Deutelonomi 12 - BIBLU WIWE LỌ 1923

¹ EHELẸ wẹ asẹdai lẹ lọ po whẹ̀dida lẹ lọ po, he go mì na nọ payi nado nọ wà to aigba lọ ji he OKLUNỌ lọ, Jiwheyẹwhe otọ́ towe lẹ tọn lọ, ko na we nado tindo e, to azán he mì do tin to aigba lọ ji lẹpo mẹ.

² Mì na gbidi otẹnmẹ lọ lẹpo nugbonugbo, ehemẹ akọta he mìlẹ na yí lẹ lọ són yẹwhe yetọn lẹ te, to osé yìji lẹ lọ ji, podọ to okọta lẹ lọ ji, podo to atinmú lẹpo glọ:

³ Mìlẹ nasọ họ́ agbà yetọn lẹ liai, bo wén odòtin yetọn lẹ gidigidi, bo yí miyọn do mẹ́ Vodunzùn yetọn; mìlẹ nasọ ja boṣiọ pipa yẹwhe yetọn lẹ tọn lẹ lọ liai; mìlẹ bo nasọ gbidi oyín yetọn sọn otẹn nẹ mẹ

⁴ Mìlẹ ma na wà mọ hlan OKLUNỌ lọ Jiwheyẹwhe mìtọn gba.

⁵ Ṣigba otẹnmẹ lọ he OKLUNỌ lọ Jiwheyẹwhe mìtọn na dè sọn whẹndo mìtọn lẹpo mẹ nado yí oyín etọn do fìnẹ, yèdọ fininò etọn wẹ mì na nọ din hlan, podọ finẹ wẹ hiẹ na nọ wá:

⁶ Podọ finẹ wẹ mì na nọ hẹn avọ́nunina mimẹ̀ mìtọn lẹ wá, po avọsánnu mìtọn lẹ po, po madao mìtọn lẹ po, po avọ́nunina zédlanga alọ mìtọn tọn lọ po, po opadido mìtọn lẹ po, po avọ́nunina jlomẹ tọn lẹ po, po oplọnji kanlinpó mìtọn tọn lẹ po po kanlinpa mìtọn tọn lẹ po:

⁷ Finẹ mì na nọ dù te to OKLUNỌ lọ Jiwheyẹwhe mìtọn nukọn, mìlẹ nasọ nọ jaya to ehe ji mì yí alọ mìtọn do hlan lẹpo mẹ, mì po whégbetọ mìtọn lẹ po, ehemẹ OKLUNỌ lọ Jiwheyẹwhe towe ko dona we te.

⁸ Mìlẹ ma na wà kẹdẹdi onú he mí wiwà to ofi lẹpo to egbé he gba, omẹ dopodopo núdepope he jlọ to nukun etọn titi lẹ mẹ:

⁹ Na mì ma ko yín hinhẹn wá jẹ ogbẹ? jẹ lọ kọ̀n gba, podọ jẹ ogú lọ kòn gba, he OKLUNỌ lọ jiwheyẹwhe towe na we.

¹⁰ Ṣigba whenuena mì yì jọdani gododọ̃n, bo to aigba lọ mẹ nó he OKLUNỌ lọ Jiwheyẹwhe mìtọn hẹn mì nado yí, bọ é sọ na ogbọje mì sọn kẹ́ntọ mìtọn lẹpo mẹ lédo pé, sọmọ bọ mì ninò mahanú mẹ;

¹¹ Whenenu wẹ é na wá jọ dọ otẹnmẹ lọ he mẹ OKLUNỌ lọ Jiwheyẹwhe mìtọn na dè nado hẹn oyín etọn nado nọnọ̀ finẹ, finẹ wẹ mì na hẹn ehe yẹn degbèna mì lẹpo wá; avọ́nunina mimẹ̀ mìtọn lẹ, po avósannu mìtọn lẹ po, madao mìtọn lọ, po avọ́nunina zédlanga alọ mìtọn tọn lọ po, po opadido didè mìtọn lẹpo po he mì do dopa hlan OKLUNỌ lọ.

¹² Mìlẹ nasọ nọ jaya to OKLUNỌ lọ Jiwheyẹwhe mìtọn nukọn, mìlẹ, po visunnu mìtọn lọ po, po viyọnnu mìtọn lẹ po, po devisunnu mitọn lẹ po, po deviyọnnu mìtọn lẹ po, po Levinu he tin to họngbo towe mẹ lọ po, mimọ ewọ ma tindo mimá de kavi ogú de to mì de.

¹³ Yi ayipipa hlan dewe dọ hiẹ yí avọ́nunina mimẹ̀ towe lẹ na to otẹn depope he hiẹ mọ mẹ blo:

¹⁴ Adavo to otẹn lọ mẹ he OKLUNỌ lọ na dè to dopo whẹndo towe lẹ tọn mẹ, finẹ wẹ hiẹ na yí avọ́nunina mimẹ̀ towe lẹ na te, podọ finẹ wẹ hiẹ na wà ehe yẹn degbèna we lẹpo te.

¹⁵ Gãnṣo hiẹ sọgan hù bo sọ dù olan to hòngbo towe lẹ homẹ, hodo ojlo alindọn towe tọn lẹpo, kẹdẹdi odona OKLUNỌ lọ jiwheyẹwhe towe tọn he é ko na we: mawénọ po wiwenọ po sọgan dù sọn e me, di owhín tọn podọ di agbànlin tọn.

