DANIẸLI 3 - BIBLU WIWE LỌ 1923

¹ NẸBUKADNẸZALI ahọlu sọ basi boṣiọ sika tọn de, ote ehetọn yín awàgbà kandeko, podọ ogblo etọn awàgbà ṣidopo: é zé e daga do danfafa Dula tọn mẹ, to gbétatò Babilọni tọn mẹ.

² Whenẹnu wẹ Nẹbukadnẹzali ahọlu domẹhlan nado bẹ́ gbétahọlu le, whépọ́ntọ lẹ, otògán lẹ, whèdatọ lẹ, agbàngopọ́ntọ lẹ, hónamẹtọ lẹ, sẹ́nyízántọ lẹ, po ogán gbétatò lẹ tọn lẹpo po pli, nado wá jẹ klandowiwe oboṣiọ he Nẹbukadnẹzali ahọlu ko zé daga tọn kòn.

³ Whenẹnu wẹ yè bé gbétahọlu lẹ lọ, whépọ́ntọ lẹ, otògán lọ, whèdatọ lẹ, agbàngopọntọ lẹ, hónamẹtọ lẹ, sẹ́nyízántọ lẹ, po ogán gbétatò lọ tọn lẹpo po plidopọ do kinklandowiwe oboṣiọ he Nẹbukadnẹzali ahọlu ko zé daga lọ tọn kọ̀n; yé sọ ṣite to boṣiọ he Nẹbukadnẹzali ko zé daga nukọn.

⁴ Whenẹnu wẹ ogànhútọ dawhá lélé dọ, Mì wẹ é yín gbèdena hlan, mì gbẹtọ lọ emi, akọta lẹ, po ogbè lẹ po,

⁵ dọ ojlẹ he mẹ mì sè núdidọ afinván tọn, okète, ajalen, vángbèlelénọ, hànjinu okànnọ, hànjinu hihò, po hùnkọ kànjinu lẹpo po tọn, mì ni sinọn ai bo litaina obosiọ sika tọn lọ he Nẹbukadnẹzali ahọlu ko zé daga:

⁶ podọ mẹdepope he ma ṣinọn ai bo litai wẹ yè na zédlan to ojlẹ dopolọ ji biọ gblagbla ozohọ̀ miyọn jiji de tọn mẹ.

⁷ Enẹwutu to ojlẹ nẹ ji, whenuena gbẹtọ lẹ sè núdidọ afinván lọ tọn, okète, ajalẹn, vángbèlélénọ, hànjinu okànnọ, po hùnkọ hànjinu lẹpo po tọn, gbẹtọ lẹpo, akọta lẹ, po ogbè lẹ po ṣinọn ai bo Ìitaina oboṣiọ sika tọn he Nẹbukadnẹzali ahọlu ko zé daga.

⁸ Enẹwutu to ojlẹ nẹ ji Kaldeanu delẹ wá sẹpọ́, bo hẹn mẹslẹhó wá Ju lẹ ji.

⁹ Yé gblọn bo dọ hlan Nẹbukadnẹzali ahọlu lọ dọmọ, Ahọlu E, hiẹ nọgbẹ́ kakadoi.

¹⁰ Ahọlu E, hiẹ ko basi aṣẹ de, dọ omẹ he na sè lẹpo núdidọ afinván lọ tọn, okète, ajalẹn, vángbèlélénọ, hànjinu okànnọ, po hànjinu hihò po, po hùnkọ hànjinu lẹpo po tọn, na ṣinọn ai bo litaina oboṣiọ sika tọn lọ:

¹¹ podọ mẹdepope he ma ṣinọn ai bo Ìitai, yè na zédlan biọ gblagbla ozohọ̀ miyọn jiji de tọn mẹ.

