AVIGBÈ JẸLEMIA TỌN 3 - BIBLU WIWE LỌ 1923

¹ YẸN wẹ dawe lọ he ko mọ nukunbia gbọn opò homegble etọn tọn dali.

² Ewọ ko plan mi bo sọ hẹn mi nado zinzọnlin to zinvlu mẹ matin hinhọ́n.

³ Nugbonugbo ewọ to alọ etọn lé do ogo e pludopludo to azán popo gbè.

⁴ Ewọ ko hẹn agbasalan ṣie po awu ṣie po vún; ewọ ko wén ohú ṣie lẹ.

⁵ Ewọ ko do do oji e, bo sọ yí ovivé po afei po do lédo mi.

⁶ Ewọ ko hẹn mi nado nọ nò otẹn dozinvlu lẹ mẹ, di enẹlẹ he ko yín osiọ azándindẹn.

⁷ Ewọ ko dopalédo mi pé, bọ yẹn ma sọ sọgan jẹgbonu yì; ewọ ko hẹn ogàn ṣie zùn pinpẹn.

⁸ Mọwẹ, whenuena yẹn dawhá bo ylọ na alọgọ, ewọ glọn odẹ̀ ṣie do gbonu.

⁹ Ewọ ko yí ozánnu pipa do doapólẹdo aliho ṣie lẹ, ewọ ko sọ hẹn omọji ṣie gbán.

¹⁰ Ewọ tin hlan mi di bẹalì he mlọnai to owu mẹ de, di kinnikinni de to otẹn whiwhla lẹ mẹ.

¹¹ Ewọ ko lé aliho ṣie lẹ do apadopo, bo ko tlẹn mi do flinflin; ewọ ko hẹn mi zùn ovọ́jẹ;

¹² Ewọ ko dẹ́ ogába etọn, bo zé mi do di núdodìnna de na ogá lọ.

¹³ Ewọ ko hẹn visunnu etọn lẹ nado biọ ahúnkẹn ṣie mẹ.

¹⁴ Yẹn tin lẹzùn ovlẹko de hlan omẹ ṣie lẹpo: podọ ohàn yetọn to azán popo gbè.

¹⁵ Ewọ ko yí ovivé do gọ́ mi, ewọ ko yinúvivi do pékọna mi.

¹⁶ Ewọ ko yí ozánnu okẹ́nnọ lẹ do gbà adú ṣie, ewọ ko yí afín do ṣinyọn mi.

¹⁷ Hiẹ ko zé alindọn ṣie dlangbé dẹn sọn jijọho mẹ: Yẹn sọ wọn ogbèdùdù.

¹⁸ Yẹn sọ dọmọ, Yè và huhlọn ṣie súdo, podọ o tódido ṣie sọn OKLUNỌ de.

¹⁹ Flin nukunbia ṣie po otapipò ṣie po, nuvivẹ́ po ovivé pó.

²⁰ Alindọn ṣie tindo yé to oflin mẹ jãnwẹ, yè sọ hẹn ẹn dé do odò to hòmẹ na mi.

²¹ Yẹn to ehe yílẹn to otu ṣie mẹ, enẹwutu wẹ yẹn tindo tódido.

²² Lẹblanu OKLUNỌ tọn lẹ mẹ é sọn bọ yè ma do và mí súdo, na akọ́ndonanú etọn ma nọ gbọ̀vọ̀ wutu.

²³ Yọ́yọ́ wẹ yé to afọnnu afọnnu; daho wẹ nugbowà etọn.

²⁴ OKLUNỌ wẹ mimá ṣie, wẹ alindọn ṣie dọ; enẹwutu wẹ yẹn na dotódido to ewọ mẹ.

²⁵ Dagbe wẹ OKLUNỌ hlan yé he nọtepọ́n ẹn lẹ, hlan alindọn he to dindin in lẹ.

²⁶ Dagbe wẹ dọ omẹ de ni dotódido bo sọ yí abọẹnọ do nọte na whlẹngan OKLUNỌ tọn.

²⁷ Dagbe wẹ na sunnusi de dọ ewọ hẹn oglepònu lọ to ovuwhenu etọn mẹ.

²⁸ Gbọ ewọ ni sinai dopogánna bo sọ nabọẹ, na ewọ ko zé e do e ji wutu.

²⁹ Gbọ ewọ ni yí onù etọn do kọgudu mẹ; eyín mọ é yín tódido sọgan tin finẹ.

³⁰ Gbọ ewọ ni na alaka etọn hlan ewọ he hò e; gbọ yè ni yí; ovlẹ do ki ewọ ni gọ́.

³¹ Na OKLUNỌ ma na zé omẹ dlan kakadoi gba.

³² Na yín ewo hẹn homẹgble wá gãnṣo ewọ na tindo akọndidona kẹdẹdi ògégé lẹblanu etọn lẹ tọn.