¹⁶ Mì ma na dù ohùn lọ sokẹdẹ wẹ; hiẹ na kọ̀n ẹn jẹgbonu di osìn do aigba lọ ji.

¹⁷ Hiẹ dù madao gbadó towe tọn to hòngbo towe lẹ mẹ blo, kavi ovẹ̃n towe tọn, kavi amì towe tọn, kavi oplọnji kanlinpó towe tọn lẹ kavi kanlinpa towe tọn, kavi depope opa towe lẹ tọn he hiẹ do dopa, kavi avọ́nunina ojlomẹ towe tọn lẹ, kavi avọ́nunina zédlanga alọ towe tọn:

¹⁸ Ṣigba hiẹ na dù yé to OKLUNỌ lọ Jiwheyẹwhe towe nukọn to otẹn he OKLUNỌ lọ Jiwheyẹwhe towe na dè lọ mẹ, hiẹ, po visunnu towe po, po viyọnnu towe po, po devisunnu towe po, po deviyọnnu towe po, po Levinu lọ po he tin to hòngbo towe lẹ mẹ: podọ hiẹ nasọ nọ jaya to OKLUNỌ lọ Jiwheyẹwhe towe nukọn to ehe hiẹ yí alọ towe do hlan lẹpo mẹ.

¹⁹ Yí ayipipa hlan dewe dọ hiẹ gbẹ́ Levinu lọ blo dẹn sọle hiẹ tin to aigba towe ji.

²⁰ Whenuena OKLUNỌ lọ Jiwheyẹwhe towe na hẹn agboji towe zùn daho, dile é ko gblọnadanna we do, hiẹ nasọ dọmọ, yẹn na dù olàn, na alindọn towe jlo nado dù olàn wutu; hiẹ sọgan dù olàn, kẹdẹdi ojlo alindọn towe tọn lẹpo.

²¹ Eyín otẹnmẹ he OKLUNỌ lọ Jiwheyẹwhe towe na dè nado yí oyin etọn do finẹ yín dindẹn gbahu sọn de we, whenẹnu hiẹ na hù sọn kanlinpó towe mẹ podọ sọn kanlinpa towe lọ mẹ, he OKLUNỌ lọ ko na we, dile yẹn ko degbèna we do, hiẹ bo nasọ dù to hóngbo towe lẹ mẹ, kẹdẹdi ojlo alindọn towe tọn lẹpo

²² Yèdọ dile yè dù owhín lọ po agbànlin lọ po do, mọwẹ hiẹ na dù sọn e mẹ do.

²³ Kiki payido dọ hiẹ dù ohùn lọ blo; na ohùn wẹ ogbẹ́ lọ; hiẹ ma na dù ohùn po olàn lọ po gba.

²⁴ Hiẹ ma na dù i gba; hiẹ na kọ̀n ẹn jẹgbonu di osìn do aigba lọ ji

²⁵ Hiẹ ma na dù i gba; na é nido yìn dagbe to de we, podọ to ovi towe lẹ de to godo towe, whenuena hiẹ wà enẹ he yín jijlọ to nukun OKLUNỌ lọ tọn lẹ mẹ.

²⁶ Onú wiwe towe he hiẹ tindo lẹ, po opa towe lẹ po, wẹ hiẹ na bé, bo yì jẹ otẹn he OKLUNỌ lọ na dè mẹ:

²⁷ Hiẹ nasọ yí avọ́nunina mimẹ towe lẹ na, olàn lọ po ohùn lọ po to agbà OKLUNỌ lọ Jiwheyẹwhe towe tọn ji: ohùn avọ́sannu towe tọn lọ na yín kinkọ̀n jẹgbonu do agbà OKLUNỌ lọ Jiwheyẹwhe towe tọn lọ ji, hiẹ nasọ dù olàn lọ.

²⁸ Payiha bo sọ sè ohó he yẹn degbèna we helẹ pó, na é nido yì dagbe to de we, odọ to oví towe lọ de to godo towe kakadoi, whenuena hiẹ wà enẹ he yín dagbe po jijlọ po to nukun OKLUNỌ lọ Jiwheyẹwhe towe tọn lẹ mẹ.

²⁹ Whenuena OKLUNỌ lọ Jiwheyẹwhe towe na sán akọta lẹ lọ sẹ́ sọn nukọn towe, fie hiẹ jei hòmẹ nado tindo yé, bọ hiẹ sọ tindo yé, bo nọnọ̀ aigba yetọn ji;

³⁰ Yí ayipipa hlan dewe dọ hiẹ yín didomọna nado hodo yé blo, to godo he yé yín vivà sọn nukọn towe; podọ hiẹ sọ kan yẹwhe yetọn lẹ tọn sè blo, dọmọ, Nawẹ akọta helẹ nọ sèn yẹwhe yetọn lẹ do? na yẹn nido nọ wà do mọkẹdẹ ga.

³¹ Hiẹ ma na wà do mọ hlan OKLUNỌ lọ Jiwheyẹwhe towe gba; na osùnú hlan OKLUNỌ lọ lẹpo, he ewọ gbẹwanna, wẹ yé ko wà hlan yẹwhe yetọn lẹ; na yèdọ visunnu yetọn lẹ po viyọnnu yetọn lẹ po wẹ yé ko mẹ́ to miyọn lọ mẹ hlan yẹwhe yetọn lọ.

³² Onú depope he yẹn degbèna mì, enẹ wẹ mì na payido nado nọ wà: hiẹ ma na dè dogọ́ ẹ, kavid èpò sọn e mẹ gba.