DANIẸLI 9 - BIBLU WIWE LỌ 1923

¹ TO owhè tintan Daliusi visunnu Àhasuelusi tọn tọn mẹ, sọn okún Medianu lẹ tọn mẹ, he yè hẹn zùn ahọlu to ahọlutò Kaldeanu lẹ tọn ji;

² to owhè tintan ahọludu etọn tọn mẹ, Yẹn Daniẹli tùnwun osọha owhè lẹ tọn gbọn owé lẹ lọ dali, ehetọn ohó OKLUNỌ tọn wá jẹ Jẹlemia yẹwhegán lọ de, na hinhẹn ovọ́jẹ Jelusalẹm tọn tọn pé, yèdọ owhè kandegbàn.

³ Yẹn sọ zé nukunmẹ ṣie do hlan OKLUNỌ Jiwheyẹwhe ṣie de, nado din hodo odẹ́ po ovẹ́ po, po nùbibla po, po odẹ́vọ̀ po, po afín po.

⁴ Yẹn sọ hodé hlan OKLUNỌ Jiwheyẹwhe ṣie, bo sọ basi ogbèyí, bo dọmọ, OKLUNỌ E, Jiwheyẹwhe osidahonọ lọ, he nọ yìn alẹ̀nù po lẹblanu po hẹ yé he yiwan nẹ bo sọ nọ yìn gbèdide etọn lẹ;

⁵ mìwlẹ ko wàylando, bo ko sọ yí gbigble do zán, bo ko sọ yí yinylan do wà, bo ko sọ ṣatẹ, yèdọ lilé dapadopo sọn ogbèdai towe lẹ mẹ, podọ sọn whẹ̀dida towe lẹ mẹ:

⁶ mọ míwlẹ ma ko sọ tuntóai hlan devi towe yẹwhegán lẹ gba, he dọhó to oyín towe mẹ hlan ahọlu mítọn lẹ, ahọvi mítọn lọ, po otọ́ mítọn lẹ po, podọ hlan omẹ aigba lọ ji tọn lẹpo.

⁷ OKLUNỌ E, dódó tin hlan we, ṣigba hlan mìwlẹ oflu nukunmẹ tọn, dì azán he gbè tọn; hlan omẹ Juda tọn lẹ, podọ hlan tòmẹnu Jelusalẹm tọn lẹ, podọ hlan Islaeli lẹpó, he tin sẹpọ́, podọ he sọ tin to aganu, gbọn otò lẹpo mẹ fie hiẹ ko yàn mí hlan, na osẹ́nmẹjijẹ yetọn he yé ko do jẹsénmẹ do ogo we.

⁸ OKLUNỌ È, oflu nukunmẹ tọn tin hlan míwlẹ, hlan ahọlu mítọn lẹ, hlan ahọvi mítọn lẹ, podọ hlan otọ́ mítọn lọ, na mí ko wàylando do ogo we wutu.

⁹ Lẹblanu lẹ po ojona po tin hlan OKLUNỌ Jiwheyẹwhe mítọn, le míwlẹ tlẹ ko ṣatẹ do e go sọ;

¹⁰ mọ míwlẹ ma ko sètónuna ogbè OKLUNỌ Jiwheyẹwhe mítọn tọn, nado nọ zinzọnlin to osẹ́n etọn lẹ mẹ he ewọ zé do mí nukọn gbọn devi etọn yẹwhegán lẹ dali.

¹¹ Mowẹ, Islaeli lẹpo wẹ ko jẹsẹ́nmẹna osẹ́n towe, yèdọ lilé dapadopo, na yé ma na do sètónuna ogbè towe: enẹwutu wẹ yè ko do kọ̀n odẹ́hodo jẹgbonu do mí ji, po aṣẹtúndo he yè wlan to osẹ́n Moṣe devi Jiwheyẹwhe tọn tọn mẹ lọ po; na míwlẹ ko wàylando do e go.

¹² Podọ ewọ ko sọ hẹn ohó etọn lẹ he é dọ do mi go ṣẹ̀, po do whẹ̀datọ mítọn lẹ he dawhèna mí lẹ po go, gbọn hinhẹn oylan daho de wá mí ji dali: na to olọn pete glọ yè ma ko wà dile yè ko wà do to Jelusalẹm ji gba.

¹³ Dile yè wlan ẹn do to oṣẹ́n Moṣe tọn mẹ, oylan he lẹpo wẹ yè hẹnwá mí ji: gãnṣo mìwlẹ ma ko vẹ̀vẹ̀na nukundágbe OKLUNỌ Jiwheyẹwhe mítọn tọn gba, na míwlẹ ni do lẹ́ sọn oylanwà mítọn lẹ mẹ, bo yí nuyọnẹn do zán to nugbo towe mẹ.

¹⁴ Énẹwutu wẹ OKLUNỌ do payi oylan lọ go, bo sọ hẹn ẹn wá mí ji: na dódónọ wẹ OKLUNỌ Jiwheyẹwhe mítọn to azọ́n etọn he é wà lẹpo mẹ, míwlẹ ma ko sọ sètónuna ogbè etọn gba.

¹⁵ Podọ dinvie, OKLUNỌ Jiwheyẹwhe mítọn E, he ko yí alọ hlọnhlọnnọ de do hẹn omẹ towe lọ jẹgbonu sọn aigba Egipti tọn ji wá, bo ko sọ do doyíndina we dile é te to egbé; mí ko wàylando, ní ko yí yinylan do wà.

