Deutelonomi 10 - BIBLU WIWE LỌ 1923

¹ TO ojlẹ nẹ mẹ OKLUNỌ lo dọ hlan mi dọmọ, Pà tafo zannu tọn awe jijlẹ do tintan lẹ lọ go, bo hẹji wá jẹ dẽ jẹ osé lọ kòn, bo sọ basi alki atin tọn de na dewe.

² Yẹn bo nasọ wlan do tafo lẹ lọ ji ohó he tin to tafo tintan he hiẹ gbà lẹ lọ ji lẹ, hiẹ bo na yí yé do alki lọ mẹ.

³ Mọwẹ yẹn basi alki atin akasia tọn de, bo sọ pà tafo zannu tọn awe lẹ jijlẹ do tintan lẹ lọ go, bo hẹjì yí jẹ osé lọ mẹ, tintindo tafo awe lẹ lọ to alọ ṣie mẹ.

⁴ Ewọ sọ wlan do tafo lẹ lọ go, kẹdẹdi winwlan tintan lọ, gbèdide ao lẹ lọ, he OKLUNỌ lọ dọ hlan mì to osé lọ mẹ sọn gblagbla miyọn lọ tọn mẹ to azán agùnpipli lọ tọn gbè: OKLUNỌ lọ bo sọ yí yé na mi,

⁵ Yen bo sọ lẹ bo jẹte sọn osé lọ ji wá, bo yí tafo lẹ lọ do alki hẹ yẹn ko basi lọ me; fìnẹ wẹ yé te, dile OKLUNỌ lọ degbèna mi do.

⁶ (Ovi Islaeli tọn lẹ lọ yígbéjizọnlin sọn Beeloti Benejaakani jẹ Mosela: finẹ Aalọn kú te, finẹ wẹ yè sọ di i do; Eleazali visunnu etọn sọ to devizónwà to azọ́nhò yẹwhenọ tọn lọ mẹ to otẹn etọn mẹ.

⁷ Yé sọ yígbéjizọnlin sọn finẹ jẹ Gudgoda, podọ sọn Gudgoda mẹ jẹ jotbata, aigba otán osin tọn lẹ de.

⁸ Ojlẹ nẹ mẹ wẹ OKLUNỌ lọ klan whẹndo Levi tọn lọ dovọ, nado nọ zé alk ì alènu OKLUNỌ tọn lọ tọn hẹn, nado nọ nọte to OKLUNỌ lọ nukọn nado nọ wàdevizọ́n hlan ẹn, podọ nado nọ dona to oyín etọn mẹ, jẹ azán he gbè.

⁹ Enẹwutu wẹ Levi ma do tindo mimá de kavi ogú hẹ mẹmẹsunnu etọn lẹ gba: OKLUNỌ lọ wẹ ogú etọn, kẹdẹdile OKLUNỌ lọ Jiwheyẹwhe towe dọhó hlan ẹn do.)

¹⁰ Yẹn sọ dòngbàn to osé lọ ji, di ojlẹ tintan ton, okle kande po ozán kande po: OKLUNỌ lọ sọ tùntóai hlan mi to ojlẹ nẹ mẹ; OKLUNỌ lọ ma sọ jlo na và we gba.

¹¹ OKLUNỌ lọ sọ dọ hlan mi dọmọ, Tite, bo yígbéjizọnlin towe to gbẹtọ lẹ lọ nukọn; Yé bo nasọ yì hòmẹ bo yí aigba lọ, he yẹn whle hlan otọ́ yetọn lẹ nado na hlan yé.

¹² Etẹ wẹ OKLUNỌ lọ Jiwheyẹwhe towe jijlo sọn de we dinvie lò, Eslaeli, adavo nado nọ dibusi OKLUNỌ lọ Jiwheyẹwhe towe, nado nọ zinzọnlin to ali etọn lẹpọ mẹ, podọ nado nọ yiwanna ẹn, podọ nado nọ sẹn OKLUNỌ lọ Jiwheyẹwhe towe po ayiha towe lẹpo po, podọ pò alindọn towe lẹpo po,

¹³ nado nọ payi gbèdide OKLUNỌ lọ tọn le lọ go, po asẹdai etọn le po, he yẹn degbèna we to ègbé he na dagbe towe?

¹⁴ Dayi e go, OKLUNỌ lọ Jiwheyẹwhe towe tọn wẹ olọn lọ, po olọn olọn lẹ lọ tọn po, aigba lọ, po onú he tin to e mẹ lepo po.

¹⁵ Kiki OKLUNỌ lọ tindo homẹvivi de to otọ́ towe lẹ mẹ nado yiwanna yé, é bo sọ dè okún yetọn to yé godo, yèdọ mìlẹ Sọn akọta lẹpo mẹ, dile é te to egbé he.

¹⁶ Enẹ-wutu mì ni nọ gbowhẹ́na ayútintan ayiha mìtọn tọn lọ, mì sọ yín kọsinsinyẹnnọ ba blo.

¹⁷ Na OKLUNỌ lọ Jiwheyẹwhe mìtọn, ewọ wẹ Jiwheyẹwhe oyẹwhe lẹ tọn, podọ OKLUNỌ OKLUNỌ lẹ tọn, Jiwheyẹwhe daho lọ, hlọnhlọnnọ lọ, podọ jiawu lọ, he ma nọ ho gbẹtọ lẹ pọ́n, mọ ma nọ yí núbla gba

¹⁸ E nọ hẹn whẹdida tóṣiọvi po asúsiọsi po tọn sẹ, bó sọ yiwanna ojónọ lọ, to núdùdù po avọ po nina ẹn mẹ.

¹⁹ Enewutu mì ni nọ yiwanna ojónọ lọ: na mìlẹ yín ojónọ to aigba Egipti tọn lọ ji.

²⁰ Hie na nọ dibusi OKLUNỌ lọ Jiwheyẹwhe towe; ewọ wẹ hiẹ na nọ sèn; é de wẹ hiẹ na nọ sẹbọdo, podọ hiẹ nasọ nọ whle gbọn oyín etọn dali.

²¹ Ewọ wẹ pipa towe, podọ ewọ sọ wẹ Jiwheyẹwhe tòwe, he ko wà onú daho podọ he jiawu helẹ na we, he nukun towe lẹ ko mọ.

²² Otọ́ towe lẹ jẹte yì jẹ Egipti me po gbẹtọ kandegbàn po; podọ dinuje OKLUNỌ lọ Jiwheyẹwhe towe ko basi we di sunwhlẹvu olọntọn le lọ na gégé.