DANIẸLI 5 - BIBLU WIWE LỌ 1923

¹ BẸLṢAZALI ahọlu basi hùnwhẹ daho de hlan fọtọ́n dopo sọn ogán etọn lẹ mẹ, bo sọ to ovẹ̃n nù to fọtọ́n lẹ lọ nukọn.

² Belṣazali, le é dó ovẹ̃n lọ pọ́n, degbè nado bẹ́ núzinzán sika po fataka po tọn lẹ wá ehe Nẹbukadnẹzali otọ etọn ko bẹ́ tọ́n sọn tẹmpli he tin to Jelusalẹm mẹ mẹ; na ahọlu lọ po ogán etọn lẹ po, asi etọn lẹ po yọnnuyíyí etọn lẹ po, nido nù to emẹfinẹ.

³ Whenẹnu wẹ yé hẹn núzinzán sika tọn lẹ lo wá ehe yè bẹ́ tón sọn tẹmpli ohọ̀ Jiwheyẹwhe tọn tọn mẹ lẹ he tin to Jelusalẹm mẹ; ahọlu lọ po ogán etọn lẹ po, asi etọn lẹ po yọnnuyíyí etọn lẹ po, sọ nù to yé mẹ.

⁴ Yé nù ovẹ̃n, bo sọ to yẹwhe sika tọn lẹ po fataka tọn po, ogànvẹ̃ tọn, ogànyu tọn, atin tọn, po zannu tọn po pà.

⁵ To ojlẹ dopolọ mẹ alọviyẹyẹ alọ gbẹtọ de tọn lẹ jẹgbonu wá, bo wlanwé do aga do titlẹ adó ohọ̀nmẹ ahọlu lọ tọn tọn go, pannukọn zògbántin lọ: ahọlu bo sọ mọ apade alọ he wlanwé tọn lọ.

⁶ Whenẹnu wẹ yè hẹn nukunmẹ ahọlu tọn diọ to ewọ homẹ, linlẹn etọn lẹ sọ dotukla ẹ; yè sọ hẹn opetẹn adaja etọn tọn lẹ tún, kligónu etọn lẹ sọ to hihò ode do ode go.

⁷ Ahọlu sọ dawhá lélé nado hẹn afinọnnọ lẹ, Kaldeanu lẹ, po odọsẹnọ lẹ po wá họmẹ. Ahọlu lọ dọhó bo sọ dọ hlan omẹ nuyọnẹntọ Babilọni tọn lẹ dọ, mẹdepope he na hia wéwinwlan he, bo sọ do otadèna etọn hia mi, yè na yí avọ̀gefununmẹ ṣinyọn ẹn, bo sọ tindo ogódẹ sika tọn de lédo okò etọn, bo na sọ dùgán di dopo to mẹatọn lẹ mẹ to ahọludu lọ mẹ.

⁸ Whenẹnu wẹ omẹ nuyọnẹntọ ahọlu tọn lẹpo wá họmẹ: ṣigba yé ma sọgan hia wéwinwlan lọ gba, mọ hẹn otadèna lọ zùn yinyọnẹn hlan ahọlu gba.

⁹ Whenẹnu wẹ yè sọ hẹn Bẹlsazali yín tuklanọ talala, yè sọ hẹn nukunmẹ etọn diọ to ewọ homẹ, ogán etọn lẹ sọ yín oflunọ.

¹⁰ Dinvie ahọsi lọ gbọn ohó ahọlu lọ po ogán etọn lẹ po tọn lẹ tọn dali biọ hùnwhẹgbó lọ họmẹ: ahọsi lọ sọ dọhó bo dọmọ, Ahọlu È, nọgbẹ́ kakadoi; a dike linlẹn towe lẹ dotukla we blo, mọ a sọ dike yè hẹn nukunmẹ towe diọ blo:

¹¹ dawe de tin finẹ to ahọludu towe mẹ, mẹhe mẹ gbigbọ yẹwhe wiwe lẹ tọn te; podọ to azán otọ́ towe lẹ tọn lẹ mẹ yè mọ hinhọ́n po wuntùntùn po po nuyọnẹn po, taidi nuyọnẹn yẹwhe lẹ tọn to ewọ homẹ: podọ ahọlu Nẹbukadnẹzali otọ́ towe, ahọlu E, otọ́ towe hẹn ewọ zùn mẹmẹnu nújlẹtọ lẹ, afinọnnọ lẹ, Kaldeanu lẹ, po odọsẹnọ lẹ po tọn;

¹² sọle gbigbọ yẹyinọ de, po oyọnẹn po, po wuntùntùn po, otadidèna odlọ lẹ tọn, po didohia whẹ̀dahó zinvlunọ tọn lẹ po, po túntún núdabla lẹ tọn po yín mimọ to Daniẹli dopolọ mẹ, mẹhe otọ́ towe ylọyín Bẹlteṣazali. Dinvie gbọ yè ni ylọ Daniẹli, ewọ na sọ do otadèna lọ hia.

¹³ Whenẹnu wẹ yè hẹn Daniẹli wá họmẹ to ahọlu lọ nukọn. Ahọlu lọ dọhó bo sọ dọ hlan Daniẹli dọmọ, Hiẹ wẹ Daniẹli nẹ, he tin sọn ovi mẹmẹglọ Juda tọn tọn lẹ mẹ, mẹhe ahọlu otọ́ ṣie sọn Juda mẹ wá?

¹⁴ Yẹn ko sè linlin towe, dọ gbigbọ yẹwhe lẹ tọn tin to hiẹ mẹ, podọ hinhọ́n po wuntùntùn po po nuyọnen yẹyinọ po yín mimọ to hiẹ mẹ.