¹⁶ OKLUNỌ E, yẹn vẹ̀ we, gbọ adi towe po homẹwlu towe po ni yín didiọ kẹdẹdi dódó towe lẹ sọn tòdaho towe Jelusalẹm ji, osé Wiwe towe na ylando mítọn le tọn wutu, podọ na oylanwà otọ́ mítọn lẹ tọn, Jelusalẹm po omẹ towe lẹ po tin lẹzùn ovlẹ de hlan yé he tin lédo mi pé lẹpo.

¹⁷ Énẹwutu dinvie, Jiwheyẹwhe mítọn E, tuntóai hlan odẹ́ devi towe tọn, podọ hlan ovẹ̀ etọn lẹ, bo hẹn nukunmẹ towe nado họ́nun do fiwiwe towe he yín ojẹvó ji, na OKLUNỌ tọn wutu.

¹⁸ Jiwheyẹwhe ṣie E, dé otó towe, bo sè; hùn nukun towe lẹ, bo sọ pọ́n ojẹvó mítọn lẹ, po tòdaho he yè nọ ylọ gbọn oyín towe dali po: na mìwlẹ ma hẹn ovè mítọn lẹ nado flẹ jẹ nukọn towe na dódó mítọn gba, adavo na lẹblanu towe daho lẹ.

¹⁹ Oklunọ È, sè; OKLUNỌ E, jona; OKLUNỌ E, tuntóai bo wà; a dọngbàn blo: na towe lọsu tọn wutu, Jiwheyẹwhe ṣie E, na tòdaho towe po omẹ towe lẹpo yín yiylọ gbọn oyín towedali wutu.

²⁰ Podọ whenuena yẹn to hódọ, bo to dẹ́ho, bo sọ to gbèyína ylando ṣie po ylando Islaeli omẹ ṣie lẹ tọn po, bo sọ to ovẹ̀ ṣie zé do OKLUNỌ Jiwheyẹwhe ṣie nukọn na osẹ́ wiwe Jiwheyẹwhe ṣie tọn lọ;

²¹ mọwẹ, whenuena yẹn to hódọ to odẹ̀ mẹ, dawe lọ Gabriẹli, mẹhe yẹn ko mọ to númimọ lọ mẹ to ṣaunṣaunwhenu, hẹ yè hẹn nado zlọn po awuya po wá sẹpọ́ jẹ dẽ to ojlẹ avọ́ whèjai tọn nkọ mẹ.

²² Ewọ sọ hẹn mi nado tùnwun, bo sọ to hódọ hẹ mi, bo dọmọ, Daniẹli È, Yè hẹn mi jẹgbonu wá dinyie nado hẹn we zùn anàtọ wuntùntùn tọn.

²³ To ṣaunsaunwhenu ovẹ̀ towe lẹ tọn wẹ gbèdide jẹgbonu yi, yè sọ hẹn mi wá nado dọ na we; na yè yiwanna we talala: enẹwutu lẹn owhèhó lọ pọ́n, bo sọ tùnwun númimọ ọ.

²⁴ Osẹ́ kandegbàn wẹ yè dogbèaina to omẹ towe lẹ ji podọ to tòdaho towe ji, nado glọn osénmẹjẹ lọ, podọ nado hẹn ylando lẹ jẹ opòdo de, podọ nado klọ oylanwà lọ sẹ̀, podọ nado hẹn dódó madopodo lọ wá homẹ, podọ nado yí hiadonu do tlẹ́ númimọ po yẹwhegán po, podọ nado samisisána otẹn wiwe petepete de.

²⁵ Enẹwutu yọnẹn bo sọ tùnayinugo, dọ sọn gbonu jẹ yì gbèdide lọ tọn nado gọ̀jẹ́ podọ nado do Jelusalẹm hlan mẹyiamisisádodè de, ahọvi lọ, na yín osẹ̀ ṣinawe: po osè kandekonukunawe po, é na sọ yín vivọ́ do, po alihogbo po po odòkọdò po, yèdọ to ojlẹ tuklanọ lẹ mẹ.

²⁶ Podọ to osẹ̀ kandekonukunawe lẹ lọ godo wẹ yè na sán mẹyiamisisádodè lọ sè, mẹde ma na sọ tin yín etọn gba: podọ omẹ ahọvi he na wá lọ tọn lẹ na và tòdaho lọ po fiwiwe lọ po; bọ opòdo etọn na tin po sìngigó de po, yèdọ awhàn na tin jẹ opòdo lọ; Yè dotana ovọ́jẹ lẹ.

²⁷ Podọ ewọ na basi alẹ̀nù liló de hẹ mẹsusu na osọ̀ dopo: podọ to gblagbla odá osẹ̀ lọ tọn mẹ ewọ na hẹn avọ̀sánnu po avọ́ nunina jinulili tọn po nado doalọte; podọ to adadanu osùnú lẹ lọ tọn ji wẹ omẹ he basi ovọ́jẹ na wá; yèdọ jẹ opòdo lọ, pọdọ didotana enẹ, wẹ yè na kọ̀n homẹgble jẹgbonu do ovójẹ lọ ji.