Deutelonomi 1 - BIBLU WIWE LỌ 1923

¹ EHELẸ wẹ yín ohó lẹ lọ he Moṣe dọ hlan Islaeli lẹpo to Jọdani gododọ̃n to zùngbo lọ mẹ to Alaba lọ mẹ pannukọn Sufi, to Palani, po Tofeli po, po Labani po, po Hazeloti po, po Di-zahabi po ṣẹnṣẹn

² Gbéjizọnlin azán widopo tọn wẹ sọn Holebi mẹ gbọn aliho osé Seili tọn-lọ dali jẹ Kadesi-balnea.

³ E sọ wá jọ to owhè kandetọ lọ mẹ, to osùn widopotọ lọ mẹ, to azán tintan osùn lọ tọn gbè, wẹ Moṣe dọhó hlan ovi Islaeli tọn lẹ lọ, kẹdẹdi ehe OKLUNỌ lọ ko na ẹn to gbèdide mẹ lẹpo hlan yé;

⁴ godo ewọ ko hò Sihoni ahọlu Amolinu lẹ lọ tọn lọ, he nọnó Heṣboni mẹ, po Ogi ahọlu Baṣani tọn lọ po, he nọnó Astaloti mẹ, to Edlei:

⁵ to Jọdani gododọ̃n to aigba Moabi tọn ji, wẹ Moṣe sè nado to osẹ́po he la, dọmọ,

⁶ OKLUNỌ lọ Jiwheyẹwhe mítọn dọhó hlan mí to Holebi mẹ, dọmọ, Mìlẹ ko nò dẹn sù to osé he mẹ:

⁷ mì lé, bo yí gbéjizọnlin mìtọn, bo yì jẹ oto okọta Amolinu lẹ lọ tọn, podọ jẹ otẹn lọ lẹpo mẹ he sẹpọ́ enẹ lẹ lọ, to Alaba mẹ, to otò okọta tọn mẹ, podọ to dòdòklido mẹ, to huwaji ọ mẹ, podọ to ohù tó dali, to aigba Kananinu lẹ tọn ji, po Lebanoni po, yì kaka jẹ otọ́ daho lọ kón, otò Eufelati lọ.

⁸ Dayi e go, yẹn ko zé aigba lọ do mì nukọn: mì yì e mẹ bo tindo aigba lọ he OKLUNỌ lọ whle hlan otọ́ mìtọn lẹ, hlan Ablaham, hlan Isaki, podọ hlan Jakob, nado na hlan yé podọ hlan okún yetọn to yé godo.

⁹ Yẹn sọ dọhó hlan mì to ojlẹ nẹ mẹ, dọmọ, Yẹn ma tin sọgan nado zé mì hẹn yẹn dopo só gba.

¹⁰ OKLUNỌ lọ Jiwheyẹwhe mìtọn ko hẹn mì sùdeji, bo, dayi e go, egbé mìlẹ tin di sunwhlẹvu olọn tọn iẹ na sùsù.

¹¹ OKLUNỌ lọ, Jiwheyẹwhe oté mìtọn lẹ tọn lọ, ni hẹn mì sù fọtọ́n whla sùsù mọ hú le mì te, bo sọ dona mì, dile é ko gblọnadanna mì do!

¹² Nawẹ yẹn sọgan zé agijadomẹ mìtọn, po agbàn mìtọn po, po wiwọ mìtọn po hẹn do yẹn dopo só?

¹³ Mì yi núyọnẹntọ mìtọn lẹ, po wuntuntọ po, po oyọnẹnnọ o, kẹdẹdi whẹndo mìtọn lẹ, yẹn nasọ ẹn yé zùn nukọntọ to mì nu.

¹⁴ Mìlẹ sọ gblọnna mi, bo dọmọ, Onú dagbe wẹ ehe hiẹ dọ na mí nado wá.

¹⁵ Mowẹ yẹn yí nukọntọ whẹndo mìtọn lẹ tọn lẹ lọ, omẹ núyọnẹntọ lẹ, po oyọnẹnnọ lẹ po, bo hẹn yé zùn nukọntọ lẹ to mì ji, awhàngan fọtọ́n lẹ tọn lẹ, po awhángan kanweko lẹ tọn lẹ po, po awhàngan kandeao lẹ tọn lẹ po, po awhàngan ao lẹ tọn lẹ po, po azóngán lẹ po, kẹdẹdi whẹndo mìtọn lẹ.

