Deutelonomi 13 - BIBLU WIWE LỌ 1923

¹ EYÍN yẹwhegán de fọ́n to gblagbla towe mẹ finẹ, kavi odlọnọ odlọ lẹ tọn de, bọ é na ohia de we kavi nujawu de,

² Bọ ohia, lọ kavi nujawu lọ sọ wá jọ, ehetọn é dọho hlan we, dọmọ, Gbọ mí ni hodo yẹwhe devo yì, he hiẹ ma ko yọnẹn, bo gbọ mí ni nọ sẹ́n yé;

³ Hiẹ ma na tùntóai hlan ohó yẹwhegán nẹ tọn lẹ lọ gba, kavi hlan odlọnọ odlọ lẹ tọn nẹ gba: na OKLUNỌ lọ Jiwheyẹwhe mìtọn to mì ténpọn, nado yọnẹn eyín mì yí ayiha mìtọn lẹpo podọ po alindọn mìtọn lẹpo po do yiwanna OKLUNỌ lọ Jiwheyẹwhe mìtọn.

⁴ Mìlẹ na nọ zinzọnlin hodo OKLUNỌ lọ Jiwheyẹwhe mìtọn, bo nọ dibusi i, bo nọ payi gbèdide etọn lẹ go, bo sètónuna ogbè etọn, mìlẹ bo nasọ nọ sẹ́n ẹn, bo sọ nọ sẹbọdo e de.

⁵ Podọ yẹwhegán nẹ, kavi odlọnọ odlọ lẹ tọn nẹ, na yín hùhù; na é ko dọhó lilẹ́ jẹla do OKLUNỌ lọ Jiwheyẹwhe mìtọn tọn ji wutu, he hẹn mì sọn aigba Egipti tọn lọ ji wá, bo fli we sọn owhé afànumẹ tọn lọ gbè, nado dọ̀n we jẹla sọn aliho lọ ji he OKLUNỌ lọ Jiwheyẹwhe towe degbèna we nado nọ zinzọnlin to e mẹ. Mowẹ hiẹ na dè oylan lọ sẹ sọn gblagbla towe mẹ do.

⁶ Eyín nọvisunnu towe, visunnu onọ towe tọn lọ, kavi visunnu towe, kavi viyọnnu towe, kavi asi akọn towe tọn lọ, kavi họ́ntọn towe, he tin di alindọn towe titi, doyẹklọ we nuglọ, dọmọ, Gbọ mí ni yì bo nọ sẹ́n yẹwhe devo lẹ, he hiẹ ma ko yọnẹn, hiẹ kavi otọ́ towe lẹ ma gba;

⁷ Sọn yẹwhe akọta he tin lédo mì pó, he yádo mì lẹ, kavi he dẹn do mì lẹ tọn lẹ mẹ, sọn opòdo ode aigba lọ tọn yèdọ jẹ opòdo awetọ aigba lọ tọn;

⁸ Hiẹ ma na yígòna hẹ ẹ gba, kavi tùntóai hlan ẹn gba: mọ nukun towe ma na blawuna ẹn gba, kavi hla ẹ dai gba, mọ hie ma na whla ẹ gba:

⁹ Ṣigba na hù i dandan; alọ towe na yín tintan to e ji nado hù i, podọ to enẹgodo alọ gbẹtọ lọ lẹpo tọn.

¹⁰ Hiẹ nasọ yí zannu lẹ do dlanzannudo e, na é ni kú; na é din nado dòn we sè sọn OKLUNỌ lọ Jiwheyẹwhe towe de wutu, he hẹn we jẹgbonu sọn aigba Egipti tọn lọ ji wá, sọn owhé Afànumẹ tọn lọ gbè.

¹¹ Islaeli lẹpo bo na sè, bo sinú, bo ma nasọ wà ylankan mọnkọtọn depope ba dile ehe te to gblagbla towe mẹ.

¹² Eyín hiẹ na sè to tòdaho towe lẹ dopo mẹ, he OKLUNỌ lọ Jiwheyẹwhe towe na we nado nọnọ̀ finẹ, dọmọ,

¹³ Omẹ ohlonọ dẽlẹ jegbonu yì sọn gblagbla towe mẹ, bo ko dọ̀n tòmẹnu tòdaho yetọn tọn lẹ dogodo, dọmọ, Mì gbọ mí ni yì bo sẹ̀n yẹwhe devo lẹ, he mì ma ko yọnẹn gba;

¹⁴ Whenẹnu wẹ hiẹ na kansè, bo sọ basi dindinmọ, bo yí sọwhiwhe do kanbiọ; bo, dayi e go, eyín é yín nugbo, bọ onú lọ sọ diun, dọ osùnú mọnkọ yín wiwà to gblagbla towe mẹ;

¹⁵ Hiẹ nugbonugbo na, yí onù ohi tọn do hò tòmẹnu tòdaho nẹ tọn lẹ, yíyí onù ohi tọn do và ẹ gbidigbidi po ehe tin to e mẹ lẹpo po po kanlinyìnyìn etọn lẹ po

¹⁶ Hiẹ nasọ bẹ́ ogblannú é tọn lẹpo pli do gblagbla alihogbo etọn tọn lọ ji, podọ ogblannú etọn di avọ́nunina mimẹ̀ blebu de, hlan OKLUNỌ lọ Jiwheyẹwhe towe: é bo na yín okiti de kakadoi: é ma na yín vivọ́ do gba.

¹⁷ Podọ onú nuklandovo tọn lọ depope fàn do alọ towe go finẹ blo: na OKLUNỌ lọ nido lẹ́ sọn adi zògbe etọn mẹ, bo do lẹblanu hia we, bo tindo awubla to oji we, bo hẹn we zùn sùsù, dile é ko whle hlan otọ́ towe lẹ do;

¹⁸ Whenuena hiẹ na tùntóai hlan ogbè OKLUNỌ lọ Jiwheyẹwhe towe tọn, nado nọ payi gbèdide etọnlẹpo go he yẹn degbèna we to egbé he, nado nọ wà enẹ he yín jijlọ to nukun OKLUNỌ lọ Jiwheyẹwhe towe tọn lẹ mẹ.