DANIẸLI 4 - BIBLU WIWE LỌ 1923

¹ NẸBUKADNẸZALI ahọlu lọ, hlan gbẹtọ lẹpo, akọta lẹ, po ogbè lẹ po, he nọ nò aigba lẹpo mẹ; jijọho ni yín jideji hlan mì.

² E ko sọawuhia dagbe hlan mi nado do ohia lẹ po awujinu lẹ po hia he Jiwheyẹwhe Gigogán ko wà hlan dali ṣie.

³ Nawẹ ohia etọn lẹ yín kiklo sọ podọ nawẹ awujinu etọn lẹ yín hlọnhlọnnọ sọ ahọludu etọn wẹ ahọludu madopodo de, podọ ahọluigba etọn sọn owhẹ́ndo mẹ jẹ owhẹ́ndo mẹ wẹ.

⁴ Yẹn Nẹbukadnẹzali tin blẹo to ohò ṣie mẹ, bo sọ to vùnvùn to ohònmẹ ṣie me.

⁵ Yẹn mọ odlọ de he hẹn mi savọ̀; bọ ohiamọ to adọzan ṣie ji lẹ lọ po númimọ ota ṣie tọn lẹ lọ po dotukla mi.

⁶ Enẹwutu wẹ yẹn basi asẹ de nado hẹn omẹ nuyọnẹntọ Babilọni tọn lẹ lẹpo wá họmẹ to nukọn ṣie, na yé nido hẹn otadèna odlọ lọ tọn zùn yinyọnẹn hlan mi.

⁷ Whenẹnu wẹ nújlẹtọ lẹ wá họmẹ, afinọnnọ lẹ, Kaldeanu lẹ, po odọṣẹnọ lẹ po: yẹn sọ dọ odlọ lọ to yé nukọn; ṣigba yé ma hẹn otadèna etọn zùn yinyọnẹn hlan mi gba.

⁸ Ṣigba godo wẹ Daniẹli wá họmẹ to nukọn ṣie, oyín mẹhetọn yín Bẹltesazali, kẹdẹdi oyín yẹwhe ṣie tọn, podọ mehe mẹ gbigbọ yẹwhe wiwe lẹ tọn te: yẹn sọ dọ odlọ lọ to ewọ nukọn, dọmọ.

⁹ Bẹlteṣazali È, mẹmẹnu nújlẹtọ lẹ tọn, na yẹn yọnẹn dọ gbigbọ yẹwhe wiwe lẹ tọn tin to hiẹ mẹ wutu, podọ asli de ma nọ dotukla we gba, dọ númimọ odlọ ṣie tọn he yẹn ko mọ lẹ na mi, po otadèna etọn po.

¹⁰ Le wẹ númimọ ota ṣie tọn lẹ lọ yín, to adọzan ṣie ji: yẹn mọ, bo dayi e go, atin de to gblagbla aigba tọn mẹ, podọ ojiyìyì etọn yín kiklo.

¹¹ Atin lọ whẹ́n, bo sọ yín sinsinyẹn, ojiyìyì etọn bo sọ yì jẹ olọn, podọ nukunmẹ etọn jẹ opòdo aigba lẹpo tọn.

¹² Amà etọn lẹ yín whanpẹnọ, podọ osinsẹ́n etọn gégé, podọ é mẹ wẹ núdùdù te na mẹpopo: gbékanlin danji tọn lẹ tindo oyẹ́tẹn to e glọ, podọ ohẹ̀ olọn tọn lẹ nọ nọ̀ alà etọn lẹ mẹ, podọ agbasalan lẹpo wẹ yè to yìnyìn sọn e mẹ.

¹³ Yẹn mọ to númimọ ota ṣie tọn mẹ to adọzan ṣie ji, bo, dayi e go, hihọ́tọ de po omẹ wiwe de po jẹte sọn olọn mẹ wá.

¹⁴ E dawhá lélé, bo dọ le, dọ, Sán atin lọ liai, bo sọ sán alà etọn lẹ sẹ́, húnhún amà etọn lẹ sẹ́, bo sọ vúnvún osinsẹ́n etọn: gbọ gbékanlin lẹ ni yì sọn e glọ, podọ ohè lẹ sọn alà etọn lẹmẹ.

