DANIẸLI 6 - BIBLU WIWE LỌ 1923

¹ E sọ jlò Daliusi nado zé gbétahọlu kantọ̀n do ahọludu lọ ji, he do tin gbọn ahọludu lọ pete mẹ;

² po mẹnunọtọ atọn po to yé ji, sọn mẹhe mẹ Daniẹli yín dopo; na gbétahọlu helẹ nido nọ na ogbèdo hlan yéwlẹ, podọ ahọlu lọ ma na do tindo awugble de.

³ Whenẹnu wẹ yè hẹn Daniẹli he tónkọ húgán mẹnunọtọ lẹ po gbétahọlu lẹ po, na gbigbọ yẹyinọ de tin to ewọ mẹ wutu; ahọlu bo sọ to linlẹn nado zé e do ahọluigba pete ji.

⁴ Whenẹnu wẹ mẹnunọtọ lẹ lọ po gbétahọlu lẹ lọ po din nado mọ aklọnnú do Daniẹli go gbọn ahọludu lọ gblamẹ; ṣigba yé ma sọgan din aklọnnú de mọ, kavi yẹwànú; sọle ewọ yín nugbonọ, mọ yè ma sọ mọ nuwàyìndò depope kavi yẹwànú to ewọ mẹ gba.

⁵ Whenẹnu wẹ omẹ helẹ dọmọ, Míwlẹ ma na din aklọnnú depope mọ do Daniẹli he go gba, adavo mí din in mọ do e go gbọn osén Jiwheyẹwhe etọn tọn dali.

⁶ Whenẹnu mẹnunọtọ helẹ po gbétahọlu lẹ lọ po wá po zingidi po jẹ ahọlu de, bo dọ le hlan ẹn dọ, Nọgbẹ̀ kakadoi, ahọlu Daliusi.

⁷ Mẹnunọtọ ahọludu lọ tọn lẹpo, whépọ́ntọ lẹ po gbétahọlu lẹ po, hónamẹtọ lẹ po otògán lẹ po, ko dowé dopọ na ahọlu ni do hẹn oséndoai de lódo, bo sọ basi aliglọn sinsinyẹn de, dọ mẹdepope he na biọ onúbiọ de son yẹwhe depope si kavi gbẹtọ na azán ogbàn, adavo sọn hiẹ si, ahọlu E, ewọ na yín zizédlan biọ odò kinnikinni lẹ tọn mẹ

⁸ Dinvie, ahọlu È, hẹn aliglọn lọ lódo, bo sọ doalọ wéwinwlan lọ me, dọ é yín didiọ blo, kẹdẹdi osén Medianu lẹ po Pẹlsianu lẹ po tọn, he ma nọ juwá yì.

⁹ Enẹwutu wẹ ahọlu Daliusi doalọ wéwinwlan lọ mẹ po aliglọn lọ po.

¹⁰ Podọ whenuena Daniẹli yọnẹn dọ yè doalọ wéwinwlan lọ mẹ, é yì biọ ohò etọn mẹ; (dinvie ovẹ́sẹ́ etọn lẹ tin hùnhùn to abò etọn mẹ hlan Jelusalẹm dali;) ewọ bo sọ jẹklo to okligónu etọn lẹ ji whla atọ̀n to gbèdopo, bo hodẹ̀, bo sọ na opẹ́ lẹ to Jiwheyẹwhe etọn nukọn, dole é nọ wà do daidaì.

¹¹ Whenẹnu wẹ omẹ helẹ pli dopọ, bo mọ Danieli to onúbiọ basi po ovẹ́ po to Jiwheyẹwhe etọn nukọn.

¹² Whenẹnu wẹ yé wá sẹpò, bo sọ dọhó to ahọlu nukọn gbọn aliglọn ahọlu tọn lọ tọn dali; dọ, Hiẹ ma ko doalọ aliglọn de mẹ, dọ omẹ dopodopo he na basi onúbiọ hlan yẹwhe depope kavi gbẹtọ to azán ogbàn helẹ mẹ, adavo hlan hie, ohọlu E, na yín zizédlan biọ odò kinnikinni lẹ tọn mẹ? Ahọlu lọ sọ gblọn bo dọmọ, Nugbo wẹ onú lọ, kẹdẹdi osén Medianu lẹ po Pẹlsianu lẹ po tọn he ma nọ juwá yì.

¹³ Whenẹnu wẹ yé gblọn bo dọ to ahọlu lọ nukọn dọ, Danieli nẹ he tin sọn ovi mẹmẹglọ Juda ton lẹ tọn mẹ, ma hò we pọ́n gba, ahọlu È, kavi aliglọn he hiẹ doalọ e mẹ lọ, ṣigba basi onúbiọ etọn whla atọ̀n gbèdopo.

¹⁴ Whenẹnu wẹ ahọlu lọ, whenuena é sè ohó helẹ, yín mahùnhomẹnọ gbahugbahu, bo sọ zé ayiha etọn do Daniẹli go nado whlẹn ẹn: é sọ jẹtukla kaka jẹ yìyì odò owhè tọn nado whlẹn ẹn dai.

