DANIẸLI 7 - BIBLU WIWE LỌ 1923

¹ TO owhè tintan Bẹlsazali ahọlu Babilọni tọn tọn mẹ wẹ Daniẹli mọ odlọ de po númimọ ota etọn tọn lẹ po to adọzan etọn ji: whenẹnu wẹ é wlan odlọ lọ bo sọ dọ osọha owhèhó lẹ lọ tọn.

² Daniẹli dọhó bo sọ dọmọ, Yẹn mọ to númimọ ṣie mẹ to ozánmẹ, bo, dayi e go, jẹhọn ẹnẹ olọn tọn gbà jẹgbonu to ohù daho lọ ji.

³ Bọ gbékanlin daho ẹnẹ hẹji sọn ohù lọ mẹ wá, hùnkọhùnkọ ode sọn awetọ mẹ.

⁴ Tintan tin taidi kinnikinni de, bo tin ofún akùn tọn lẹ: yẹn to pinpọn kaka yè do sùn ofún etọn lẹ, yè bo sọ zé e daga sọn aigba mẹ, bo sọ hẹn nado site to afọ awe ji di gbẹtọ de, yè sọ yí ayiha gbẹtọ tọn de na ẹn.

⁵ Bo sọ dayi gbékanlin devo go, awetọ de, taidi beali de, yè sọ zé e daga to adà, dopo ji, adajahú atọ̀n sọ tin to onù etọn mẹ to adú lẹ ṣẹnṣẹn: yé sọ dọ le hlan ẹn dọ, Tite, và Agbasalan susu súdo.

⁶ To ehe godo yẹn dayi e go, bo sọ pòn devo, taidi opò de, he tindo awà ẹnẹ ohẹ̀ de tọn to onẹgbé e tọn ji; gbékanlin lọ ga tindo ota ẹnẹ; yè sọ yí ahọluigba de nẹ.

⁷ To ehe godo yẹn sọ mọ to numimọ ozánmẹ tọn lẹ mẹ, bo dayi e go gbékanlin ẹnẹtọ de, kanylantọ bo dobu bo sọ dohuhlọn gbahugbahu; é sọ tindo ogànyudú daho lẹ; é vàsúdo bo sọ gbà do flinflin, bo sọ yí afọ etọn lẹ do zín pipòtọ dai: é sọ yín hùnkọhunkọ sọn gbékanlin he tin to ewọ nukọn lẹpo mẹ; é sọ tindo azò ao.

⁸ Yẹn lẹn azò lẹ lọ pọ́n, bo, dayi e go, azò devo, hẹaga to yé ṣẹnṣẹn wá, pẹvi dopo, ehe nukọn yè sún atọ̀n sọn azo tintan lẹ mẹ sò po adò lẹ po: bo, dayi e go, nukun taidi nukun gbẹtọ de tọn lẹ tin to azò he mẹ, podọ onù de he to onú dahodaho lẹ dọ.

⁹ Yẹn to pinpọ́n yè do zé ofìn lẹ dlan ai, bọ mẹde he yín hóhótọ azán lẹ tọn sinai: avọ̀ etọn yín wéwé di osìnagó, podọ odà ota etọn tọn taidi lẹngbọfún wiwe; ozolọ miyọnnọ lẹ wẹ ofìn etọn, podọ kẹkẹfọ etọn miyọn jiji.

¹⁰ Asisa miyọnnọ de tọn jẹgbonu sọn ewọ nukọn wa: fọtọ́n fọtọ́n lẹ to devizónwà hlan ẹn, podọ fọtọ̀n ao donu fọtọ́n ao site to ewọ nukọn: yè zé whẹ̀dida lọ dai, yè sọ hùn owé lẹ.

¹¹ Yẹn pọ́n to ojlẹ nẹ mẹ na ogbè ohó daho lẹ lọ tọn he azò lọ to didọ tọn wutu; yẹn to pinpòn yèdọ yè do hù gbékanlin lọ, bo sọ và agbasa etọn, yè sọ jó e nado yí miyọn do mè ẹn.

¹² Podọ na pipòtọ gbékanlin lẹ lọ tọn tọn, yè yí ahọluigba yetọn yì: gãnṣo yè hẹn ogbè yetọn lẹ dite na osã de po ojlẹ de po

¹³ Yẹn sọ mọ to númimọ ozán lọ mẹ tọn lẹ mẹ, bo, dayi e go, mẹde po aslọ olọn tọn lè po taidi visunnu gbẹtọ tọn de wá fìnẹ, ewọ sọ wá yèdọ jẹ hóhótọ azán lẹ tọn lọ de, yé sọ hẹn ewọ wá sẹpọ́ ewọ nukọn.

