DANIẸLI 2 - BIBLU WIWE LỌ 1923

¹ PODỌ to owhè awetọ ahọludu Nẹbukadnẹzali tọn tọn mẹ, Nẹbukadnẹzali kú ọdlọ lẹ; yè sọ hẹn gbigbọ eton jẹtukla, amlọn etọn sọ klón sọn e de.

² Whenẹnu wẹ ahọlu degbè nado ylọ nújlẹtọ lẹ, po afinọnnọ lẹ po, po owọntọ lẹ po, po Kaldeanu lẹ po, na nado dọ na ahọlu odlọ etọn lẹ. Mowẹ yé wá họmẹ bo site to ahọlu nukọn.

³ Ahọlu sọ dọ hlan yé dọ, Yẹn ko kú odlọ de, yè sọ hẹn gbigbọ ṣie jẹtukla nado yón odlọ lọ.

⁴ Whenẹnu wẹ Kaldeanu lẹ dọhó hlan ahọlu to ogbè Silia tọn mẹ dọ, Ahọlu ni nọgbè kakadoi: dọ odlọ lọ na devi towe lẹ, míwlẹ bo na sọ do otadèna lọ hia.

⁵ Ahọlu sọ gblọn bo dọ hlan Kaldeanu lẹ dọ, Yè hẹn ohó lọ jẹgbonu yì sọn dẽ: eyín míwlẹ ma hẹn odlọ lọ po otadèna etọn po zùn yinyọnẹn hlan mi gba, mì na yín sinsán do flinflin, yè na sọ hẹn owhé mìtọn lẹ zùn ogbóji de,

⁶ ṣigba eyín mìwlẹ do odlọ lọ hia po otadèna etọn po, mì na mọ nunina lẹ yí sọn dẽ po ale lẹ po po ogbégbo daho po: enẹwutu mì do odlọ lọ hia mi po otadèna etọn po.

⁷ Yé sọ gblọn whla awetọ bo dọmọ, Gbọ ahọlu ni dọ odlọ lọ na devi etọn lẹ, míwlẹ bo na sọ do otadèna etọn hia.

⁸ Ahọlu sọ gblọn bo dọmọ, Yẹn yọnẹn sọn nugbo de mẹ dọ míwlẹ do na hò ojlẹ lọ, na mìwlẹ mọ dọ yè hẹn ohó lọ jẹgbonu yì sọn dẽ wutu.

⁹ Ṣigba eyín míwlẹ ma hẹn odlọ lọ zùn yinyọnẹn hlan mi gba, osén dopo janwẹ tin na mì: na mìwlẹ ko wleawu ohó lalo po gbigble lẹ po tọn nado dọ to nukọn ṣie, kaka ojlẹ lọ yín didiọ: enẹwutu mì dọ odlọ lọ na mì, yẹn na sọ yọnẹn dọ mì sọgan do otadèna etọn hia mi.

¹⁰ Kaldeanu lẹ sọ gblọn to ahọlu nukọn, bo dọmọ, Omẹ de ma tin finẹ to aigba ji he sọgan do owhẹ̀hó ahọlu tọn hia gba: sọle ahọlu, OKLUNỌ, kavi ogán de, ma ko kàn onú mọnkọ de biọ sọn nújlẹtọ, kavi afinọnnọ, kavi Kaldeanu depope de gba.

¹¹ Podọ onú maya de wẹ ehe ahọlu kanbiọ, podọ mẹdevo de ma tin finẹ he sọgan do e hia to ahọlu nukọn gba, adavo yẹwhe lẹ, ninò mẹhetọn ma tin to agbasalan de.

¹² Na ehe wutu ahọlu yín adinọ podọ homẹwlunọ talala, bo sọ degbè nado và omẹ nuyọnẹntọ Babilọni tọn lepo.

¹³ Mowẹ asẹ jẹgbonu yì, podọ omẹ nuyọnẹntọ lẹ lọ tin nado yín hùhù; Yé bo sọ to Daniẹli po ogbẹ́ etọn lẹ po din nado yín hùhù.

