba (na OKLUNỌ lọ na dona we to aigba lọ ji dandan he OKLUNỌ Jiwheyẹwhe towe na we na ogú de nado tindo e;)

⁵ Eyin hiẹ yí sọwhiwhe ṣokẹdẹ do tùntóai hlan ogbè OKLUNỌ lọ Jiwheyẹwhe towe tọn, nado nọ payiha nado nọ basi gbèdide he lẹpo he yẹn degbèna we to egbó he.

⁶ Na OKLUNỌ lọ Jiwheyẹwhe towe na dona we, dile é gblọnadanna we do: hiẹ wẹ na nọ yàn hlan akọta lẹ, ṣigba hiẹ ma na whé gba; podọ hiẹ na nọ dùgán to akọta susu ji, Ṣigba yélẹ ma na dùgán to hiẹ ji gba.

⁷ Eyín wamọnọ de tin to de we finẹ, dopo sọn mẹmẹsunnu towe lẹ mẹ, to ohò họ̀ngbo towe lẹ tọn depope mẹ to aigba towe he OKLUNỌ lọ Jiwheyẹwhe towe na we ji, hiẹ ma na hẹn ayiha towe sinyẹn gba, kavi miọn alọ towe sọn nọvisunnu towe wamọnọ de gba:

⁸ Ṣigba hiẹ na hùn alọ towe hlan ẹn nugbonugbo, bo nasọ nọ yànna ẹn nugbonugbo sùpe na núwhèdo etọn to enẹ he ewọ jlo mẹ.

⁹ Payiha na linlẹn hlonọ de tin to ayiha towe mẹ blo, dọmọ, Owhè ṣinawetọ lọ, owhè ogọ̀jó tọn lọ tin yákẹ; bọ nukun towe yin yinylan do nọvisunnu towe wamọnọ go, bọ hiẹ ma na núde e gba; bọ ewọ dawhá hlan OKLUNỌ lọ do ogo we, bọ é yín ylando hlan we.

¹⁰ Hiẹ na na ẹn dandan, ayiha towe ma na yín adinọ whenuena hiẹ na hlan ẹn gba: na dọ na onú he wutu wẹ OKLUNỌ lọ Jiwheyẹwhe towe na dona we to azọ́n towe lẹpo mẹ, podọ to ehe hiẹ yí alọ towe hlan lẹpo mẹ.

¹¹ Na wamọnọ ma na vọ̀ sọn aigba lọ jì gbède gba: enẹwutu yẹn degbèna we, dọmọ, Hiẹ na hùn alọ towe hlan nọvisunnu towe nugbonugbo, hlan agbatọnọ towe, podọ hlan wamọnọ towe, to aigba towe ji.

¹² Eyín nọvisunnu towe, sunnusi Heblu de, kavi yọnnusi Heblu de, yín sisà hlan we, bo sẹ́n we owhè ṣidopo; whenẹnu to owhè sinawetọ lọ mẹ hiẹ na gbọ é ni yì vònú sọn de we.

¹³ Podọ whenuena hiẹ gbọ é yì sọn de we vọ́nú, hiẹ ma na gbọ é ni yì asigbalọgba gba:

¹⁴ Hiẹ na uleawuna ẹn po awuvivi po sọn kanlinpá towe mẹ, podọ sọn agbà zinhọ̀ towe tọn mẹ, podọ sọn ahàndanu towe mẹ: le OKLUNỌ lọ Jiwheyẹwhe towe ko dona we do wẹ hiẹ na do na hlan ẹn.

¹⁵ Podọ hiẹ nasọ flin dọ hiẹ yín afànumẹ de to aigba Egipti tọn ji, OKLUNỌ lọ Jiwheyẹwhe towe bo fli we: enẹwutu yẹn degbè onú he tọn na we to egbé.

¹⁶ E nasọ yín, eyín ewọ dọ hlan we dọ, Yẹn ma jẹgbonu jei sọn de we gba: na é yiwanna we po owhé towe po wutu, na é yón na ẹn to de we wutu;

¹⁷ Whenẹnu hiẹ na yí nutọ́nnú de, bo sisẹ́ ẹ gbọn otọ́ etọn mẹ luntón hlan ohòn lọ go, ewọ bo nasọ yín afànumẹ towe sunnu kakadoi. Podọ hiẹ nasọ nọ wà mọkẹdẹ ga hlan afànumẹ towe yọnnu.

¹⁸ E ma na sọawúhia nusinawu hlan we gba, whenuena hiẹ gbọ é yì sọn de we vọ̀nú; na jẹ yẹndawe pakakuẹ pakanọ tọn de tọn wẹ ewọ ko do sẹ̀n we owhè ṣidopo. OKLUNỌ lọ Jiwheyẹwhe towe nasọ dona we to ehe hiẹ to wiwà lẹpo mẹ.

¹⁹ Plọnji asú he yè ji sọn kanlinpó towe mẹ podọ sọn kanlinpá towe mẹ lẹpo wẹ hiẹ na klandowiwe hlan OKLUNỌ lọ Jiwheyẹwhe towe: hiẹ ma na yí oplọnji oyìn towe tọn de do wàzọn gba, kavi pafunna oplọnji kanlinpá towe tọn lẹ gba.

²⁰ To OKLUNỌ lọ Jiwheyẹwhe towe nukọn hiẹ na nọ dù i te to whemẹwhemẹ to otẹn he OKLUNỌ lọ na dè mẹ, hiẹ po whégbetọ towe lẹ po

²¹ Podọ eyín é tindo azọ̀n depope, di eyín é yín sẹ́kunọ, kavi nukuntọ́nnọ, azọ̀n ylankai depope, hiẹ ma na yí i do sànvọ́ hlan OKLUNỌ lọ Jiwheyẹwhe towe gba.

²² Hòngbo towe lẹ hòmẹ hiẹ na dù i te: mawénọ po wiwénọ lọ po na dù i dozẹ̃nzẹ̃n, di owhín lọ podọ di agbanlin lọ.

²³ Ohùn etọn lọ jãnwẹ hiẹ ma na dù gba; hiẹ na kọ̀n ẹn jẹgbonu do aigba lọ ji di osin.