¹⁵ Podọ dinvie omẹ nuyọnẹntọ lẹ, afinọnnọ lẹ ko yín hinhẹnwá họmẹ to nukọn ṣie, dọ yé ni do hia wéwinwlan he, bo sọ hẹn otadèna etọn zùn yinyọnẹn hlan mi: ṣigba yé ma sọgan do Otadèna onú lọ tọn hia gba.

¹⁶ Ṣigba yẹmko sè linlin towe, dọ hiẹ sọgan na otadèna lẹ, bo sọ tún núdabla lẹ: dinvie eyín hiẹ sọgan hia wéwinwlan lọ, bo sọ hẹn otadèna etọn zùn yinyọnẹn hlan mi, yè na yí avọ̀gefunwunmẹ ṣinyọn hiẹ, bo sọ tindo ogẹ̀dẹ sika tọn de lẹ́dọ okọ̀ towe, bo na sọ dùgán di dopo to mẹatòn lẹ mẹ to ahọludu lọ mẹ

¹⁷ Whenẹnu wẹ Daniẹli gblọn bo dọ to ahọlu lọ nukọn dọ, Gbọ nunina towe lẹ ni tin hlan dewe, bo sọ yi ale towe lẹ na mẹdevo; sogàn yẹn na hia wéwinwlan lọ hlan ahọlu, bo so hẹn otadèna lọ zùn yinyọnẹn hlan ẹn.

¹⁸ Hiẹ ahọlu È, Jiwheyẹwhe Gigogán na ahọludu, po kiklo po, po gigodaho po, Nẹbukadnẹzali otò towe:

¹⁹ podọ na kiklo he ewọ na ẹn tọn wutu, gbẹtọ lẹpo, akọta lẹ, po ogbè lẹ po nọ sisọ bo sọ dibu to ewọ nukọn; mẹhe é jlo é nọ hù, podọ mẹhe é sọ jlo é po degbè; podọ mẹhe é jlo é nọ zédaga, podọ mehe é sọ jlo é nọ gò do odò.

²⁰ Ṣigba whenuena ayiha etọn yín zizé daga, bọ gbigbọ etọn so yín sinsinyẹn bọ é yí osakla do zán, yè hẹn ẹn jẹte sọn ofìn ahọlu tọn etọn ji, yé sọ yí gigo etọn sọn e de:

²¹ yè sọ yàn ẹn sọn visunnu gbẹtọ lẹ tọn mẹ; yè sọ basi ayiha etọn taidi gbékanlin lẹ, podọ ninọ̀ etọn sọ tin kẹtẹkẹtẹ ogbémẹ tọn lẹ de; yè yí ogbé do yìn ewọ taidi oyín lẹ, yè sọ yí ahún olọn tọn do yòn agbasa etọn: kaka ewọ do yọnen dọ Jiwheyẹwhe Gigogán dùgán to ahọludu gbẹtọ lẹ tọn mẹ, podọ mẹdepope ewọ jlo énọ zédaga do e, ji.

²² Podọ hiẹ visunnu etọn, Bẹlṣazali È, ma húwhẹ́ ayiha towe gba, dole hiẹ tlẹ yọ̀n ehe lẹpo sọ;

²³ ṣigba ko zé dewe daga do OKLUNỌ olọn tọn ji; yé ko sọ hẹn núzinzán ohọ̀ etọn tọn lẹ wá nukọn towe, hiẹ po ogán towe lẹ po, asi towe lẹ po yọnnuyíyí towe lẹ po, ko sọ nù ovẹ̃n to yé mẹ; hiẹ bo ko sọ pà yẹwhe fataka tọn lẹ, po sika po, ogànvẹ̃ tọn, ogànyu, atin, po zannu po, he ma mọnú, mọ ma sè, mọ ma yọnnuin: podọ Jiwheyẹwhe alọ mẹhetọn mẹ gbọfufu towe te, podọ mẹhetọn aliho towe lẹpo yín, wẹ hiẹ ma ko pàgigona gba:

²⁴ whenẹnu wẹ yè do apadopo alọ lọ tọn hlan sọn nukọn e tọn, bọ yè do kàn wéwinwlan he.

²⁵ Podọ ehe wẹ wewinwlan lọ he yè kàn, MENE, MENE, TEKẸLI, UFALSINI.

²⁶ Ehe sọ wẹ otadèna onú lọ tọn: MENE; Jiwheyẹwhe ko yísọhana ahọludu towe, bo sọ hẹn ẹn wá jẹ opòdo de.

²⁷ TEKẸLI; yè ko jle hiẹ to ojlẹgàn lẹ mẹ, yè bo sọ mọ hiẹ gbògàn.

²⁸ PELẸSI; yè má ahọludu towe, bo sọ jó hlan Medìanu lẹ po Pẹlsianu lẹ po.

²⁹ Whenẹnu wẹ Belsazali degbè, yé sọ yí avọ̀gefunwunmẹ ṣinyọn Daniẹli, bo sọ yí ogẹ̀dẹ sika tọn de lédo okò etọn, bo sọ dèmisẽlu gbọn ewọ tọn dali, na ewọ ni do dùgán di dopo to mẹatòn lẹ mẹ to ahọludu lọ mẹ.

³⁰ To ozán nẹ mẹ wẹ yè hù Bẹlṣazali ahọlu Kaldianu lẹ tọn lọ.

³¹ Bọ Daliusi Medianu lọ sọ yí ahọludu lọ, mẹhe yín owhè kandekonukunawe nkọ mẹho.