¹⁴ Whenẹnu wẹ Daniẹli yí ohónamẹ po zìnzìn po do lẹ́ ogbègblọn gọ̀ hlan Aliọki awhàngán ogànwhé ahọlu tọn tọn, he yè hẹn jẹgbonu yì nado hù omẹ nuyọnẹntọ Babilọni tọn lẹ;

¹⁵ é gblọn bo sọ dọ hlan Aliọki awhàngán ahọlu tọn dọmọ, Etẹwutu wẹ aṣẹ lọ do yín plapla sọn ahọlu de mọ? Whenẹnu wẹ Aliọki hẹn onú lọ zùn yinyọnẹn hlan Daniẹli.

¹⁶ Daniẹli sọ yì họmẹ, bo biọ sọn ahọlu de na é ni na ojlẹ de e, na ewọ nido do otadèna lọ hia ahọlu.

¹⁷ Whenẹnu we Daniẹli yì jẹ ohọ̀ etọn mẹ, bo sọ hẹn onú lọ zùn yinyọnen hlan Hanania, Misaẹli, po Azalia po, ogbẹ́ etọn lẹ:

¹⁸ na yé na do biọ lẹblanu lẹ sọn Jiwheyẹwhe olọn tọn de gbọn aṣe he tọn dali; na Daniẹli po ogbẹ́ etọn lẹ po ma na do súdo po pipòtọ omẹ nuyọnẹntọ Babilọni tọn tọn lẹ po gba.

¹⁹ Whenẹnu wẹ yè dè aṣli lọ hia hlan Danieli to numimọ ozánmẹ tọn de mẹ. Whenẹnu wẹ Daniẹli sọ dona Jiwheyẹwhe olọn tọn.

²⁰ Danieli sọ gblọn bo dọmọ, Donanọ oyín Jiwheyẹwhe tọn ni yín kakadoidoi, na etọn wẹ nuyọnẹn po hlọnhlọn po yín:

²¹ podọ e sọ nọ diọ ojlẹ le po osã lẹ po: e nọ dìotenna ahọlu lẹ sẹ̀, bo sọ nọ zé ahọlu lẹ daga: é no na nuyọnen hlan nuyọnentọ lẹ, po oyonẹn po hlan yé he yọ́n wuntùntùn.

²² E nọ dè onú sisosiso po aṣli po hia: ewọ yọ́n núhe tin to zinvlu mẹ, podọ é de wẹ hinhọ́n sọ nọ nọ̀.

²³ Yẹn dopẹna we, bo so pà we, hiẹ Jiwheyẹwhe otọ ṣie lẹ tọn È, mẹhe ko na nuyọnẹn po hlọnhlọn po mi, bo ko so hẹn zùn yinyọnẹn hlan mi dinvie núhe míwlẹ kanbiọ sọn de we: na hiẹ ko hẹn owhẹ̀hó ahọlu ton zùn yinyọnẹn hlan mí.

²⁴ Enẹwutu Daniẹli yì họme je Alioki de, mẹhe aholu ko dè nado sú omẹ nuyọnẹntọ Babilọni tọn lẹ do: é yì bo sọ dọ le hlan ẹn dọ; A và omẹ nuyọnẹntọ Babilọni tọn lẹ blo: hẹn mi wá họme to ahọlu nukọn, yẹn bo na sọ do otadèna lọ hia aholu.

²⁵ Whenẹnu wẹ Alioki hẹn Daniẹli wá họmẹ to ahọlu nukọn to awuya me, bo dọ le hlan ẹn dọ, Yẹn ko mọ dawe de sọn ovi mẹmẹglọ Juda tọn lẹ mẹ, he na hen otadèna lọ zùn yinyọnen hlan ahọlu.

