2 TIMOTI 3 - BIBLU WIWE LỌ 1923

¹ EHE wẹ hiẹ ni yọnẹn ga, dọ to azán lẹ godo ojìe áwusinyẹn tọn lẹ na wá.

² Na gbẹtọ lẹ na lẹzun owanyi na yéde tó, nukunkẹnnọ, awagundotọ, saklanọ, nùzantọ, tólivẹtọ do mẹjitọ go, mayọndagbenọ, mawénọ,

³ matin owanyi ohẹnnumẹ tọn, alẹdatọ, meslẹtọ, awúmajáinanọ, kanylantọ, vivlẹtọ mẹdagbe lẹ tọn,

⁴ ajannọ, tasinyẹntọ, goyitọ, wanyina asọ hú Jiwheyẹwhe tó;

⁵ yé tindo ohia jijọ-di-Jiwheyẹwhe tọn, ṣigba yé mọn huhlọn etọn: omẹ mọtọn hunkọ le de wẹ hiẹ ni joagó sọn.

⁶ Na omẹ helẹ hunkọ mẹ wẹ yé he nọ saklota biọ owhégbè lẹ sọn, bo sọ nọ wlé yọnnu nulunọ lẹ dagbòvẹna he yè ko do agbàn ylando tọn do ota na, ehe yè gbọn wántúntún hunkọhunkọ mẹ do to dindọn danpé,

⁷ yé to núplọn tẹgbẹ, yé ma sọ sọgan jẹ oyọnẹn nugbo tọn mé gbède.

⁸ Podọ dile Janne po Jambele po dìọnukunsọ Moṣe, mọwẹ ehelẹ ga sọta nugbo do: gbẹtọ ayiha gbigblenọ, ome gbigbé gbọn yise dali.

⁹ Ṣigba yé ma to nukọn na yì hú mọ; na onulu yetọn na sọawúhia gbẹtọ lepo dile yewlẹ tọn sọawúhia do ga.

¹⁰ Ṣigba hiẹ ko yón núplónmẹ ṣie hezéhézé, owalọ ṣie, lẹndote, yise, linsinsinyẹn, owanyi, homẹfa,

¹¹ homẹkẹn, nukunbibia, he pla mi to Antioku, to Ikonioni po Listla po; homeken he yẹn doakónna: ṣigba sọn popo mẹ Oklunọ whlẹn mi.

¹² Mọwẹ, yé he jlo na nò jijọ-di-Jiwheyewhe tọn mẹ to Klisti Jesu mẹ lẹ, na nọ doakónna homẹkẹn.

¹³ Ṣigba mẹylankan lẹ, po mẹklotọ lẹ po na to yinylan yì nukọn, yé na to mẹklọ, yè na sọ to yé klọ.

¹⁴ Ṣigba hiẹ ni nọte to onú he hiẹ plọn lẹ mẹ, ehe hiẹ ko yi nukun towe hùn do e go hézé hézé, le hiẹ yón mẹhe de hiẹ plón yé te;

¹⁵ podọ sọn ovu gbọn wẹ hiẹ ko yón Owó wiwe, he sọgan hẹn we zùn nuyọnentọ hlan whlẹngan gbọn yise he tin to Klisti Jesu mẹ.

¹⁶ Owe wiwe lẹpo gbingbọn sọn Jiwheyẹwhe mẹ yín alenọ ga na mẹpinplọn, na wóhẹmẹ, na anadèmẹ, na núplónmẹ he tin to dódó mẹ:

¹⁷ na Jiwheyẹwhe gbẹtọ nido pégan, he yè hẹn sọgbè mlẹnmlẹn hlan azọ́n dagbe lẹpo.