¹⁶ Yẹn sọ naṣẹ́ whẹ̀datọ mìtọn lẹ to ojlẹ nẹ mẹ, dọmọ, Mì nọ sè owhẹ́ hó lẹ to mẹmẹsunnu mìtọn lẹ ṣẹnṣẹn, bo sọ nọ yí dódó do dawhè to omẹ de po nọvisunnu etọn po ṣẹnṣẹn, po ojónọ he tin to e de po.

¹⁷ Mìwlẹ ma na hò gbẹtọ nukuntapọn to whẹ̀dida mẹ gba; mì na nọ sè yọ̀pọ po mẹho po dozẹ̃nzẹn; mì ma na dibuna nukunmẹ omẹ de tọn gba; na Jiwheyẹwhe tọn wẹ whẹ̀dida lọ: podọ owhèhó he yín sinsinyẹn gbahu na mì, mì na nọ hẹnwá jẹ dẽ, yẹn bo nasọ nọ sè e.

¹⁸ Yẹn bo sọ degbèna mì to ojlẹ nẹ mẹ onú he mì do na wà lẹpo.

¹⁹ Mí sọ yígbéjizọnlin sọn Holebi mẹ, bo gbọn zùngbo daho bo sọ dobu he mì mọ nẹ lẹpo mẹ luntón yì, gbọn aliho jẹ otò okọta Amolinu lẹ lọ tọn dali, dile OKLUNỌ lọ Jiwheyẹwhe mítọn degbèna mi do; mi sọ wá jẹ Kadesi-balnea.

²⁰ Yẹn sọ dọ hlan mì dọmọ, Yè hẹn mì wá jẹ otò okọta Amolinu lẹ lọ tọn mẹ, he OKLUNỌ lọ Jiwheyẹwhe mítọn na hlan mí.

²¹ Dayi e go, OKLUNỌ lọ Jiwheyẹwhe towe ko zé aigba lọ do nukọn towe: hẹji yì, yí nútindona, dile OKLUNỌ lọ, Jiwheyẹwhe otọ towe lẹ tọn lọ, ko dọhó hlan we do; a dibu blo, mọ a sọ yin oflunọ blo.

²² Omẹ dopodopo mì tọn mì sọ wá sẹpé jẹ dẽ, bo dọmọ, Mì gbọ mi ni do gbẹtọ lẹ hlan mí nukọn, na yé nido din aigba lọ mo na mí, bo sọ hẹn ohó aliho lọ tọn wá ehe mí na gbọn hẹji yì, po todaho lẹ lọ tọn po he kọn mí na wá.

²³ Onú lọ bo sọ hẹnhomẹhùn mi dagbedagbe: Yẹn bo sọ dè omẹ wiawe sọn mì mẹ, omẹ dopo sọn whẹndo dopodopo mẹ:

²⁴ yé bo sọ lẹ bo hẹji yì jẹ osé lọ mẹ, bo sọ wá jẹ agbadò Eskolì tọn lọ mẹ, bo bẹ́ ẹ pọn.

²⁵ Yé sọ yí sọn sinsẹ́n aigba lọ tọn mẹ to alọ yetọn lẹ mẹ, bo hẹn yé wá odò jẹ mí de, bo sọ hẹn ohó wá na mí, bo dọmọ, Aigba dagbe de wẹ ehe OKLUNỌ lọ Jiwheyẹwhe mítọn na hlan mí.

²⁶ Gãnṣo mìwlẹ ma jlo na hẹji yi gba, ṣigba bo ṣiatẹ do gbèdide OKLUNỌ lọ jiwheyẹwhe mìtọn tọn go:

²⁷ míwlẹ sọ hlun to ogohò mìtọn lẹ mẹ, bo dọmọ, Na OKLUNỌ lọ gbẹwanna mí wutu, wẹ é ko do hẹn mí jẹgbonu sọn aigba Egipti tọn lọ ji wá, nado jó mí do alọ Amolinu lẹ lọ tọn mẹ, nado và mí.

²⁸ Fiedali mí hẹji jei? mẹmẹsunnu mítọn lẹ ko hẹn ayiha mítọn nado yé, domọ, Gbẹtọ lẹ lọ klohugan bo sọ ténalunhugan mí; odọ tòdaho lẹ lọ yín kiklo yè sọ dodòéna yìaga jẹ olọn; podọ humọ mí ko mọ visunnu Anakimi tọn lẹ lọ to fìnè.

²⁹ Whenẹnu wẹ yẹn dọ hlan mì dọmọ, Mì dibu blo, mọ mì sọ yín avosatọ na yé tọn blo.