¹² Ju dẽlẹ tin mẹhe hiẹ ko dè do owhẹ̀hó gbotatò Babilọni tọn tọn lẹ ji, Ṣadlaki, Mẹsaki, po Abẹdi-nẹgo po; ahọlu E, dawe helẹ, ma ko hò we pọ́n: yé ma to yẹwhe towe lẹ sẹ́n gba, mọ ma sọ litaina oboṣiọ sika tọn lọ he hiẹ ko zé daga.

¹³ Whenẹnu wẹ Nẹbukadnẹzali to adanjijẹ etọn mẹ po homẹwlu po degbè nado hẹn Ṣadlaki, Mẹsaki, po Abẹdi-nẹgo po wá. Whenẹnu wẹ yé hẹn dawe helẹ wá ahọlu nukọn.

¹⁴ Nẹbukadnẹzali sọ gblọn bo dọ hlan yé dọmọ, Hiẹ Ṣadlaki, Mẹsaki, po Abẹdinẹgo po, oyílẹn mẹ é tin sọn, bọ mìwlẹ ma do sẹ̀n yẹwhe ṣie, mọ bo ma sọ litaina oboṣio sika tọn lọ he yẹn ko zé daga?

¹⁵ Dinvie eyín mìwlẹ yín awuwlenọ dọ to ojlẹ he ji mì sè núdidọ afinván lọ tọn, okète; ajalẹn, vángbèlélénọ, hànjinu okànnọ, po hànjinú hihò po, po húnkọ hànjinu lẹpo po tọn, mì ṣinọn ai bo litaina obosiọ he yen ko basi lọ, bé dado: ṣigba eyín mìwlẹ ma litaina, yè na zé mì dlan to ojlẹ dopolọ mẹ biọ gblagbla, ozohọ̀ miyọn jiji de tọn mẹ; podọ mẹnu wẹ yẹwhe nẹ he na whlẹn mì sọn alọ ṣie lẹ mẹ?

¹⁶ Ṣadlaki, Mẹsaki, po Abẹdi-nẹgo po, sọ gblọn bo dọ hlan ahọlu lọ dọ, Nẹbukadnẹzali E, míwlẹ ma tindo núwhèdo de nado gblọnna we to owhẹ̀hó he mẹ gba.

¹⁷ Dayi e go, Jiwheyẹwhe mítọn mẹhe mìwlẹ to sinsẹ̀n tin sọgan nado whlẹn mí sọn ozohọ̀ miyọn jiji lọ tọn mẹ; ewọ bo na sọwhlẹn mí sọn alọ towe mẹ, hiẹ ahọlu È.

¹⁸ Ṣigba eyín lala, ahọlu E, é ni yín yinyọnẹn hlan we, dọ míwlẹ ma na sẹ̀n yẹwhe towe lẹ gba, mọ litaina oboṣiọ sika tọn lọ he hiẹ ko zé daga gba.

¹⁹ Whenẹnu wẹ Nẹbukadnẹzali gọ́ na homẹwlu, bọ ojlẹmọ nukunmẹ etọn tọn sọ yín didiọ do Ṣadlaki, Mẹsaki, po Abẹdi-nẹgo po ji: enẹwutu é dọhó, bo degbè na yé ni do hẹn ozohọ̀ lọ hùnmiyọn whla ṣinawe húgán le yè jlo nado hẹn ẹn hùnmíyọn do.

²⁰ Ewọ sọ degbèna omẹ hlọnhlọnnọ dẽlẹ he tin to awhànfuntọ eton lẹ mẹ nado bla Ṣadlaki, Mẹsaki, po Abedi-nẹgo po, nado zé yé dlan biọ ozohọ̀ miyọn jiji lọ tọn mẹ.

²¹ Whenẹnu wẹ yè bla dawe helẹ to afọbudo yetọn lẹ mẹ, otabudo yetọn lẹ, po avọ̀kọdo yetọn lẹ po, po awugbó yetọn devo lẹ po, yè bo sọ zé yé dlan biọ gblagbla ozohọ́ miyọn jiji lọ tọn mẹ.

