2 TIMOTI 4 - BIBLU WIWE LỌ 1923

¹ ENẸWUTU yẹn degbèna we to Jiwheyẹwhe nukọn, podọ to Jesu Klisti Oklunọ nukọn, mẹhe na dawhèna omẹ he to ogbẹ̀ po osiọ lẹ po to awúsọhia etọn po ahọludu etọn po whenu;

² nọ dọyẹwheho ohó lọ tọn; do magbojẹ na dewe to ojlẹ mẹ podọ to ma yín ojlẹ mẹ, nọ yí linsinsinyẹn po oplón lepo po do wọhẹmẹ, nọ yí do pọnmego, bo sọ nọ jlahomẹdonamẹ.

³ Na ojlẹ na wa bọ yé ma to na doakónna oplọ́n he pégan; ṣigba to wantúntún yetọn titi me, yé he tlitó, yé na bé meplọntọ pli na yede;

⁴ yé na lẹ otọ́ yetọn sọn nugbo me, bo nasọ gò do otàn ovó kòn.

⁵ Ṣigba nọ hó dewe to onú popo mẹ, doakónna nukunbia, nọ to azón yẹwhehodọtọ tọn wà pe, bo nọ wàzón devizón towe tọn diun hézéhézé.

⁶ Na yè ko túntún mi kònyìngbe dinvie di núnùnù he yè do sánvọ́ de, yìyì whenu ṣie sọ sẹpọ́.

⁷ Yẹn ko hòavùn dagbe lọ, yẹn ko hẹn ali ṣie jẹ podo, yẹn ko yìn yise lọ:

⁸ sọn dinvie yè ko zé ojẹgbakun dódó tọn daga na mi, ehe Oklunọ, whẹdatọ dódónọ, na na mi to azán nẹ gbè: é ma sọ yin hlan yen dopokẹdẹ gba, ṣigba hlan yé he yiwanna awúsọhia etọn le ga.

⁹ Dovivẹnu nado wá dẽ to azánvi helẹ me:

¹⁰ na Dema ko gbé mì dai, é yiwanna aihọn dinvie tọn, bo sọ yì Tẹsalonika; Klẹskẹni yì Galatia, Titu sọ yì Dalmatia.

¹¹ Luku dopokẹdẹ wẹ to dẽ. Yí Malku bo hẹn ẹn wá po hiẹ po, na ewọ doale hlan mi na devizọn lọ.

¹² Tikiku wẹ yẹn dohlan Efesu.

¹³ Avò he yẹn jodai to Tloa to Kalpu de, whenu hiẹ, ja, yí i wá po owe nẹlẹ pọ, humọ owé ayú tọn nẹlẹ.

¹⁴ Alẹksandlé ayátọ gànvẹ̃ tọn wàylan susu do mi; Oklunọ na suahọ ẹ kẹdẹdi azón étọn lẹ:

¹⁵ mẹhe dali hiẹ ni nọ payi dewe go te ga; na é ko glọnalina yẹwheho mítọn susu;

¹⁶ ohó tintan gbigblọn ṣie whenu, mẹde ma yíwhé dọ oji e gba, ṣigba gbẹtọ lẹpo gbé mi dai; é do yín hihia na ahó yetọn blo.

¹⁷ Ṣigba Oklunọ nọte to dẽ, bo sọ nahuhlọn mi; dọ gbọn yẹn mẹ yè nido la yẹwheho lọ to gigọ́ mẹ, podọ na Kosi lẹpo nido sè: yè sọ whlẹn mi sọn onù kinnikinni tọn mẹ.

¹⁸ Oklunọ na whlẹn mi sọn azón ylankan lẹpo mẹ, é nasọ yí mi whlá kaka jẹ ahọludu etọn olọn tọn mẹ, mẹhetọn gigo yín kakadoidoi. Niṣẹ.

¹⁹ Dọnúdo Pliska po Akuila po, po whédo Ónesifọlu tọn po.

²⁰ Elastu sinai to Kọlinti; ṣigba Tlofimu wẹ yẹn jodai to Miletu to azọn mẹ.

²¹ Dovivẹnu talala nado wá dẽ whẹpo avivo whenu na do wá. Eubulu po Pudeni po, Linu po Klaudia po, po mẹmẹsunnu lepo po dọnúdo we.

²² Oklunọ ni tin po gbigbọ towe po Ojomiọn mi tin pọ mì po. Niṣẹ.