DANIẸLI 12 - BIBLU WIWE LỌ 1923

¹ PODỌ to ojlẹ nẹ ji wẹ Mikaẹli na tite, ahọvi daho lọ he ṣìtè na ovi Ome towe lẹ tọn lẹ: ojlẹ tuklá tọn de na sọ tin finẹ, hùnkọ he ma ko tin gbède sọn whenu akọta de ko tin yèdọ jẹ ojlẹ dopolọ nẹ mẹ: podọ to ojlẹ nẹ ji omẹ towe lẹ na yín whinwhlẹn, omẹ dopodopo he na yín mimọ wlan tó owé lọ mẹ.

² Podọ susu yé tọn he damlọn to kógudu aigba tọn mẹ na fọ́n, dẽlẹ hlan ogbè madopodo, podọ dẽlẹ hlan owinyan po wangbẹna madopodo po.

³ Podọ mẹplọntọ he yín nuyọnẹntọ lẹ na to sisẹ́ dí osisẹ́ dovlomẹ tọn; podọ yé he lẹ́ mẹsusu hlan dódó kọ̀n lẹ di sunwhlẹvu lẹ kakadoidoi.

⁴ Ṣigba hiẹ, Daniẹli È, súnúdo ohó lẹ lọ, bo sọ yí ohiadonu do tlé owé lọ, yèdọ jẹ ojlẹ opòdo lọ tọn: mẹsusu na họ̀nwezun yìgodo podọ yìnukọn, yè na sọ hẹn oyọnẹn sudeji.

⁵ Whenẹnu wẹ yẹn Daniẹli pọ́n, bo, dayi e go, mẹawe devo lẹ site finẹ, dopo to otọ́ otò lọ tọn to awà he ji, podọ awetọ to otọ́ otò lọ tọn to awà nẹ ji.

⁶ Ode sọ dọ hlan dawe yè ṣinyọn alàvò na lọ he tin taga osìn otọ́ lọ tọn lẹ, dọmọ, Nawẹ é na yín dindẹn sọ jẹ opòdo awujinu hele lọ tọn?

⁷ Yẹn sọ sè dawe yè ṣinyọn alàvò na lọ, he tin taga osìn otò lọ tọn le, whenuena é zé alọ etọn adusi po alọ amiọn etọn po daga hlan olọn, bo whle gbọn ewọ he togbẹ̀ kakadoi dali dọ é na tin na ojlẹ de, ojlẹ lẹ, po odá de po; podọ whenuena yé ko basi opòdo gbigbà huhlọn omẹ wiwe lẹ tọn tọn de hanyanhanyan, onú he lepo na yín tadona.

⁸ Podọ yẹn sè, ṣigba yẹn ma tùnwun gba: whenẹnu wẹ yẹn dọmọ, Klunọ ṣie È, Etẹ́ wẹ na yín opòdo agọ̀gbọnẹn onú helẹ tọn?

⁹ Ewọ sọ dọmọ, Daniẹli, to yìyì na dewe, na ohó lẹ lọ yín núsúnúdo bo sọ yín yíyí ohiadonu do tlẹ́ jẹ ojlẹ opòdo lọ tọn.

¹⁰ Mẹsusu na lẹ̀ yéde wé, bo sọ hẹn yéde zùn wéwé, bo sọ yín kiklọwé; ṣigba mẹylankan lẹ na yí ylankan do to wiwà; ṣigba mẹplọntọ he yín nuyọnẹntọ lẹ na tùnwun.

¹¹ Podọ sọn ojlẹ he mẹ avọ́ nunina mìinó whẹwhẹ tọn lọ na yín didè sẹ̀, bọ Osùnú he basi ojẹvọ́ lọ yín zizé daga, na yín azán fọṣidopo po kanweao po.

¹² Donanọ ewọ he nọtepọ́n yín, bo sọ wá jẹ azán fọṣidopo po kantọ̀nfọtọ̀n po lọ kòn.

¹³ Ṣigba hiẹ to yìyì na dewe kaka ojlẹ lọ na do tin: na hiẹ na gbọjẹ, bo sọ site to tẹnmimọ towe mẹ, to opòdo azán lẹ lọ tọn.