³³ Na ewọ ma nọ bianukunna omẹ sọn ayiha mẹ gba, mọ ewọ ma sọ nọ hẹnhomẹgble ovi gbẹtọ tọn lẹ.

³⁴ Nado pẹ́tẹ ogàntọ aigba tọn lẹpo to afọ glọ,

³⁵ Nado lẹ́ ojlọjẹ omẹ de tọn do apadopo to nukunmẹ Mẹyìji Petepete lọ tọn nukọn,

³⁶ Nado hùngona omẹ de to owhẹ̀hó etọn mẹ, OKLUNỌ ma mọ gba.

³⁷ Menu wẹ ewọ he dọ, bọ é sọ jọ, whenuena OKLUNỌ ma degbè gba?

³⁸ Onù Meyìji Petepete lọ ton mẹ oylan po dagbe po ma sọn finẹ wá gba?

³⁹ Etẹwutu wẹ gbẹtọ ogbẹ́nọ de do to kuefan, omẹ he tin to ylando etọn lẹ mẹ.

⁴⁰ Gbọ mí ni din bo sọ whlé aliho mítọn lẹ pọ́n, bo sọ lé do OKLUNỌ de.

⁴¹ Gbọ mí ni zé ayiha mítọn po alọ mìton lẹ po daga hlan Jiwheyẹwhe to olọn lẹ mẹ.

⁴² Mí ko jẹsẹ́nmẹ bo ko sọ ṣiatẹ; hiẹ ma ko sọ jona gba.

⁴³ Hiẹ ko ṣinyọnnu dewe, hiẹ ko hù, hie ma blawu gba.

⁴⁴ Hiẹ ko yi aslọ de ṣinyọn dewe, na ode mítọn ma na do luntọ́n.

⁴⁵ Hiẹ ko basi mí di núsúnsúnsẹ̀ po nugbẹ́dai po to gblagbla akọta lẹ tọn mẹ.

⁴⁶ Okẹntọ mítọn lẹpo ko kẹ̀ onù yetọn gblo do mí ji.

⁴⁷ Ye hẹn obu po odò po wá mí ji, zingidi po vivà po.

⁴⁸ Nukun ṣie yí otọ̀ osìn tọn lẹ do to sisà, na vivà viyọnnu omẹ ṣie lẹ tọn.

⁴⁹ Nukun ṣie kọ̀n dai, bo ma gbòdò, matin ozẹ̀demẹ depope,

⁵⁰ Kaka OKLUNỌ do pọ́n odo bo sọ dayi e go sọn olọn mẹ.

⁵¹ Nukun ṣie wànúdo alindọn ṣie, na viyọnnu tòdaho ṣie tọn lẹpo tọn wutu.

⁵² Yé he yín kẹ̀ntọ ṣie matin owhèhó lẹ ko dowuna mi badabada di na ohè de.

⁵³ Ye ko sán ogbẹ̀ ṣie sẹ̀ to okosọ́ mẹ, bo ko sọ dlẹn ozánnu de do oji e.

⁵⁴ Osìn lẹ sà gbọn ota siẹ wáyì: yẹn sọ dọmọ, Yẹn yín sinsán sẹ̀.

⁵⁵ Yẹn dawhá ylọ oyín towe, sọn odòpete akosó tọn mẹ, OKLUNỌ E.

⁵⁶ Hiẹ sọ sè ogbè ṣie: a whla otọ́ towe do gbigbọ ṣie go blo, do awhá ṣie go.

⁵⁷ Hie dòn sẹpọ́ to azán he gbè yẹn dawhá ylọ we: hiẹ sọ dọmọ, A dibu blo.

⁵⁸ OKLUNỌ È, hie ko yí owhèhó alindọn ṣie tọn lẹ dọ; hiẹ ko fli ogbè ṣie.

⁵⁹ OKLUNỌ E, hiẹ ko mọ mayon ṣie: hiẹ ni dawhẹ̀na owhẹhó ṣie.

⁶⁰ Hie ko mọ ahọsuyí yetọn lẹpo po núbladọ yetọn lẹpo po do ogo e.

⁶¹ OKLUNỌ E, hiẹ ko sè ovlẹ yetọn, po núbladọ yetọn lẹpo po do ogo e;

⁶² Nuflo enẹlẹ he fọ́n site do oji tọn lẹ, po ayihalinlẹn yetọn po do oji e to azán popo gbè.

⁶³ Dayi aisinsin yetọn go, po fìnfon tite yetọn po; Yẹn wẹ ohàn yetọn.

⁶⁴ Hiẹ na na ahọsu de hlan yé, OKLUNỌ E kẹdẹdi azón alọ yeton lẹ tọn.

⁶⁵ Hie na na oṣinyọn ayiha tọn yé, dẹhodo towe hlan yé.

⁶⁶ Hiẹ na domọna yé to adi mẹ, bo sọ và ye sọn olọn OKLUNỌ tọn lẹ glọ.