¹⁴ Yè sọ yí ahọluigba na ẹn finẹ, po gigo po, po ahọludu de po, na gbẹtọ lẹpo, po akọta lẹ po, po ogbè lẹ po ni do sọ sẹ̀n ẹn: ahọluigba madopodo de wẹ ahọluigba etọn, he ma na juwá yì, podọ ahọludu etọn enẹ he ma na yín vivà.

¹⁵ Na yẹn Daniẹli tọn, yè hẹn gbigbọ ṣie sadi to gblagbla agbasa ṣie tọn mẹ, podọ númimọ ota ṣie tọn lẹ sọ dotukla mi.

¹⁶ Yẹn wá sẹpọ̀ jẹ dopo yé tọn he ṣite to ola de, bo kàn nugbo lọ sè e gbọn ehe lẹpo tọn dali. Mọ ewọ dọ na mi bo sọ hẹn mi yọ̀n otadèna onú lẹ lọ tọn.

¹⁷ Gbékanlin daho helẹ, he yín ẹnẹ, ahọlu ẹnẹ wẹ, he na fọ́n sọn aigba lọ mẹ.

¹⁸ Ṣigba mẹwiwe Gigogán tọn lẹ wẹ na mọ ahọludu lọ yí, bo sọ yí ahọludu lọ na nutindo kaka, yèdọ kaka doidoi.

¹⁹ Whenẹnu wẹ yẹn sọ jlo nado yọ́n nugbo lọ gbọn gbékanlin ẹnẹtọ lọ tọn dali, he yín hùnkọdevo sọn popo yé tọn mẹ, kanylantọ gbahugbahu, adú mẹhetọn yín ogànyu tọn lẹ, podọ ofẹ́n etọn lẹ ogànvẹ̃ tọn; he vàsúdo, gbà do flinflin, bo sọ yi afọ etọn lẹ do zín pipòtọ dai;

²⁰ podọ gbọn azò ao lẹ he tin to ota etọn go tọn dali, po azò devo lò po he hẹaga wá, podọ ehe nukọn atọ̀n flẹ te; yedọ azò nẹ he tindo nukun lẹ, po onù de po he to onú daho lẹ dọ, nupinpọ́n mẹhetọn ylan hugán ogbẹ́ etọn lẹ tọn.

²¹ Yẹn dayi e go, azò dopolọ funawhàn hẹ mẹwiwe lẹ bo hugánnú to yé ji;

²² kaka hóhótọ azán lẹ tọn lọ do wá, yè sọ yí whẹ̀dida lọ jó na mẹwiwe Gigogán tọn lẹ; ojlẹ lọ bo sọ wa he mẹwiwe lẹ do yí ahọludu lọ na nutindo.

²³ Le wẹ ewọ dọ, Gbékanlin lọ na yín ahọludu ẹnẹtọ de to aigba ji, he na yín hùnkọdevo sọn ahọludu lẹpo mẹ, bo na sọ và aigba lọ pete súdo, bo na sọ li i do odò, bo sọ gbà ẹ hanyanhanyan.

²⁴ Podọ na azò ao lẹ tọn, ahọlu ao na fọ́n sọn ahọludu he mẹ: podọ devo na sọ fọ́n to yé godo; ewọ na yín hùnkọdevo sọn tintantọn mẹ, ewọ bo na sọ yí ahọlu atọ̀n do odò.

²⁵ Ewọ bo na nọ dọ ohó lẹ do Gigogán go, bo na sọ hẹn agbọpé mẹwiwe Gigogán tọn lẹ: ewọ bo na sọ lẹn nado diọ ojlẹ lẹ po osẹ́n lọ po; yè na sọ jó yé do alọ etọn mẹ kaka ojlẹ de podọ ojlẹ lẹ po odá ojlẹ de tọn po.

²⁶ Ṣigba whẹ̀dida na sinai, yé bo na sọ yí ahọluigba etọn yì, nado hùsúdo podọ nado va e jẹ opòdo lọ.

²⁷ Podọ ahọludu lọ po ahọluigba lọ po, podọ kiklo ahọludu lẹ lọ tọn to olọn pete glọ, wẹ yè na na hlan gbẹtọ lẹ sọn mẹwiwe Gigogán tọn lẹ mẹ: ahọludu madopodo de wẹ ahọludu etọn, ahọluigba lẹpo na nọ sẹ̀n bo sọ sètónuna ẹn.

²⁸ Ofile wẹ opòdo owhẹ̀hó lọ tọn te. Na yẹn Daniẹli tọn, linlẹn ṣie lẹ dotukla mi talala, podọ yè sọ hẹn nukunmẹ ṣie diọ to yẹn homẹ: ṣigba yẹn whla owhẹ̀hó lọ to ayiha ṣie mẹ.