²⁶ Ahọlu sọ gblọn bo dọ hlan Daniẹli, oyín mẹhetọn yín Bẹltesazali, dọmọ, Hie tin sọgan nado hẹn odlọ he yẹn ko mọ zùn yinyọnen hlan mi, po otadèna eton po?

²⁷ Daniẹli sọ gblọn to ahọlu nukọn, bo dọmọ, Asli he ahọlu ko biọ, omẹ nuyọnẹntọ lẹ, afinọnnọ lẹ, nújlẹtọ lẹ de, kavi odọṣẹnọ lẹ ma tle sọgan dohia hlan ahọlu gba;

²⁸ ṣigba Jiwheyẹwhe de tin to olọn mẹ he nọ dè aṣli lẹ hia, podọ ewọ ko sọ hẹn núhe na tin to azán godotọn lẹ mẹ zùn yinyọnẹn hlan Nẹbukadnẹzali, Odlọ towe, po numimọ ota towe tọn lẹ po to adọzàn, towẹ ji wẹ ehelẹ:

²⁹ na biẹ tọn, ahọlu E, linlẹn towe lẹ biọ ayiha towe mẹ wá to adọzàn towe ji, nuhe do na jọ to osọ̀godo; podọ ewọ he nọ dè aṣli lẹ hia ko hẹn núhe na wá jọ lẹ zùn zinyọnẹn hlan we.

³⁰ Ṣigba na yẹn tọn, yè ma dè aṣli he hia hlan mi na nuyọnẹn depope heyẹn tindo húgan ogbẹ̀nọ depope gba, ṣigba hlan yílẹn lọ na yè nido hẹn otadèna lọ zùn yinyọnẹn hlan ahọlu, podọ na hiẹ nido yọ́n, linlẹn ayiha; towe tọn lẹ.

³¹ Ahọlu È, hie mọ, bo sọ dayi boṣiọ daho de go. Boṣiọ he, he yín hlọnhlọnnọ, podọ sisẹ́ mẹhetọn yín gigodahonọ, site to nukọn towe; podọ mimọ etọn lọ sọ yín núdobu.

³² Na boṣiọ he tọn, ota etọn tin sọn sika dagbedagbe mẹ, anó etọn po awà etọn le po sọn fataka mẹ, ohòto etọn po asapada etọn lẹ po sọn ogànvẹ̃ mẹ.

³³ Azàngándán etọn lẹ sọn ogànyu mẹ, afọ etọn lẹ adade sọn ogànyu mẹ, podọ adade sọn okò mẹ.

³⁴ Hiẹ tomimọkaka bọ yè do san zannu matin alọ lẹ de jẹgbonu, he hò bosiọ lọ to afọ etọn he tin sọn ogànyu po okò po mẹ lẹ ji, bo sọ gbà yé do flinflin.

³⁵ Whenẹnu wẹ yè gbà ogànyu lọ, okò lọ, ogànvẹ̃ lọ, fataka lọ, po sika lọ po do flinflin dopọ, bọ é sọ lẹzùn taidi núyọ vẹ̃ngbaji alúnlún mẹ tọn lẹ; ojẹhọn sọ bẹ́ yé yì, bọ yè ma sọ do mọ otẹn de na yé gba: podọ zannu he họ̀ boṣiọ lọ sọ lẹzùn osé daho de, bo sọ gó aigba lọ pete.

³⁶ Ehe wẹ odlọ lọ; míwlẹ bo na sọ dọ otadèna etọn to ahọlu nukọn.

³⁷ Aholu E, hiẹ wẹ ahọlu ahọlu lẹ tọn, mẹhe Jiwheyẹwhe olọn tọn ko na ahọludu, huhlọn, po gándidu po, po gigo po hlan;

³⁸ podọ fie ovi gbẹtọ lẹ tọn lẹ nọ nọ̀ depope, gbékanlin danji tọn lẹ po ohọ́ olọn tọn lẹ po wẹ ewọ ko na do alọ towe mẹ, bo ko sọ hẹn we nado dùgán to yé mẹpó ji: hiẹ wẹ ota sika tọn.

