Deutelonomi 14 - BIBLU WIWE LỌ 1923

¹ OVI OKLUNỌ lọ Jiwheyẹwhe mìtọn tọn wẹ milè: mìlẹ ma na zẹ̀hi mìde gba, kavi basi tapipa to nukun mìtọn lẹ ṣẹnṣẹn na osiọ gba.

² Na gbẹtọ wiwe de wẹ mi hlan OKLUNỌ lọ Jiwheyẹwhe towe, podọ OKLUNỌ lọ ko sọ dè we nado yín gbẹtọ vò de hlan ede, sọn akọta he tin to nukunmẹ aigba lo tọn ji lẹpo mẹ.

³ Hiẹ ma na dù onú osùnọ depope gba.

⁴ Ehelẹ we kanlin he mìlẹ na nọ dù: oyin, lẹngbọ lẹ, po gbọgbọẹ po,

⁵ Agbànlin, po owhín po, po oluwa po, po otẹgbọẹ po, po pilgagi po, po ogbégbo po, po agbaligba po.

⁶ Podọ kanlin he zẹ̀ ofẹ̀n lẹpo, bo tindo ofèn zizẹ̀ to awe mẹ, bo nọ dù odùkọ lọ, to kanlin lẹ lọ ṣẹnṣẹn, enẹ wẹ mi na nọ dù.

⁷ Ṣigba ehelẹ wẹ mì ma na dù sọn yé he nọ dù odùkọ lọ mẹ, kavi sọn yé he tindo ofèn zizẹ̀ lẹ mẹ le gba: kanklosopóawenọ lọ, po asididọẹ lọ po, po azui lọ po, na yé dù odùkọ lọ ṣigba ma zè ofẹ̀n lọ wutu, yé yín mawé: hlan mì:

⁸ Po ohàn lọ po, na é zẹ̀ ofèn lọ ṣigba ma nọ dù odùkọ lọ wutu, é yín mawé hlan mì: mìlẹ ma na dù sọn olàn yetọn mẹ gba, mì ma nasọ do alọ oṣiọ yetọn lẹ̀ go gba.

⁹ Sọn onú he tin to osìn mẹ lẹpo mẹ ehelẹ wẹ mì na nọ dù: núdepope he tindo kọja lẹ po oflo lẹ po wẹ mì na nọ dù:

¹⁰ Núdepope he ma tindo kọja lẹ po ofló lẹ po mìlẹ ma na dù gba; mawé wẹ e yín hlan mì.

¹¹ Mì sọgan dù sọn ohẹ wiwe lẹpo mẹ.

¹² Ehelẹ wẹ yé he mẹ mì ma na dù sọn gba: akùn lọ, po ohón akùn lọ po, po akùn hùmẹ tọn lọ po;

¹³ Po Glede lọ po, po ohọ́napeli lọ po, po ohọ́npẹ́pẹ́ lọ po kẹdẹdi hunkọ etọn;

¹⁴ Po adọgbó lẹpo po kẹdẹdi hùnkọ etọn;

¹⁵ Po ogongo lọ pọ, po ohọ̀n ozán tọn po, po odokloe hùmẹ tọn lọ po, po ohọn lọ po kẹdẹdi hunkọ etọn;

¹⁶ Ajankusu pẹvi lọ, po ajankusu daho lọ po, po ajankusu azònọ lọ po;

¹⁷ Po apofó lọ po, po osú lọ po, po adò hùmẹ tọn lọ po;

¹⁸ Po adowé lọ po, po ogbàn lọ po kẹdẹdi hunkọ eton, po ahlinhán lọ po, po otòkó lọ po.

¹⁹ Po onú awànọ he nọ lìn lẹ po wẹ mawé hlan mì; yé ma na yín dùdu gba.

²⁰ Mì sọgan dù sọn ohẹ wiwe lẹpo mẹ.

²¹ Mìlẹ ma na dù sọn onu he kó ededenu depope mẹ gba: hiẹ sọgan yí i na hlan ojonọ lọ he tin to hòngbo towe lẹ hòmẹ, na ewọ nido dù i; kavi hie sọgan sà ẹ hlan gbéjinu de: na gbẹtọ wiwe de wẹ hiẹ hlan OKLUNỌ lọ Jiwheyẹwhe towe. Hiẹ ma na sọakúsìn gbọgbọẹvu de to anósìn onọ etọn tọn mẹ gba.

²² Hiẹ na nọ nadadao jideji okún towe tọn lọ lẹpo, enẹ he jẹgbonu sọn ogle lọ mẹ wá lẹpo to whemẹwhemẹ.

²³ Hiẹ nasọ nọ dù to OKLUNỌ lọ Jiwheyẹwhe towe nukọn, to otẹn lọ mẹ he é na dè nado hẹn oyín etọn nado nọnọ̀ finẹ, madao gbadó towe tọn, ovẹ̃n towe tọn, po amì towe tọn po, po oplọnji kanlimpó towe tọn po po kanlinpa towe tọn po; na hiẹ nido plọn nado nọ dibusi OKLUNỌ lọ Jiwheyẹwhe towe.

²⁴ Podọ eyín aliho lọ yín dindẹn gbahu na we, sọmọ bọ hiẹ ma tin sọgan nado zé e hẹn gba, na otẹnmẹ lọ yín dindẹn gbahu sọn dẹ we wutu, he OKLUNỌ lọ Jiwheyẹwhe towe na dè nado yí oyín etọn do finẹ, whenuena OKLUNỌ lọ Jiwheyẹwhe towe na dona we:

²⁵ Whenẹnu wẹ hiẹ na lé alọ towe, bo na yì jẹ otẹn lọ mẹ he OKLUNỌ lọ. Jiwheyẹwhe towe na dè:

²⁶ Hiẹ nasọ whle akuẹ lọ na núdepope alindọn towe jlo, na oyin lẹ, kavi na lẹnẹbọ lẹ, kavi na ovẹ̃n, kavi na núnùnu sinsinyẹn, kavi na núdepope alindọn towe biọ sọn de we: hiẹ bo na nọ dù to finẹ to OKLUNỌ lọ Jiwheyẹwhe towe nukọn, hiẹ nasọ nọ jaya, hiẹ po whégbetọ towe po:

²⁷ Podọ Levinu lọ he tin to hòngbo towe lẹ mẹ, hiẹ ma na gbó ẹ dai gba; na ewọ ma tindo mimá de kavi ogú to de we gba.

²⁸ To opòdo owhè atọ̀n—atọ̀n tọn hiẹ na nọ hẹn madao jideji towe tọn lọ lẹpo jẹgbonu wá to owhè dopolọ mẹ, bo nasọ zé e doai to hòngbo towe lẹ hòmẹ:

²⁹ Levinu lọ, na é ma tindo mimá de kavi ogú de to de we wutu, podọ ojónọ lọ, po otọ́ṣiọvi lọ po, po asúṣiọsi lọ po, he tin to hòngbo towe lẹ hòmẹ, na wá, bo na dù bo yín pékọnọ; na OKLUNỌ lọ Jiwheyẹwhe towe nido dona we to azọ̀n alọ towe tọn he hiẹ wiwà lẹpo mẹ.