2 SAMUẸLI 9 - BIBLU WIWE LỌ 1923

¹ DAVIDI sọ dọmọ, Ode gbé sọ tin he yè pòdai sọn owhé Sauli tọn gbè, na yẹn nido do dagbewà hia ẹ na Jonatani tọn wutu?

² Ode sọ tin sọn owhé Sauli tọn gbè mẹmẹsi de oyín mẹhetọn yin Ziba, yé sọ ylọ ẹ do Davidi de; ahọlu sọ dọ hlan ẹn dọ, Hiẹ wẹ Ziba? Ewọ sọ dọmọ, Mẹmẹsi towe wẹ ewọ.

³ Ahọlu sọ domọ, Omẹ depope ma gbẹ́: sọ tin sọn owhé Sauli tọn gbè, na yẹn nido do dagbewà Jiwheyẹwhe tọn hia hlan e de? Ziba sọ dọ hlan ahọlu dọ, Jonatani gbẹ́ sọ tindo visunnu de he yin sẹ́kunọ to afọ etọn lẹ go.

⁴ Ahọlu sọ dọ hlan ẹn dọ, Fie wẹ e te? Ziba sọ dọ hlan ahọlu dọ, Dayi e go, ewọ tin to owhé Makili visunnu. Ammiẹli tọn tọn gbè, to Lo debali mẹ.

⁵ Whenẹnu wẹ Davidi ahọlu domehlan, bo yi i sọn owhé Makili visunnu Ammiẹli tọn gbè sọn Lo-debáli.

⁶ Mẹfibosẹti visunnu Jonatani tọn, visunnu Sauli tọn, sọ wá Davidi de, bo ṣinyọn nukunmẹ etọn ji, bo kanwhébiọ. Davidi sọ domọ, Mẹfibosẹti. Ewọ sọ gblọn dọmọ, Dayi mẹmẹsi towe go!

⁷ Davidi sọ dọ hlan en dọ, A dibu blo: na yẹn na do dagbewà hia we nugbonugbo na Jonatani otọ́ towe tọn wutu, bo na gọ̀ aigba Sauli otọ́ towe tọn lẹpo jó na we; hiẹ na sọ nọ dù akla to tafo ṣie kọ̀n tẹ̀gbẹ.

⁸ Ewọ sọ kanwhébiọ, bo dọmọ, Etẹ́ mẹmẹsi towe yín, bọ hiẹ na do dèkẹ̀pọ́n avún kúkú mọnkọ de dile yẹn te?

⁹ Whenẹnu wẹ ahọlu ylọ hlan Ziba, mẹmẹsi Sauli tọn, bo dọ hlan en dọmọ, Onú he gbọn Sauli dali lẹpo podọ gbọn owhé etọn lẹpo dali yẹn ko na hlan visunnu mẹmẹnu towe tọn.

¹⁰ Hiẹ na nọ pò ogle nẹ, hiẹ, po visunnu towe lẹ po, po mẹmẹsi towe lẹ pó; hiẹ na nọ hẹn sinsẹn lẹ wá whegbe, na visunnu mẹmẹnu towe tọn nido nọ tindo akla nado dù: ṣigba Mẹfìbosẹti visunnu mẹmẹnu towe tọn na nọ dù akla to tafo ṣie ji whepoponu. Dinvie Ziba tindo visunnu fọtọ̀n po mẹmẹsi okò po.

¹¹ Whenẹnu wẹ Ziba dọ hlan ahọlu dọ, Kẹdẹdi ehe klunọ ṣie ahọlu degbèna mẹmẹsi etọn lẹpo, mọwẹ mẹmẹsi towe na wà do. Na Mẹfibosẹti, ahọlu dọmọ, ewọ na nọ dù to tafo ṣie kòn, di ode sọn visunnu ahọlu tọn lẹ mẹ.

¹² Mẹfibosẹti sọ tindo visunnu yọ̀pọ de, oyín mẹhetọn yin Mika. Omẹ he nọnọ̀ owhé Ziba tọn gbè lẹpo sọ yin mẹmẹsi hlan Mẹfiboṣẹti.

¹³ Mọwẹ Mẹfibosẹti nọnọ̀ Jelusalemmẹ: na ewọ nọ dù to tafo ahọlu tọn kọn tẹ̀gbẹ; ewọ sọ yín sékunọ to afọ etọn awe lẹ go.