³⁰ OKLUNỌ lọ Jiwheyẹwhe mìtọn mẹhe to yìyì to mì nukọn, ewọ na hoavùn na mì, kẹdẹdi ehe é wà na mì to Egipti mẹ lẹpo to nukun mìtọn lẹ nukọn;

³¹ podọ to zùngbo lọ mẹ, fie hiẹ ko mọ le he OKLUNỌ lọ Jiwheyẹwhe towe zé we hẹn do, dile omẹ de nọ zé visunnu etọn hẹn do, to aliho he mì gbọn yì lẹpo mẹ, kaka mì do wá jẹ otẹn he me.

³² Gãnṣo na onúhe lẹpo mì ma yí OKLUNỌ lọ Jiwheyẹwhe mìtọn se gba,

³³ mẹhe yìyì mì nukọn to aliho lọ mẹ, nado din otẹn de mọ na mì nado pọ́n ogohò mìtọn lẹ do, to miyọn mẹ to ozán mẹ, nado dohia mì aliho he mì do gbọn yì lọ, podọ to aslọ lọ mẹ to okle.

³⁴ OKLUNỌ lọ sọ sè ogbè ohó mìtọn lẹ tọn lọ, bo yín homẹgblenọ, bo sọ whle, dọmọ,

³⁵ Nugbododo dopo sọn omẹ whẹndo ylankan he tọn lẹ de mẹ ma na mọ aigba dagbe lọ gba, he yẹn whle nado na hlan oté mìtọn lẹ,

³⁶ adavo Kalẹbi visunnu Jẹfunnẹ tọn lọ, ewọ wẹ na mọ ẹn, podọ hlan ewọ wẹ ẹn na na aigba he ewọ zíndai lọ, podọ lan ovi etọn lẹ: na ewọ ko hodo OKLUNỌ lọ petepete wutu.

³⁷ OKLUNỌ lọ PỌ yín homegblenọ do ogo e ga na mìtọn wutu, dọmọ, Hiẹ ga ma na yì e mẹ finẹ gba:

³⁸ Jọsua visunnu Nuni tọn lọ, he nọ site to nukọn towe, ewọ wẹ na yì e mẹ finẹ: hiẹ ni nahomẹhùn in; na ewọ wẹ na hẹn Islaeli lẹ lọ nado yi i na ogú.

³⁹ Humọ omẹ flinflin mìtọn lẹ, he mì dọ do yín ogblannú de, po ovi mìtọn lẹ po, he ma tindo egbé oyọnẹn dagbe kavi oylan tọn de, yé wẹ na yì e mẹ fìnẹ, podọ yé wẹ yẹn na yí i na hlan, yé nasọ yínutindona ẹn.

⁴⁰ Ṣigba na mìle tọn, mì ni lé bo yí gbéjizọnlin mìtọn yì jẹ zùngbo lọ mẹ gbọn aliho lọ dali jẹ Ohù Vẹ̃ lọ kòn.

⁴¹ Whenẹnu wẹ mì gblọn bo dọ hlan mi dọmọ, Mi ko wàylando do OKLUNỌ lọ go, mi na hẹji yì bo hoavùn, kẹdẹdi ehe OKLUNỌ lọ Jiwheyẹwhe mítọn ko degbèna mí lẹpo, Mì omẹ dopodopo sọ bla adánwanu awhàn tọn etọn lẹ do ogo, bo lẹn ẹn di onú whiwha de nado hẹji yì jẹ osé lọ mẹ.

⁴² OKLUNỌ lọ sọ dọ hlan mi dọmọ, Dọ hlan yé dọmọ, Mì heji yì blo, mọ mì sọ hoavùn blo; na yẹn ma tin to mì ṣẹnṣẹn gba; mì nikã yín hihò to kẹ́ntọ mìtọn lẹ nukọn.

⁴³ Mọwẹ yẹn dọhó hlan mì, mìwlẹ ma sọ tùntóai gba; ṣigba mì ṣiatẹ do gbèdide OKLUNỌ lọ tọn lọ go, bo sọ yín tasinẹntọ, bo sọ hẹji yì jẹ oslọ mẹ.

⁴⁴ Bọ Amolinu lẹ lọ, he nọnọ̀ osé nẹ mẹ, jẹgbonu wá mì ji, bo yànmọna mì, dile owín le nọ wà do, bo linú mì liai to Seili mẹ, yèdọ jẹ Halma.

⁴⁵ Mìwlẹ sọ lẹ́gọ̀ bo viavi to OKLUNỌ lọ nukọn; ṣigba OKLUNỌ lọ ma sọ tùntóai hlan ogbè mìtọn gba, kavi na otọ́ hlan mì gba.

⁴⁶ Mọwẹ mì nọte to Kadẹsi mẹ azán susu, kẹdẹdi azán he mì do nọte to fìnẹ.