¹⁵ Whenẹnu wẹ omẹ helẹ pli dopọ do ahọlu de, bo sọ dọ hlan ahọlu lọ dọmọ, Ahọlu E, yọnẹn, dọ osẹ́n Medianu lẹ po Pẹlsianu lẹ po tọn de wẹ, dọ aliglọn de kavi oséndoai he ahọlu hẹn lódo ma sọgan yín didiọ gba.

¹⁶ Whenẹnu wẹ ahọlu lọ degbè, yé bo sọ hẹn Daniẹli wá, bo zé e dlan biọ odò kinnikinni lẹ tọn mẹ. Dinvie ahọlu lọ dọhó bo sọ dọ hlan Daniẹli dọ, Jiwheyẹwhe towe mẹhe hiẹ to sinsẹ̀n whepoponu, é na whlẹn we.

¹⁷ Yè sọ hẹn zannu de wá, bo zé do onù odò lọ tọn ji; ahọlu sọ yí ohiadonu etọn titi do dohia ẹ, po ohiadonu ogán etọn lẹ tọn po; na didiọ linlẹn tọn de ma na do tin finẹ gbọn Daniẹli tọn dali.

¹⁸ Whenẹnu wẹ ahọlu yì jẹ ohònmẹ etọn mẹ, bo yí ozánmẹ lọ do blanù: mọ yè ma hẹn yọpọyọnnu owèdutọ lẹ wá ewọ nukọn gba: amlọn etọn sọ họ̀nyì sọn e de.

¹⁹ Whenẹnu wẹ ahọlu fọ́n fliflimẹ to afọnnu, bo yì to awuya mẹ jẹ odò kinnikinni lẹ tọn lọ kọn.

²⁰ Podọ whenuena é wá sẹpò jẹ odò lọ kọ̀n jẹ Daniẹli de, é yí avigbè de do dawhá: ahọlu dọhó bo dọ hlan Daniẹli dọmọ, Daniẹli E, devi Jiwheyẹwhe ogbènọ lọ tọn, Jiwheyẹwhe towe, mẹhe hiẹ to sinsẹ́n whepoponu, tin sọgan nado whlẹn we sọn kinnikinni lẹ lọ si?

²¹ Whenẹnu wẹ Daniẹli dọ hlan ahọlu lọ dọmọ, Ahọlu È, nọgbè kakadoi.

²² Jiwheyẹwhe ṣie ko do angẹlì etọn hlan, bo ko sọ bò onù kinnikinni lẹ lọ tọn lẹ do, bọ yé ma ko gbleawu de na mi gba: sọle yè mọ ohòmẹvò to yẹn mẹ to ewọ nukọn do; podọ ga to hiẹ nukọn, ahọlu È, wẹ yẹn ma ko sọ wà awugblenú de.

²³ Whenẹnu wẹ ahọlu lọ yín homẹhùnnọ gbahugbahu, bo sọ degbè dọ yé ni zé Daniẹli daga tòn sọn odò lọ mẹ. Mowẹ yè zé Daniẹli daga tọ̀n sọn odò lọ mẹ do, podọ yè ma mọ hùnkọ awugble tọn de to ewọ go gba, na ewọ ko dotu to Jiwheyẹwhe etọn mẹ wutu.

²⁴ Ahọlu lọ sọ degbè, yé sọ hẹn omẹ nẹlẹ he ko slẹ Daniẹli wá, yé sọ zé yé dlan biọ odò kinnikinni lẹ tọn lọ mẹ, yéwlẹ, ovi yetọn lẹ, po asi yetọn lẹ po; kinnikinni lẹ sọ jẹ yé ji, bo gbà ohú yetọn lẹ hanyanhanyan, kavi whẹpo yé wá jẹ asábọ odò lọ tọn.

²⁵ Whenẹnu wẹ Daliusi wlanwé hlan gbẹtọ lẹpo, akọta lẹ, po ogbè lẹ po, he nọ nọ̀ aigba lẹpo mẹ; Jijọho ni yín jideji hlan mì.

²⁶ Yẹn basi asẹ de, dọ to ahọluigba ahọludu ṣie tọn lẹpo mẹ gbẹtọ ni sisọ bo sọ sinú to Jiwheyẹwhe Daniẹli tọn nukọn: na ewọ wẹ Jiwheyẹwhe ogbẹ̀nọ lọ, bo sọ nọtegligli kakadoi, podọ ahọludu etọn enẹ he ma na yín vivà, podọ aholuigba etọn na tin yèdọ jẹ opòdo lọ:

²⁷ ewọ nọ whlẹn bo sọ nọ glọndai, podọ ewọ sọ nọ basi ohia lẹ po awujinu lẹ po to olọn mẹ podọ to okẹ́ mẹ; mẹhe ko whlẹn Daniẹli sọn huhlọn kinnikinni lẹ tọn mẹ.

²⁸ Mowẹ yè hẹn nuyọnna Daniẹli he do to ahọludu Daliusi tọn mẹ, podọ to ahọludu Èilusi Pẹlsianu lọ tọn mẹ.