¹⁵ Ṣogán jó dòdonu adọ̀ etọn tọn lẹ dai to aigba mẹ, yèdọ po okọgàn ogànyu po oganvẹ́ po tọn de, to ogbé omú danji tọn mẹ; bo sọ gbọ yè ni yí ahún olọn tọn do yọ̀n ẹn, bo sọ gbọ mimá etọn ni tin to gbékanlin lẹ de to ogbé aigba tọn lọ mẹ:

¹⁶ gbọ ayiha etọn ni yín didiọ sọn gbẹtọ tọn mẹ bo sọ gbọ yè ni na ayiha gbékanlin tọn de hlan ẹn; bo sọ gbọ ojlẹ ṣinawe ni gbọn ewọ ji.

¹⁷ Whẹ̀dahó lọ tin gbọn aṣẹ hihótọ lẹ lọ tọn dali, podọ owhóhó lọ gbọn ohó omẹ wiwe lẹ lọ tọn dali: hlan oyílẹn dọ ogbènọ lọ nido yọnẹn dọ Gigogán wẹ dùgán to ahọludu gbẹtọ lẹ tọn mẹ, bo sọ nọ yi i na hlan mẹdepope ewọ jlo, bo nọ zé omẹ he yìdòpatapata daga do e ji.

¹⁸ Odlọ he wẹ yẹn ahọlu Nẹbukadnẹzali ko mọ: podọ hiẹ, Bẹltesazali E, lá otadèna lọ, sọle omẹ nuyọnẹntọ ahọludu ṣie tọn lẹpo ma tin sọgan nado hẹn otadèna lọ zùn yinyọnẹn hlan mi; ṣigba hiẹ tin sọgan, na gbigbọ yẹwhe wiwe lẹ tọn tin to hiẹ mẹ.

¹⁹ Whenẹnu wẹ Daniẹli, oyín mẹhetọn yín Bẹlteṣazali, yín awujinọ na osã de, linlẹn etọn lẹ sọ dotukla ẹ. Ahọlu sọ gblọn bo dọmọ, Bẹlteṣazali, a dike odlọ lọ, kavi otadèna etọn, dotukla we blo. Bẹlteṣazali sọ gblọn bo dọmọ, Klunọ ṣie, odlọ lọ ni tin hlan yé he gbẹwanna we lẹ, podọ otadèna etọn hlan mẹglatọ towe lẹ.

²⁰ Atin he hiẹ mọ, he whén, bo sọ yín sinsinyẹn, ojiyìyì ehetọn yì jẹ olọn, podọ nukunmẹ etọn jẹ aigba lẹpo kón;

²¹ amà ehetọn yín whanpẹnọ, bọ osinsẹ́n etọn sùpli, podọ to e mẹ wẹ núdùdù te na mepopo; ehe glọ gbékanlin danji tọn lẹ nọ nò, podọ alà ehetọn ji ohẹ́ olọn tọn lẹ tindo fininọ̀ yetọn te:

²² ahọlu E, hie wẹ ewọ, he yè hẹn whẹ́n bo sọ lẹzùn sinsinyẹn: na yè hen kiklo towe whẹ́n, bo sọ yì jẹ olọn, podọ ahọluigba towe jẹ opòdo aigba tọn.

²³ Podọ yídomọ ahọlu sọ mọ hihótọ de po omẹ wiwe de po to tejẹ sọn olọn mẹ ja, bo to didọmọ, Sán atin lọ liai, bo và ẹ súdo; ṣogàn jó dodonu adò etọn lẹ tọn dai do aigba mẹ, yèdọ po okọ̀gàn ogànyu po ogànvẹ̃ po tọn de, to ogbé omú danji tọn mẹ; bo sọ gbọ yè ni yí ahún olọn tọn do yọn ẹn, bo gbọ mimá eton ni tin to gbékanlin danji tọn lẹ de, kaka ojlẹ ṣinawe gbọn ewọ ji;

²⁴ ahọlu E, ehe wẹ otadèna lọ, podọ aṣẹ Gigogán tọn wẹ, he yè hẹn wá klunọ ṣie ahọlu ji:

²⁵ dọ yè na yàn we sọn gbẹtọ lẹ mẹ, podọ ninọ̀ towe na tin to gbékanlin danji tọn lẹ de, yè bo na sọ hẹn we nado dù ogbé di oyín lẹ, yè bo na sọ yí ahún olọn tọn do yọ̀n we, ojlẹ ṣinawe na sọ gbọn oji we; kaka hiẹ na do yọnẹn dọ Gigogán we dùgán to ahọludu gbẹtọ lẹ tọn mẹ, bo sọ nọ jó e hlan mẹdepope he ewọ jlo.