²² Enẹwutu na gbèdide ahọlu tọn yín plapla wutu, bọ ozohọ̀ lọ sọ hùnmíyọn gbahugbahu, ozolọ miyọn lọ tọn hù omẹ he dida Ṣadlaki, Mẹsaki, po Abẹdi-nẹgo po nẹlẹ.

²³ Dawe atọ̀n helẹ, Ṣadlaki, Mẹsaki, po Abẹdi-nẹgo po, sọ jai bibla biọ gblagbla ozohò miyọn jiji lọ tọn mẹ.

²⁴ Whenẹnu wẹ Nẹbukadnẹzali ahọlu lọ yín awujinọ, bo sọ tite to awuyìya mẹ: é dọhó bo sọ dọ hlan hónamẹtọ etọn lẹ dọ, Omẹ atọ̀n bibla ma wẹ mi zédlan biọ gblagbla miyọn tọn mẹ? Yé gblọn bo sọ dọ hlan ahọiu dọ, Ahọlu E, nugbo wẹ.

²⁵ Ewọ sọ gblọn bo dọmọ, Pọ́n, Yẹn mọ omẹ ẹnẹ túntun, zọ̀nlinzin to gblagbla mìyọn lọ tọn mẹ, Yé ma sọ tindo awugble de; podọ mimọ mẹnẹtọ lọ tọn tin taidi visunnu yẹwhe lẹ tọn de.

²⁶ Whenenu wẹ Nẹbukadnẹzali wá sẹpọ́ jẹ ohọ̀n ozohọ̀ miyọn jiji lọ tọn kọ̀n: é dọhó bo dọmọ, Ṣadlaki, Mẹsaki, po Abẹdi-nẹgo po, mì devi Jiwheyẹwhe Gigogán tọn lẹ, mì jẹgbonu wá, bo wá flle. Whenẹnu wẹ Ṣadlaki, Mesakì, po Abẹdi-nẹgo po, jẹgbonu sọn gblagbla miyọn lọ tọn mẹ wá.

²⁷ Gbétahọlu le, whépọ́ntọ lẹ, po otògán lẹ po, po hónamẹtọ ahọlú tọn le po, he yè bẹ́ plidopọ lẹ, mọ dawe helẹ, dọ miyọn ma tindo huhlọn de to agbasa yetọn lẹ ji, mọ odà ota yetọn ton ma yín wiwlọ, mọ afọbudo yetọn lẹ ma yín didiọ, mọ owán miyọn tọn ma tlẹ gbọn yé jì gba

²⁸ Nẹbukadnẹzali sọ dọhó bo dọmọ, Donanọ Jiwheyẹwhe Ṣadlaki, Mẹsaki, po Abẹdinẹgo po tọn yín, mẹhe ko do angẹli etọn lẹ hlan, bo whlẹn devi etọn he dotu to ewọ mẹ lẹ gán, bo ko diọ ohó ahọlu tọn lọ, bo ko sọ jó agbasa yetọn lẹ hlan, na yé ma na do són mọ ma sọ litaina yẹwhe depope, adavo Jiwheyẹwhe yetọn lọsu.

²⁹ Enẹwutu Yẹn sọ basi asẹ de, dọ gbẹtọ lẹpo, akọta, po ogbè po, he dọ onú depope jẹagò do Jiwheyẹwhe Ṣadlaki, Mẹsaki, po Abẹdi-nẹgo po tọn go, Yè na sán do flinflin, owhé yetọn lẹ na sọ yín ogboji de: na yẹwhe dẽvo de ma tin he tin sọgan nado whlẹnmẹ kẹdẹdi ehe hùnkọ wutu.

³⁰ Whenẹnu wẹ ahọlu zé Ṣadlaki, Mẹsaki, po Abẹdi-nẹgo po daga, to gbétatò Babilọni tọn mẹ.