³⁹ Podọ to hiẹ godo wẹ ahọludu devo whèhú hlan we na tite; podo devo ahọludu atọ̀ntọ sọn ogànvẹ̃ mẹ, he na hẹn ogándù to aigba lẹpo ji.

⁴⁰ Podọ ahọludu ẹnẹtọ na yín sinsinyẹn di ogànyu: sọle ogànyu wén do flinflin bo sọ howhiwhẹ onú lẹpo: podọ di ogànyu he pétẹ ehe lẹpo, wẹ é na gbà do flinflin bo sọ pétẹ.

⁴¹ Podọ yídomọ hiẹ mọ afọ lẹ po afọsú lẹ po, adade okò ozẹ́ndotọ lẹ tọn, podọ adade ogànyu tọn, é na yín ahọludu mimá de; ṣigba é na tin to e mẹ finẹ sọn gándido ogànyu tọn mẹ, sọle hie mọ ogànyu lọ flusọ po okòzén po.

⁴² Podọ le afọsú afọ lẹ tọn yín adade ogànyu, Utọn, podọ adade okò tọn, mọwẹ ahọludu lọ na yín sinsinyẹn, podọ adade gbigbà.

⁴³ Podọ yídomọ hiẹ mọ ogànyu flusọ po okòzẹ́n po, yé na hẹn yéde flusọ po okún gbẹtọ lẹ tọn po; ṣigba yé ma na bọdo yénọzo go gba, yèdọ dile ogànyu lọ ma flusọ po okò lọ po do.

⁴⁴ Podọ to azán ahọlu nẹlẹ tọn lẹ mẹ wẹ Jiwheyẹwhe olọn tọn na zé ahọludu de daga, he ma na yín vivà gbède, mọ yè ma na jó ahọludu etọn dai hlan gbẹtọ devo lẹ gba; ṣigba é na gbà ahọludu do flinflin bo sú ahọludu he lẹpo do, ewọ bo na sọ nọte kakadoi.

⁴⁵ Sọle hiẹ mọ dọ yè sán zannu de aọn osé lọ mẹ matin alọ lẹ, podọ é gbà ogànyu lọ, ogànvẹ̃ lọ, okò lọ, fataka lọ, po sika lọ po do flinflin; Jiwheyẹwhe daho lọ ko hẹn zùn yinyọnẹn hlan ahọlu núhe na jọ to osògodo: podọ nugbo wẹ odlọ lọ yin, bọ otadèna etọn sọ diun.

⁴⁶ Whenẹnu wẹ ahọlu Nẹbukadnẹzali hó jẹ nukunmẹ etọn ji, bo litaina Daniẹli, bo sọ degbè na yé do na avọ̀sánnu de po nudèwan vivi lẹ po hlan ẹn.

⁴⁷ Ahọlu sọ gblọn hlan Daniẹli, bo dọmọ, Sọn nugbo de mẹ Jiwheyẹwhe towe wẹ Jiwheyẹwhe yẹwhe lẹ tọn, podọ OKLUNỌ ahọlu lẹ tọn, po dìdèhìatọ aṣli le tọn de po, mimọ hiẹ ko tin sọgan nado dè aṣli he hia mi.

⁴⁸ Whenẹnu wẹ ahọlu hẹn Daniẹli klo, bo sọ na nunina susu daho ewọ, bo sọ hẹn ẹn nado dùgán to gbétatò Babilọni tọn pete ji, podọ nado yín nukọntọ otògán to omẹ nuyọnẹntọ Babilọni tọn lẹpo ji.

⁴⁹ Daniẹli sọ kanbiọ sọn ahọlu de, ewọ sọ dè Ṣadlaki, Misaki, po Abẹdi-nẹgo po, do owhẹ̀hó gbétatò Babilọni tọn tọn lẹ ji: ṣigba Daniẹli tin to otògùn ahọlu tọn mẹ.