²⁶ Podọ yídomọ yé degbé nado jó dòdonu adò atin lọ tọn lẹ dai; ahọludu towe na tin undi hlan we, ehe godo hiẹ ko yọnẹn dọ olọn lẹ wẹ to gándù.

²⁷ Ahọlu E enẹwutu, gbọ hónamẹ ṣie ni yín alọkẹyì hlan we, bo sọ fli ylando towe lẹ gbọn dódó dali, po oylanwà towe lẹ po gbọn lẹblanu sọhia hlan wamọnọ lẹ dali; eyín ohẹngbọ nuwàyìndò towe tọn sọgan tin.

²⁸ Ehe lẹpo wá ahọlu Nẹbukadnẹzali ji.

²⁹ To opòdo osùn wiawe tọn ji ewọ to zọnlinzin to ohònmẹ Babilọni tọn ji.

³⁰ Ahọlu sọ dọhó bo dọmọ, Ehe ma wẹ Babilọni daho, he yẹn ko do na otẹn ninọ̀ ahọlu tọn, gbon hlọnhlọn huhlọn ṣie tọn dali podọ na gigo gigọ, daho ṣie tọn?

³¹ Le ohó lọ tin to onù ahọlu lọ tọn mẹ, ogbè de flẹ finẹ sọn; olọn mẹ, dọmọ, Ahọlu Nẹbukadnẹzali È, hiẹ é yín didọ hlan: yè hẹn ahọludu lọ fọnyì sọn de we.

³² Hiẹ bo na sọ yín yinyàn sọn gbẹtọ lẹ mẹ, ninọ̀ towe na tin to gbékanlin danji tọn lẹ de; hiẹ na sọ yín hinhẹn nado dù ogbé di oyín lẹ, ojlẹ ṣinawe bo na sọ gbọn hiẹ ji; kaka hiẹ na do yọnẹn dọ Gigogán wẹ dùgán to ahọludu gbẹtọ lẹ tọn mẹ, bo sọ nọ jó e hlan mẹdepope he ewọ jlo.

³³ To ọjle dopolọ mẹ wẹ yè hẹn onú lọ ṣẹ to Nẹbukadnẹzali ji: ewọ sọ yín yinyàn sọn gbẹtọ lẹ mẹ, bo sọ dù ogbé di oyín lẹ, yè sọ yí ahún olọn tọn do yọ́n agbasa etọn, kaka yè do hẹn odà etọn gọ́ taidi ofún akùn lẹ tọn, podọ ofẹn etọn lẹ taidi ofẹ́n ohẹ̀ lẹ tọn.

³⁴ To opòdo azán lẹ lọ tọn yẹn Nẹbukadnẹzali zé nukun ṣie lẹ daga hlan olọn, wuntùntùn ṣie bo sọ lẹ́gọ̀ hlan dẽ, Yẹn bo sọ dona Gigogán ọ, podọ yẹn pà bo sọ gbogbéna ewọ he togbẹ̀ kakadoi; na ahọluigba etọn wẹ ahọluigba madopodo de, podọ ahọludu etọn sọn whẹndo mẹ jẹ whẹndo mẹ:

³⁵ podọ tòmẹnu aigba tọn lẹpo wẹ yè hia di ovọ́: ewọ sọ nọ wà kẹdẹdi ojlo etọn to awhànfuntọ olọn tọn lẹ mẹ, podọ to tòmẹnu aigba tọn lẹ ṣẹnṣẹn: podọ mẹde ma sọgan hò alọ etọn só, kavi dọ hlan ẹn dọ, Eté hiẹ wiwà?

³⁶ To ojlẹ dopolọ ji wuntùntùn ṣie lẹ́gọ̀ hlan dẽ; podọ na gigo ahọludu ṣie tọn, gìgodaho ṣie po osìsọ́ po lẹ́gọ̀ hlan dẽ; bọ hónamẹtọ ṣie lẹ po ogán ṣie lẹ po sọ din hlan dẽ; yè sọ hẹn yẹn lódo to ahọludu ṣie mẹ, podọ yè sọ do kiklo yeyinọ é ji hlan mi.

³⁷ Dinvie yẹn Nẹbukadnẹzali pà bo jlayínna bo sọ gbogbéna Ahọlu olọn tọn; na nugbo wẹ azón etọn lẹpo, podọ aliho etọn lẹ whẹ̀dida: podọ enẹlẹ he to zọnlinzin to osakla mẹ lẹ ewọ tin sọgan nado zíndai.